Arevalo, palapit na sa LPGA nang makalusot sa Q'Fying

ni Eddie M. Paez Jr. - @Sports | August 24, 2021

Nakatakdang madagdagan ang bilang ng mga Pinay na sumasabak sa malupit na Ladies Professional Golf Association (LPGA) Tour matapos malusutan ni Southeast Asian Games gold medalist Abegail “Abby” Arevalo ang katatapos na Qualifying School Stage 1 Tournament sa California.

Maluwag na nakapasok sa Stage II si Arevalo sa bakbakang ginanap sa iba’t-ibang golf courses (Mission Hills Country Club; Rancho Mirage; Shadow Ridge Golf Club) matapos itong umiskor ng 3-under-par 285 strokes pagkatapos ng 4 rounds. Ito ay sapat na para makuha niya ang pang-33 na posisyon sa paligsahang binigyan ang top 95 scorers para umusad sa susunod na yugto.

Ang Stage II ay gaganapin simula Oktubre 18 hanggang 24 samantalang ang pinal na yugto (Q-Series) ay papalo sa Nobyembre at Disyembre. Pagkatapos ay ilalabas na ang listahan ng mga puwedeng maglaro sa LPGA sa 2022. Sa kaugnay na kaganapan, ang husay ng mga Pinay parbusters na sina Yuka Saso at Bianca Pagdanganan ay lumutang sa ilang mga departamento ng LPGA.

Sa larangan ng Average Driving Distance, pumapangalawa si Pagdanganan dahil sa kanyang kartadang 285.021 yarda. Ang double gold medalist ng 2019 Southeast Asian Games ay bumubuntot sa nangungunang si Dutch Anne Van Dam. Ang pambato ng Netherlands ay may rekord na 292.237 yarda ngunit angat ang Pinay sa pumangatlong si South Korean A. Lim Kim (279.829 yarda).

Pangalan ni Saso ang kasama sa Moneyboard centerstage dahil ang apagwagian nang salapi sa bakbakang LPGA ay umabot na sa $ 1,212,225. Nasa harapan niya sina world no. 1 Nelly Korda (USA) at si Lydia Ko ng New Zealand. Sina Korda (gold) at Ko (bronze) ay kapwa nagmarka sa katatapos na Tokyo Olympics.

Nasa pang-apat din si Asian Games champion Saso sa pinakamataas para sa Rolex Annika Major Award dahil sa naipong 60 puntos. Naging pasaporte ng 20-anyos na Fil-Japanese ang pagkopo ng korona sa 2021 U.S. Open sa isang makasaysayang resulta.

Parbuster Saso, buhay ang tsansa para sa 2nd Major title

ni Eddie M. Paez Jr. - @Sports | August 21, 2021

Nagsumite noong Huwebes ng gabi (oras sa MNL) si Tokyo 2020+1 Olympian at kasalukuyang U.S.Open Champion Yuka Saso ng 4-under-par 68 ng isang mainit na arangkada sa Ladies Professional Golf Association (LPGA) AIG Women’s Open sa Scotland upang buhayin ang tsansa niya para sa pangalawang major title ngayong taon.

Sinamantala ng 20-taong-gulang na Fil-Japanese ang lahat ng par-5 na mga butas para isalpak ang isang makinang na eagle (hole no. 12) at dalawang birdies (hole nos. 6 at 14) sa palaruan ng Carmoustie links at matagumpay na makaupo sa pang-apat na puwesto. Bukod dito ay nakahirit din si Saso ng birdie sa pang-5 butas para kontrahin ang bogey sa hole no. 2.

Sariwa si Saso, double gold medal winner sa Palembang Asian Games, sa isang top 10 performance (9th place) sa Summer Olympics. Nakuha rin niya ang pang-15 puwesto sa Trust Golf Women’s Scottish Open kung saan nagbulsa siya ng mahigit Php 1M bilang pabuya. Kung magwawagi si Saso sa kasalukuyang paligsahan ay malaki ang tsansang ang world no. 8 lady parbuster mula sa Pilipinas ang makakakuha ng prestihiyosong 2021 LPGA Rolex Annika Major Award.

Isang palo lang ang layo ng kanyang iskor sa 67 strokes ng tumatrangkong troika nina world no. 1 at Olympic titlist Nelly Korda ng USA, Swedish Madelene Sagstrom at 2020 KPMG Women’s PGA queen Sei Young Kim mula sa South Korea. Kasalo ni Saso sa pang-apat na baytang sina 2018 British Open winner Georgia Hall, LPGA Tour rookie Andrea Lee (Estados Unidos) at si amateur Louise Duncan (Scotland).

Sina Lexi Thomson (USA), Carlota Ciganda (Spain) at Lizette Salas (USA) ay kumartada ng kani-kanyang 69 tungo sa paghahati-hati ng pangwalong posisyon habang ang nagtatanggol na kampeong si Sophia Popov ng Germany ay nasa pang-41 baytang sa kompetisyong sinasalihan ng may 144 na manlalaro.

Marticio, binigo si Wang ng U.S. sa online World Cup Rapid

ni Eddie M. Paez Jr. - @Sports | August 15, 2021

Itinumba ni 53rd seed Jersey Marticio ng Pilipinas si top-ranked American chesser Ellen Wang at tatlong iba pang mga pinapaborang kalahok upang ipagpatuloy ang panonorpresa sa ginaganap ng sagupaan sa Girls Under 14 bracket ng online FIDE World Cup Rapid Chess - Cadet and Youth Championships.

Ang dalagitang Pinay ay isang untitled entry na may 1544 rating lang samantalang si Wang ay isang Woman International Master at may 2088 na rating. Sa kasalukuyan, ang performance rating ni Marticio ay nakapako sa 2509.

Bukod sa nabanggit na panalo, tinalo rin ni Marticio sina 7th seed Kseniya Norman ng Belarus (round 2, rating: 1906), Russian 13th seed WCM Veronika Shubenkova (round 3, rating 1839) at 15th seed WCM Ashley Pang (round 4, rating 1792) mula naman sa USA. Maliban dito, hinugutan din ng buong puntos ni Marticio si Carol Ndlovu ng Zimbabwe (Zimbabwe) at Kelsey Liu (USA) para sa perpektong anim na puntos pagkatapos ng anim na rounds ng kompetisyon.

Kapag nakapasok sa top 10 si Marticio pagkatapos ng torneo ay uusad siya sa knockout rounds katulad ng narating ng tulad niya ay untitled na si Lexie Grace Hernandez sa Under-16 Girls brakcet.

Nauna rito, sa paligsahang nilahukan ng mga nasa Under 16 na kababaihan, nag-qualify sa susunod na yugto si Hernandez matapos siyang pumang-apat sa qualifying stage.

Sa torneong nilahukan ng mahigit 100 na chessers mula sa iba’t-ibang parte ng daigdig, nanorpresa rin ang 24th seed na Pinay dahil siya lang ang untitled na kalahok na nakapasok sa top 9. Kung tutuusin, ang kanyang kabuuang iskor na 8.0 puntos ay pangalawa sa pinakamataas ngunit dahil sa superior tiebreak output ng dalawang karibal na may walong puntos din ay dumulas siya sa pang-apat na posisyon.