Biado, umuusok agad sa U.S. Open Pool, naka-2 na

ni Eddie M. Paez Jr. - @Sports | October 12, 2022

Umuusok na arangkada ang nakita mula sa nagtatanggol na kampeong si Carlo Biado matapos itong tumumbok ng dalawang panalo sa US Open Pool Championships na nasasaksihan sa palaruan ng Harrah's Resort, Atlantic City.

Hindi rin naman nagpahuli ang kapwa Pinoy at 2017 World 9-Ball Championships runner-up Roland Garcia matapos na mairehistro ang katulad na marka. Isang panalo na lang ang layo nina Biado at Garcia para makapasok sa knockout round ng prestihiyosong pagtitipon ng mga cue artists mula sa iba't-ibang parte ng mundo.

Unang pinadapa ni Biado, may Fargo rating na 819 at nagsilbing angkla ng Team Philippines na nagwagi sa World 10-Ball Team Championships, si Nikolin Dalibor ng Serbia, 9-1, bago niya tinuruan ng kasing-tinding aral si Russian Kristina Tcach sa kapareho ring iskor.

Samantala, dinaig naman ni Garcia si Jeremy Seaman (USA, 9-7) at Sullivan Clark (New Zealand, 9-5).

Hindi pa sumasalang sa mesa habang isinusulat ang artikulong ito sina "Bad Koi" Johann Chua at "The Slayer" Lee Van Corteza.

Noong 2021, isinulat ni Biado ang pangalan sa kasaysayan bilang pangalawang Pinoy pa lang na nakaupo sa trono ng prestihiyosong paligsahan. Sa hindi malilimutang finale noong isang taon, isang pamatay na 10-0 na bomba ang pinakawalan ng dating caddie para bumangon sa isang 3-8 na pagkakalubog at daigin si Singaporean Aloysius Yapp, 13-8 para sa titulo.

Taong 1994 nang magwagi si Efren Reyes sa event. Ngunit sa 46-taong kUwento ng paligsahan, 12 beses nang nakuha ang isang Pinoy ang pangalawang posisyon (tatlo rito ay sa pamamagitan pa rin ni Reyes).

'Superman' Gomez, kampeon sa Texas Open One Pocket

ni Eddie M. Paez Jr. - @Sports | September 6, 2022

Lumipad si "Pinoy Superman" Roberto Gomez patungo sa trono matapos walisin ang oposisyon sa Texas Open One Pocket na ginanap sa palaruan ng Skinny Bob's Billiards ng Roundclock, Texas.

Walang nakaporma sa tikas ni Gomez sa double-elimination na paligsahang nilahukan ng mga mababangis na one pocket warriors.

Pagkatapos ng opening round bye, nasingitan ng Pinoy sina Josh Robert (5-3), Billy Thorpe (5-4) at Venezuelan Jerry Calderon (5-2) kaya nakasampa siya sa hotseat. Dito, nakaharap niya si AZBilliards Moneyboard frontrunner Fedor Gorst ng Russia. Hindi rin umubra ang Ruso at nangibabaw ang angas sa pagtumbok ng 2007 World 9-Ball Championship runner-up na si Gomez sa iskor na 5-3.

Nang masipa sa losers' bracket si Calderon, kumayod ito hanggang makuha ang natitirang upuan sa finals ng kompetisyon. Dito, sinagasaan niya sina Billiards Congress of America Hall of Famer Alex Pagulayan (4-1), 2017 World 9-Baĺl 2nd placer Roland Garcia (4-2) at 2019 World 9-Ball king Gorst (4-2). Nakuntento sa huling upuan ng podium ang Rusong kilala rin sa pool circle bilang "The Machine" habang nakuha ni Calderon ang karapatan na makipagduwelo kay Gomez.

Bitbit ang twice-to-beat na bentahe, kumpiyansang dinaig ni Gomez, 43-taong-gulang at tubong Zamboanga, si Calderon, 5-3, para makandaduhan ang korona.

Dahil sa tagumpay, nananatili ang solidong kampanya ni Gomez sa Estados Unidos.

Kamakailan ay tinangay niya ang dalawang runner-up honors sa 2022 Hex.com Pro-Am Tournament sa CR's Sports Bar ng Coon River, Minnesota.

Jungolfer Arroyo, reyna sa Southern California Tour

ni Eddie M. Paez Jr. - @Sports | July 20, 2022

Naitakas ni Pinay jungolfer Monique Arroyo ang mga titulo ng dalawang paligsahan sa Southern California Junior Golf Tour ngayong Hulyo sa Long Beach, California.

Swak naman sa unang 10 performers si Kamilla Edriana Del Mundo sa Girls Under 6 bracket ng IMS Academy Junior World Championships sa Torrey Pines, California upang bahagyang maramdaman ang lakas ng Pilipinas sa pagtitipon. Pumangpito si Del Mundo sa pangkat pero bukod dito ay wala nang iba pang bahagi ng Team Pilipinas ang nagmarka sa karera sa indibidwal na karangalan.

Sa kabilang dako, nalampasan ni Justin Delos Santos ang hamon ng pagiging bagito sa pinakamatandang major golf event sa kasaysayan - ang British Open - nang kalmante nitong malusutan ang cutoff score para makatawid sa weekend play at tuluyàng magkapagbulsa ng pakonsuwelong $31,638 sa pagtatapos ng torneo. Nakakuha ng pasaporte ang Pinoy parbuster sa prestihiyosong kompetisyon matapos niyang pumang-apat sa isang torneo sa mabagsik na Japan Golf Tour.

Samantala, inalat sina Bianca Pagdanganan at Dottie Ardina sa kanilang pinakahuling sabak sa Ladies' Professional Golf Association matapos na maitsapuwera sa homestretch ng Dow Great Lakes Invitationals Midland, Michigan dahil sa lumobong iskor. Sumemplang sa pang-40 na baytang si Pagdanganan habang sadsad naman sa pang-45 na baytang si Ardina.

Hinirang na pinakamabangis si Arroyo sa Scholl Canyon Summer Championships na nasaksihan sa fairways ng Scholl Canyon Golf Club sa Glendale, California. Nagsumite ang pambato ng Pilipinas ng 62 sa 3,004 yardang palaruan. Malayong segunda si local pride Aya Ave dahil sa iskor nitong 69.