DJango, Alcano, Chua at Raga sa QC 10 Ball Cup

ni Eddie M. Paez Jr. - @Sports | June 24, 2021

Pinangungunahan nina Francisco “Django” Bustamante, Jeffrey “Cobra” Ignacio, Ronnie “The Volcano” Alcano, Johann “Bad Koi” Chua at Anton “The Dragon” Raga ang pulutong ng mga bilyaristang sumasargo na sa gitna ng pakikipaglaban ng bansa sa pandemya ngayong nagsimula na ang pitong araw na Quezon City 10-Ball Cup sa palaruan ng Hard Times Sports Bar sa Lungsod ng Quezon.

Animnapung iba pang disipulo ng bilyar sa Pilipinas kabilang na ang mga batikang sina Antonio Lining, Baseth Mocaibat, Raymond Faraon, Marlon Manalo, Jeffrey “The Bull” De Luna at ang sumisibol na si Bernie “Benok” Regalario ay naghahangad rin na makapasok sa winners’ circle ng paligsahan kung saan paiiralin ang nararapat na health at safety protocols hanggang sa pagtatapos nito sa Hunyo 27.

Pero mabigat ang laban ng 60 kalahok na nabanggit kontra kina Bustamante at Ignacio. Si Bustamante ay isang dating World 9-Ball champion at dalawang beses nang nakipagtambalan kay Efren “Bata” Reyes upang ibigay sa Pilipinas ang dalawang “World Cup of Pool” na titulo. Ang cue artist mula sa Tarlac ay isa na ring Billiards Congress of America (BCA) Hall of Famer. Bagamat malapit nang maging senior citizen sa edad na 57, petmalu pa rin sa mesa si Bustamante at kamakailan nga ay pumangalawa pa siya sa “2021 Hard Times 10-Ball Cup”.

Si Ignacio naman ay isang lubhang malupit na banta sa lahat ng mga karibal dahil ito ang nagwagi sa torneo kung saan sumegunda si Bustamante. Double world champion naman ang markang nakadikit sa pangalan ni Alcano dahil naging kampeon na ito hindi lang sa larangan ng 9-ball kundi pati na sa 8-ball sa buong mundo samantalang si Chua ay dalawang beses nang naging Japan Open titlist. Si Raga naman ay nagparamdam sa daigdig ng mga petmalu nang minsan na siyang pumangalawa sa China Open.

Binatilyong si Alvarez naghari sa One Pool virtual

ni Eddie M. Paez Jr. - @Sports | June 17, 2021

Elijah Wonder Boy Alvarez

Inihudyat ni Elijah “Wonderboy” Alvarez ng Pilipinas ang kanyang potensiyal na magmarka sa buong mundo katulad nina Efren “Bata” Reyes, Francisco “Django” Bustamante, Dennis “Robocop” Orcullo, Alex “The Lion” Pagulayan, Ronnie “The Volcano” Alcano, Carlo “The Black Tiger” at Rubilen “Bingkay” Amit matapos magkampeon ang binatilyo sa isang virtual tournament na tinaguriang Arcadia One Pool Youth at sinalihan ng mga kabataan mula sa iba’t-ibang bansa.

Sa isang apat na kataong finals, inilampaso ni Alvarez sina Yannick Pongers ng The Netherlands, Arseni Sevastianov mula sa Finland at ang kapwa Pinoy na si Keane Rota para sa pinakamalaking tagumpay ng kanyang sumisibol na billiards career. Umiskor si Alvarez ng 103 puntos samantalang sina Pongers, Sevastianov at Rota ay nakaipon lang ng malamyang 71, 70 at 62 ayon sa pagkakasunod-sunod.

“Lights out shooting in the first half. Well done Wonderboy!”, “Felicidades Elijah!”, “Congrats Idol” at “Congratulations Champion” ang ilan lang sa mga pagbating nakita sa social media matapos ang torneong tinampukan din ng pagpaparamdam ng puwersa ng mga kabataang Pinoy.

Bukod kina Alvarez at Rota, malayo rin ang narating sa kompetisyon ni Anthony Figueroa matapos itong mapabilang sa walo-kataong semifinals. Dito, nakagrupo niya sina Alvarez at Rota kung saan top 2 lang ang nagkaroon ng pasaporte sa finals. Matatandaang tinumbok din ng binatilyo ang isang final 4 performance sa Arcadia Virtual Ghost (VG) Battle of the Sexes Billiards Tournament na ginaganap online.

Ang Pinoy “Wonderboy” ay nakalusot sa matinding hamon mula sa pangatlong grupo ng qualifying stage VG tourney. Sa grupong nabanggit, nakasama niyang ang-ambisyon sina Yuli Hiraguchi ng Japan, Polish ace Konrad Juszczyszyn at ang pambato ng Czech Republic na si Yvonne Ullman Hybler. Pero hindi tinakasan ng tikas si Alvarez at nakuha pang daigin si Poison VG 10-Ball 2.0 Virtual Tournament champion Juszczyszyn kaya nakausad ito sa susunod na yugto.

Biado, kampeon sa Texas

ni Eddie M. Paez Jr. - @Sports | June 15, 2021

Hinirang si 2017 World Games gold medalist Carlo “The Black Tiger” Biado ng Pilipinas bilang kampeon ng Big Tyme Classic One Pocket sa Spring, Texas matapos daigin sa finals si Josh Roberts.

Hinatak din ni Biado, naging pinakamalupit na manunumbok sa 9-Ball sa buong mundo noon ding 2017, ang iba pang mga Pinoy sa isang impresibong 1-3-5-6 na pagtatapos dahil pumangatlo ang Cebuanong si Warren “The Warrior” Kiamco sa paligsahan at nasosyo naman sina 2017 World 9-Ball runner-up Roland Garcia at 2004 World 9-Ball king Alex “The Lion” Pagulayan sa panglima at pang-anim na mga puwesto.

Ito na ang pangalawang titulo ni Biado sa mayamang pool circuit ng U.S. Nagwagi rin siya sa 3rd Cajun Coast Classic 9-Ball sa Louisiana noong Mayo. Dalawang 3rd place performance din ang nasaksihan mula sa kanya noong lumahok ito sa Buffalo One Ball One Pocket at Buffalo 9-Ball sa Jefferson, Los Angeles noon ding nakalipas na buwan.

Samantala, kinuha ni Austrian Albin Ouschan ang kanyang pangalawang korona sa loob ng limang taon habang nagbunyi ang mga taga middle east nang pumangalawa si Kuwaiti Omar Alshaheen matapos magsara ang 2021 World Pool Championships sa Milton Keynes, England.

Dalawang kinatawan ng Pilipinas ang sumargo sa kompetisyong minsan na ring napagwagian nina Biado, Efren “Bata” Reyes, Alex “The Lion” Pagulayan, Ronnie “The Volcano” Alcano at Francisco “Django” Bustamante. Si Roberto “Superman” Gomez ay hanggang round-of-32 lang nakarating bagamat tinalo niya noong pre lims ang eventual champion mula sa Austria habang si Jeffrey “The Bull” De Luna ay hindi nakalusot sa group qualifiers.