Corteza, walang kupas, Champ sa Speed Pool

ni Eddie M. Paez Jr. - @Sports | July 14, 2021

Ipinakita ni Lee Van “The Slayer” Corteza kung gaano kaswabe ang kanyang pormang pangkampeonato pagdating sa pabilisan ng pagtumbok nang walang kahirap-hirap nitong inakyat ang trono ng pinakaunang Speed Pool Challenge na nasaksihan sa palaruan ng Sharks sa Quezon City kamakailan.

Hindi nagkaroon ng duda kung sino ang magiging kampeon ng torneo nang ilampaso ni Corteza sa finals si Jericho “Panday” Banares. Sa racks na tinumbok ng pambato ng Davao, nagsumite siya ng tiyempong 6:16.69 at walang nakuhang ni isa mang penalty mula sa missed shots at fouls.

Hindi lang sa finals nakapagsumite ng rekord na lubhang mabilis at walang mintis o walang sablay ang manunumbok na ni minsan ay hindi pa sumali sa isang Speed Pool na bakbakan. Sa elimination at sa semifinal round ay wala ring bangas ang kanyang naging marka.

“Walang sablay”, “Tibay talaga the Slayer”, “Congratsss Vanvan”, “What a monster wow!”, “Under 54-second average. That’s a speedy man!”, “Congrats to the Slayer Lee Van Corteza for the perfect game and win.” at “Flawless Victory!” ang ilan sa mga linyang nakita sa social media bilang pagsasalarawan at paghanga sa malupit na laro ng 42-taong-gulang na si Corteza.

Maraming mabibigat na pangalan ang lumahok sa kompetisyon at nag-ambisyong maging kampeon pero nabigo sila. Kasama sa listahan sina dating World 8-Ball titlist at kasalukuyang AZBilliards Moneyboard frontrunner Dennis “Robocop” Orcullo, ang 15-anyos na phenom na si Bernie “Benok” Regalario, Johann “Bad Koi” Chua, Jeffrey De Luna at Jeffrey Ignacio.

Matatandaan ding si Corteza, naging World 14.1 Straightpool titlist, ang nagwagi sa bakbakan na binansagang “Rotation: Reyes, Bustamante, Alcano, Biado, Banares, Corteza, Raga, Ignacio” at ginanap din sa Shark’s Billiards Hall noong Marso. Sa naturang kompetisyon, si double world titlist Ronnie “The Volcano” Alcano ang biniktima ni Corteza sa championship round.

Online Chess: Severino at Mendoza, matalas sa Asian Disabled C'ships

ni Eddie M. Paez Jr. - @Sports | July 13, 2021

Nasaksihan ang matinding talas ng pag-iisip ng mga pambato ng ahedres mula sa Pilipinas nang mapagwagian nina FIDE Master Sander Severino at untitled Crystal Cheyzer Mendoza ang sagupaan sa kani-kanyang dibisyon sa pagwawakas ng 2021 Asian Disabled Online Chess Championship noong Linggo ng gabi (oras sa Manila).

Nakahagilap si Severino ng panalo sa huling round ng kompetisyon laban kay Vietnamese Quan Van Nguyen (6th ranked, rating: 1862) upang makaipon ng kabuuang apat na puntos (tatlong panalo at dalawang tabla). Pagkatapos nito ay tinuntungan ng Pinoy, may rating na 2373, ang mas mainam na tiebreak output para makaakyat sa trono sa kalalakihan.

Si Severino rin ang kasalukuyang kampeon ng International Physically Disabled Chess Association (IPCA) sa buong daigdig.

Nakuntento ang kababayan ni Severino na si Henry Lopez (no. 3 sa ranking at may rating na 2110) sa pagkopo ng pangalawang puwesto para sa 1-2 finish ng mga Pinoy chessers habang si Mongolian Sonom Sundui (8th seed, rating: 1645) ang pumangatlo sa paligsahang ginanap sa Tornelo platform. Si Abolgazl Eski Kazimiyan ng Iran, pangalawa sa pinapaborang magwagi sa paligsahan, ay nakuntento sa pang-apat na baitang bunga ng mas mahinang tiebreak output bagamat pareho sila ni Sundui na nakapagsuko ng 3.5 puntos sa bakbakan kung saan pinairal ang Swiss System.

Pinataob naman ni Mendoza (3rd ranked, rating: 1631) si topseed at Woman International Master Irina Ostry (rating: 2163) ng Kyrgyztan sa penultimate round bago humugot ng isa pang panalo kontra kay Vietnamese Huuen Thu Doan sa huling yugto tungo sa pagdodomina sa kompetisyon bitbit ang walang mantsang iskor na limang puntos. Isa pang pambato ng Kyrgyztan (Dariaa Kudainazariva, 12th seed, rating: 1002) ang umangkin ng huli.

FM Nouri, panalo sa SEAG Rapid Chess Qualifier

ni Eddie M. Paez Jr. - @Sports | July 04, 2021

Sumulong ang binatilyong si FIDE Master Alekhine Nouri sa unang puwesto upang puwersahin ang mga bigating karibal na sina International Master Michael Concio Jr. at IM Daniel Quizon na makuntento na lang sa 2nd at 3rd place nang magsara ang bakbakang rapid chess sa Southeast Asian Games Selection - Semifinals tournament.

Ang trio nina Ma. Elayza Villa, Rowelyn Joy Acedo at Christy Lamiel Bernales ang mga bumandera sa sulungan sa kababaihan.

Anim na panalo at isang tabla (kabuuang 6.5 puntos) ang ginawang armas ni Nouri, 15-anyos, may rating na 2263 at minsan nang naghari sa USM Individual Chess Open sa Malaysia, upang dominahin ang oposisyong kinabibilangan ng mahigit 60 mandirigma ng paspasang ahedres. Napabilang sa mga naging biktima si topseed IM Ronald Dableo (round 5, rating: 2417) at ang batikang IM Ricardo De Guzman (round 6, rating:2330).

Hinugutan niya ng kalahating puntos sa huling yugto si Concio, runner-up sa Asian Zonals 3.3. chess tilt at kinatawan ng bansa sa nalalapit na FIDE World Cup sa Sochi, Russia, upang kandaduhan ang unang puwesto. Kagaya ni Nouri, hindi nakatikim ng pagkatalo sa paligsahan si Concio pero hanggang 6 na puntos lang ang inirehistro niya dahil sa 5 panalo at dalawang tabla. Gayunpaman, sapat na ito para sa pangalawang posisyon.

Ang naging marka ni Quizon, may rating na 2406 at isa pang kinatawan ng Pilipinas sa FIDE World Cup matapos na magkampeon sa Asian Zonal 3.3, ay 5.5. puntos naman (galing sa limang panalo, isang tabla at isang talo) kaya hanggang tersera lang ito nakasampa. Dinaig niya sa posisyong ito dahil sa mas mainam na tiebreak output sina Mark Jay Bacojo, Felrod Cyril Telesforo at Dilan Janmil Tisado.