Letran vs. Lyceum sa online final; Predators at Bravos, BIDA sa PCAP

ni VA / Eddie M. Paez Jr. - @Sports | July 17, 2021

Nakatakdang maglaban ang season host Letran at Lyceum of the Philippines University sa finals ng NCAA Season 96 juniors online chess tournament. Ang tapatan ng dalawang kinatawan ng dalawang nabanggit na NCAA member schools ay naitakda matapos nilang mamayani sa kani-kanilang semifinal matches.

Umabot ng finals para sa Squires si Christian Mark Daluz matapos niyang talunin ang isa pang kinatawan ng Junior Pirates na si Paul Matthew Llanillo sa semifinals. Bumawi naman si Leonel Escote sa pagkatalo ng kakamping si Llanillo nang pataubin nito ang nakatunggaling si Melson John Gallo ng JRU upang makatungtong ng kampeonato.

Naputol ang koneksiyon ni Gallo sa internet habang nagaganap ang laro at nabigo ng makabalik pa na naging sanhi ng pagkabigo.

Sa araw na ito ang pagtutuos nina Daluz at Escote para sa titulo habang pinaglabanan na kahapon nina Llanillo at Gallo ang ikatlong puwesto.

Samantala, pinangunahan ng mga bigating San Juan Predators at Manila Indios Bravos ang mga koponang matagumpay na nakausad na sa maigting na knockout rounds ng import-flavored 2021 Professional Chess Association of the Philippines (PCAP) Wesley So Cup Conference na ginaganap online.

Nawala naman sa anunsiyo ang pamamayagpag ng Cordova Duchess Dagami Warriors sa Southern Division ng event na kinikilala ng Games and Amusement Board (GAB) at sinusuportahan ng tubong Cavite na chesser at dating hari ng ahedres sa Pilipinas na si Grandmaster Wesley So.

Kumartada ang San Juan ng 31 panalo mula sa 34 na matches sabay kamada ng 499 puntos para makapasok sa yugtong lalapatan ng “isang kurap, uwi na” na tuntunin. Nakaiskor ang Manila ng 30 tagumpay kontra sa apat na talo. Nakaipon din ang koponan ng 438 puntos. Kapwa hinihintay pa ng dalawang topseeds ang makasasagupa sa knockout round.

Maliban sa San Juan at Manila, mula sa Norte, nakahakbang na rin sa susunod na bahagi ng kompetisyon ang All Filipino titlist na Laguna Heroes (26-8; 471 puntos), Caloocan Loadmanna Knights (26-8; 445.5 puntos) at Antipolo Cobras (25-9; 437 puntos).

Golfers Saso, Pagdanganan at Ardina, pumapasok sa top 10

ni Eddie M. Paez Jr. - @Sports | July 16, 2021

Kumakatok sa top 10 sina Tokyo Olympics-bound Yuka Saso at Bianca Pagdanganan ng Pilipinas gayundin ang alternate nila na si Dottie Ardina sa solidong paglalakbay sa Ladies Professional Golf Association - Dow Great Lakes Bay Invitational Tournament sa palaruan ng Midland Country Club sa Miami.

Sa paligsahang nilalapatan ng “alternate play” format, nakipagtambalan si Rolex World no. 8 Saso, kasalukuyang U.S. Open champion at sariwa sa isang 5th place finish sa Marathon Classic (Sylvannia, Ohio), kay 5-time LPGA winner at Rolex World no. 15 South Korean Minjee Lee upang isumite ang isang one-under-par na kartada. Nagpakawala ang dalawa ng 5 birdies para makabawi sa dalawang bogeys at ang isang masaklap na double bogey.

Ang tambalan ng Fil-Japanese at South Korean ay tinaguriang “Team Nations” sa kompetisyong nagsisilbing mainam na bahagi ng paghahanda nina Saso at Pagdanganan para sa bakbakan sa Tokyo dahil kalahok din ang iba pang mga sasabak sa Olympics.

Isang palo lang ang angat sa kanila ng mga nakaupo sa pang-10 puwesto (Danielle Kang-Lydia Ko; Britanny Lang-Britanny Lincicome; Austin Ernst-Caroline Masson at Celine Herbin-Nuria Iturrioz) at dalawa sa may tangan ng pampitong baytang (Inbee Park-So Yeon Ryu; Ariya Jutanugarn- Moriya Jutanugarn; Mi Jung Hur-Jeongeun Lee).

Ganito rin ang posisyon ng mga nagsanib-puwersa na sina Pagdanganan-US bet Sarah Schemelzel (4 birdies, 3 bogeys) at Ardina-South African ace Paula Reto (5 birdies, 2 bogeys, 1 double bogey).

Kasalukuyang apat na tambalan ang humahawak ng trangko. Ang nangungunang pulutong ay binubuo ng magkapatid na Nelly at Jessica Korda; Cydney Clanton-Jasmine Suwannapura; Pajaree Anannarul-Aditi Ashok at Jillian Hollis-Lauren Stephenson.

Mga bagets, angat sa SEAG Blitz Chess Qualifier

ni Eddie M. Paez Jr. - @Sports | July 07, 2021

“Kami naman!” Tila ito ang mensahe ng mga kabataang chess warriors ng bansa sa pangunguna nina untitled Neil Chester Reyes at International Master Michael Concio Jr. nang makapasok sa winners’ circle ang apat na mga binatilyo sa salpukan ng Southeast Asian Games Selection Semifinals Blitz Tournament.

Sumulong si Reyes, 16, at may rating na 2131, sa 7 panalo at isang tabla upang kontrahin ang nag-iisang pagkatalo at makaipon ng kabuuang 7.5 puntos pagkatapos ng online na sagupaang tumagal ng siyam na yugto. Pinakamalaking pangalang nabiktima niya paakyat sa trono ay si IM Ricky De Guzman.

Humataw papunta sa pangalawang puwesto si Concio, 16-anyos na runner-up sa Asian Zonals 3.3 at sa SEAG Rapid Chess Selection tourney kamakailan, tangan ang 7 puntos at mas mataas na tiebreak performance mula sa anim na panalo, dalawang tabla at isang talo. Nasipa ng kinatawan ng bansa sa FIDE World Cup papunta sa pangatlong si De Guzman na nakaipon din ng 7 puntos.

Si IM Daniel Quizon, 17-anyos na hari sa Asian Zonals 3.3 at nagdadala rin ng tatlong kulay ng bansa sa World Cup, ang nanguna sa apat na kataong pulutong na may 6.5 puntos. Mas maangas na tiebreak din ang naging puhunan ni Quizon, tumersera sa SEAG Rapid Semis para makuha ang pang-apat na baytang. Kay Roel Abelgas napunta ang pang-5 posisyon habang isa pang binatilyo, si Mark Jay Bacojo, ang bumuntot kay Abelgas.

Nagkita-kita sa unahan ng pulutong sa kababaihan sina Mary Joy Tan (rating:1958), Kylen Joy Mordido (rating: 2147), Francois Magpily (rating: 2101) at Christy Lamiel Bernales (rating: 2116) pagkatapos ng siyam na rounds dahil sa markang tig-7 puntos. Pero nang pairalin ang tuntunin para sa mga nagtabla, swak si Tan sa unang puwesto, naangkin ni Mordido ang runner-up honors at si Magpily ang pumangatlo.