Yearender: Biado, Orcullo at Alvarez, umangkla sa 2021

ni Eddie M. Paez Jr. - @Sports | December 30, 2021

Inasahan sa larong bilyar ang tatag ng pulso at tikas ng mga batikang sina “Black Tiger” Carlo Biado at “Robocop” Dennis Orcullo gayundin sa potensiyal ni “Wonderboy” Elijah Alvarez upang pakislapin ang bandila ng Pilipinas sa nakalipas na 12 buwan ng pandemya.

Nakapasok din si Johann “Bad Koi” Chua, two-time Japan Open titlist, sa podium ng World 10-Ball Championships habang napabilang sa top 10 sina Biado at Orcullo ng mabagsik na Fargo Rating. Idinagdag ni Biado, 2017 World 9-Ball Championships ruler at 2017 World Games gold medalist, ang U.S. Open 9-Ball na korona (Setyembre; Harrah’s Resort, Atlantic City, New Jersey) sa mahabang listahan ng mga napagwagiang giyera.

Sinundutan din ni Biado ang pangangaldag sa U.S. sa pamamagitan ng pagsungkit sa korona ng Abu Dhabi Open noong Nobyembre sa Powerbreak sa United Arab Emirates.

Pero ang titulo sa Amerika ay hindi malilimutan ng mga disipulo ng bilyar sa bansa dahil pagkatapos ng 27 taon ay muling nakasampa sa trono ng US Open ang isang Pinoy.

Taong 1994 pa nang nagkampeon si Efren Reyes sa prestihiyosong torneo.

Simula noon, bagamat 11 beses na may sumegundang Pinoy ay wala nang kinatawan ang Pilipinas na namayagpag dito.

Sa torneo, pumangatlo si Orcullo bukod pa sa pagkopo ng 16 na titulo sa iba’t-ibang mga paligsahan sa U.S. Nakapasok din siya sa podium sa siyam na iba pang kompetisyon. Ito ang nagtulak sa dating World 8-Ball king World Cup of Pool winner upang maging AZBilliards Moneyboard topnotcher sa pangalawang sunod na taon.

Umangat ang pangalan ni Alvarez sa bakbakang virtual na binansagang Arcadia One Pool Youth matapos niyang itumba sa finals sina Yannick Pongers ng Netherlands, Finland ace Arseni Sevastianov at ang kapwa binatilyong Pinoy na si Keane Rota.

Pagdanganan at Ardina shoot na sa LPGA 2022

ni Eddie M. Paez Jr. - @Sports | December 14, 2021

Sinigurado nina Bianca Pagdanganan at Dottie Ardina na hindi lang si 2021 U.S. Open titlist Yuka Saso ang magdadala ng tatlong kulay ng Pilipinas sa malupit na golf tour ng mga kababaihan sa U.S. matapos nilang opisyal na makuha ang kani-kanilang pasaporte sa Ladies Professional Golf Association (LPGA) Season 2022.

Nakapasok si Pagdanganan, naka-2 gold medal sa SEAG sa top 10 ng kompetisyong nagsilbi ring patatagan ng pulso at patibayan ng resistensiya sa tinawag na LPGA Q-Series sa Alabama upang mapabilang sa 45 lady parbusters sa LPGA 2022.

Ang kanyang rekord na 75-69-66-69-70-71-69-71 (14-under-par 560 strokes) mula sa dalawang linggo, 8 rounds at 144 butas ng hatawan ng bola ang nagsilbing tiket niya para magkaroon ng regular status sa prestihiyosong professional golf tour. Ibig sabihin ay hindi na siya nakasalampak sa reserve list ng LPGA tournaments at kailangan pang umasa na may mababakante sa roster ng mga kalahok.

Sa kabilang dako, naisalba ni Ardina, dating premyadong jungolfer ng Pilipinas, ang huling upuan para sa full LPGA 2022 membership status, sa tulong ng 4-under-par 570 (73-72-69-73-69-73-70-71) sa torneong ginanap sa Mobile, Alabama noong Disyembre 2 - 5 at sa Dothan, Alabama noong Disyembre 9 - 12. Nakatabla niya ang limang iba pang lady parbusters.

Rumatsada sa huling round si South Korean Na Rin An (33-under-par 541) upang daigin si Pauline Roussin Bouchard (32-under par 542) ng France para sa low medalist honors ng mga 45 LPGA qualifiers. Malayong pangatlo si Atthaya Thitikul (26-under-par 548) ng Thailand sa paligsahang nilahukan lang ng 110 piling aspirante sa professional circuit.

Ang 110 na kalahok ay mga survivors ng LPGA Qualifying Tournaments I and II.

Carlsen, world champ pa rin, GM So, matikas sa Speed Chess

ni Eddie M. Paez Jr. - @Sports | December 13, 2021

Pormal nang naipagtanggol ni GM Magnus Carlsen ang trono bilang world chess champion nang ilampaso ng Norwegian si Russian GM Ian Nepomniachtchi, 7.5-3.5, bagamat may tatlong laro pa ang natitira sa face-to-face na engkwentro sa Dubai.

Ang sagupaan ay naging dikdikan sa unang limang laro dahil sa fighting draws nina Carlsen at Nepomniachtchi. Pero sa Game 6, dinurog ni Carlsen ang Ruso. Simula noon, nagsimula nang gumuho ang hamon ng challenger sa nakatakda sanang 14-game na duwelo. Limang beses nang naging world champion si Carlsen simula nang agawan ng titulo si GM Vishwanathan Anand noong 2013.

Samantala, muling nakapasok sa semis ng Speed Chess Championships si GM Wesley So nang iposte ang dominanteng 17.5-9.5 laban kay dating world championship challenger at Italian-American GM Fabiano Caruana. Nauna rito, isang come-from-behind na 18.0-14.0 na panalo ang naitakas ni So, dating hari ng ahedres sa Pilipinas, mula kay GM Jeffrey Xiong (U.S.A).

Pagkatapos idispatsa si Caruana sa quarterfinals, haharapin ni So, kasalukuyang U.S. Chess titlist at FIDE World Random Fischer king, si GM Nihal Sarin ng India. Bukod kina So at Sarin, nasa semifinals na rin sina GM Ding Liren ng China at ang pre-favorite GM Hikaru Nakamura mula sa U.S.A Chess Federation.

Dito sa bansa, napanatili nina IM Daniel Quizon at IM Ricardo De Guzman ang 1-2 na puwesto sa Philippine National Chess Championships Grand Finals. Ang binatilyong si Quizon ay may perpektong marka (5 puntos sa limang laro) habang si De Guzman bagong hari ng National Seniors Chess, ay may naipong 4 puntos.