Woodpusher Magpily, itinumba ang Botswana Wim sa Queens Final

ni Eddie M. Paez Jr. - @Sports | July 01, 2021

Itinumba ni untitled Francois Marie Magpily ng Pilipinas si pre-tournament favorite at Botswana ace Woman International Master Francis Onkemetse sa pang-11 at huling round upang mahablot ang huling upuan sa podium ng bakbakang online na binansagang FIDE Queen’s Chess Festival - Finals.

Ang tagumpay ni Magpily ay nag-angat sa produksyon ng dalagitang Pinay, may 1757 na rating, papunta sa kabuuang 8.5 puntos at naging susi sa pagsalba ng pangatlong baytang sa pangkat ng chessers na may rating na 1500 hanggang 1799. Sina Analia Karen Vargas Miranda (Ecuador, 10.0 puntos) at Woman Candidate Master Dahamdi M. K. Sanudula (Sri Lanka, 9.5 puntos) ang kumuha ng unang dalawang puwesto ng tunggaliang nilahukan ng chessers galing sa Africa, Asia, America at Europe.

Bago ang Round 11, pinatid din ni dating Youth Active Chess titilist Magpily ang isa pang title chesser noong penultimate round (Woman FIDE Master Sasha Mongeli, Kenya) at hinugutan ng kalahating puntos si Sanudula nang magharap sila sa Round 9 ng kaganapang nabuo mula sa inspirasyon hatid na rin ng Netflix chess classic na Queen’s Gambit.

Nauna rito, nakapasok sa finals si Magpily nang magrehistro ng walong puntos at maselyuhan ang pangatlong baytang sa qualifiers sa likod ng isang kinatawan mula sa Khazakstan (Elnaz Kaliakhmet, 9.0 puntos) at sa Sri Lanka (Sanudula, 8.5 puntos) sa paligsahang inorganisa ng FIDE Women’s Commission.

Samantala, nakatakda namang sumalang na si Woman Grandmaster Janelle Mae Frayna sa FIDE World Cup sa Galaxy Entertaining Center ng Gazprom Mountain Resort sa Krasnaya Polotana, Sochi simula ngayong Hulyo 12, 2021.

Mabigat na katunggali ang naghihintay sa Pinay champion woodpusher dahil si Grandmaster Thanh Trang Hoang ng Hungary ang kanyang nakatapat sa draw. Ang masaklap pa ay minsan nang nagharap ang dalawa at tumiklop si Frayna sa tubong Vietnam na karibal.

Raga, umupo sa trono ng Q.C. 10-Ball Cup

ni Eddie M. Paez Jr. - @Sports | June 29, 2021

Idinispatsa ni Anton “The Dragon” Raga ang hamon ni double world champion Ronnie “The Volcano” Alcano sa kanilang duwelo sa finals upang makaakyat ang Cebuano sa trono ng pinakaunang edisyon ng Quezon City 10-Ball Cup sa palaruan ng Hard Times Sports Bar sa Lungsod ng Quezon. “Anton sakalam!”, “Congratz Idol.”, “Congrats bai. Bisaya ne.”, “Sana mabigyan ng break si Anton sa USA. Congrats Idol” at “Congratulations Champ!” ang ilan lang sa mga pagbati na nakita sa social media patungkol sa tagumpay ng 23-anyos na Cebuanong minsan nang nagmarka sa labas ng bansa bilang runner-up ng malupit na China Open.

Dikdikan ang banggaang Raga-Alcano sa simula ng huling laro ng torneo. Napunta ang iskor sa 1-1 at 4-3 pabor kay Raga. Pero unti-unting nakadistansiya ang Pinoy Dragon sa kartadang 6-3 at 8-4 hanggang maging 13-5 na ang nakaukit sa scoreboard. Sa puntong ito, nakasikwat ng puntos si Alcano, 48-taong-gulang at tubong Laguna, para maging 13-6. Pero sa muling pagsargo, bokya ang inabot kaya’t tuluyan nang nakuntento sa pangalawang puwesto ang manunumbok na naging hari ng 9-Ball (2006) at 8-Ball (2007) sa buong daigdig.

Nagbulsa si Raga ng Php 250,000 bilang kampeon habang halagang Php 100,000 ang naging pabuya para kay Alcano. Napunta kay Kyle Amoroto ang pangatlong puwesto at ang pakonswelong Php 30,000. Ang tatlo ay tumanggap din ng iba’t-ibang taas (pinakamalaki sa nagkampeon) ng pasadyang tropeo na miniature ng pamosong landmark sa Quezon City (Quezon Memorial Circle).

Nakita sa paligsahang nilahukan ng 64 cue artists ng bansa ang mga upset nina Amoroto (dumaig sa batikang si Antonio Lining), Jericho Banares (makasingit kay Jeffrey De Luna), Bryant Saguiped (tumalo kay Marlon Manalo) at Jonas Magpantay (biniktima si 2x Japan Open king Johann “Bad Koi” Chua).

IM Masters Quizon, Concio at Bersamina sa FIDE World Cup

ni Eddie M. Paez Jr. - @Sports | June 28, 2021

Sasabak na sina Pinoy International Masters Daniel Quizon, Michael Concio Jr. at Paulo Bersamina kasama na ang 203 iba pang woodpushers sa prestihiyosong FIDE World Cup sa Galaxy Entertaining Center ng Gazprom Mountain Resort sa Krasnaya Polotana, Sochi simula sa Hulyo 12, 2021.

Naselyuhan nina Quizon (rating: 2319) at Concio (rating: 2397) ang kani-kanilang upuan sa malupit na pagtitipon ng mga disipulo ng ahedres matapos nilang dominahin ang Asian Zonals 3.3 Qualifying Tournament. Si Quizon ang naghari sa kompetisyon habang si Concio ang 2nd.

Sa kabilang dako, nominado ng National Chess Federation of the Philippines o NCFP ang paglahok ni Bersamina (rating: 2462) sa FIDE World Cup sa Open bracket.

Dehado ang troika sa unang round palang dahil puro mas matataas nang hindi hamak ang rating ng makakatunggali. Kung kukurap sila empake na ang susunod nilang hakbang. Pero sa rami ng Grandmasters, maganda ang tsansang makakuha ng GM norms ang tatlong Pinoy chessers.

Babangga sa pader si Quizon, 17-anyos, sa pambungad na round kay Russian GM Evgeny Bareev ng Canada. Ang 54-anyos na haharap sa binatilyong Pinoy ay minsang naging pang-4 sa world ranking at may rating na 2638.

Si GM Aravindh Chithambaram, may rating na 2641, ang unang balakid ng 16-anyos na si Concio. Ang 21-anyos na katunggali ng huli sa bakbakang naglalatag ng cash pot na $1,892,500 sa mga kalahok ay dalawang beses nang naging hari ng chess ng world chess power India.

Pinakamalakas sa mga balakid ng Pinoy woodpushers ay si GM Rameshbabbu Praggnanandhaa mula India na nakatoka kay Bersamina. Ang 15-anyos ay isang protegee itinuturing na pang-apat sa naging pinakabatang Grandmaster ng bansa. May rating na 2608.