Higit 300, patay sa magnitude 7.2 na lindol sa Haiti

ni Ronalyn Seminiano Reonico | August 15, 2021

Umabot sa mahigit 300 katao ang nasawi at daan-daan ang sugatan at mayroon ding mga naiulat na nawawala matapos tumama ang magnitude 7.2 na lindol sa southwestern Haiti noong Sabado.

Ayon sa tala ng United States Geological Survey, ang magnitude 7.2 na lindol ay tumama sa 8 km (5 miles) mula sa bayan ng Petit Trou de Nippes na may lalim na 10 km at sinundan pa ito ng mga aftershocks.

Naramdaman din ang pagyanig sa Cuba at Jamaica. Ayon sa Haiti Civil Protection service, kumpirmadong umabot sa 304 ang bilang ng mga nasawi at nasa 1,800 ang sugatan.

Patuloy namang nagsasagawa ng rescue operations sa mga gumuhong gusali kabilang na ang aabot sa 949 kabahayang nasira. Idineklara naman ni Prime Minister Ariel Henry ang “month-long state of emergency” dahil sa insidente.

Operasyon ng MRT-3 at LRT-1, naapektuhan ng lindol

ni Ronalyn Seminiano Reonico | July 24, 2021

Balik-operasyon na ang Metro Rail Transit Line 3 (MRT-3) at Light Rail Transit Line 1 (LRT-1) matapos itong pansamantalang ihinto dahil sa naganap na magnitude 6.6 na lindol sa Calatagan, Batangas na naramdaman din sa Metro Manila.

Kaagad na nagsagawa ng “full inspection of tracks and facilities” ang LRT-1 kaugnay ng lindol.

Bandang 6:25 AM naman nang nagbalik-operasyon ang LRT-1.

Saad naman ng MRT-3 bandang alas-7:04 nang umaga, “Bumalik na sa normal na operasyon ang MRT-3 matapos pansamantalang itigil ang biyahe ng mga tren, matapos magsagawa ng safety check at assessment sa mga istasyon at pasilidad nito kaugnay sa nangyaring lindol kaninang 4:49 AM sa Calatagan, Batangas.”

Samantala, sa inisyal na ulat ng Philippine Institute of Volcanology and Seismology (PHIVOLCS), unang naitala ang lindol bilang magnitude 6.7 ngunit ibinaba ito sa magnitude 6.6.

Batangas, niyanig ng magnitude 6.6 na lindol, ibang lugar, apektado rin

ni Ronalyn Seminiano Reonico | July 24, 2021

Niyanig ng magnitude 6.6 na lindol ang Batangas ngayong Sabado nang umaga, ayon sa PHIVOLCS.

Sa inisyal na tala ng PHIVOLCS, alas-4:49 nang umaga nang tumama ang lindol sa Calatagan, Batangas na may lalim na 116 km ngunit itinaas ito ng ahensiya sa lalim na 123 kilometro.

Naitala rin ang Intensity V sa Calapan City at Puerto Galera, Oriental Mindoro; Sablayan at Magsaysay, Occidental Mindoro; Carmona at Dasmarinas City, Cavite; Intensity IV sa Quezon City; Marikina City; Manila City; Makati City; Taguig City; Valenzuela City; Pasay City; Tagaytay City, Cavite; Batangas City at Talisay City, Batangas; San Mateo, Rizal; Intensity III sa Pasig City; San Jose del Monte City, Bulacan.

Gayundin ang Instrumental Intensities na: Intensity V sa Calapan City at Puerto Galera, Oriental Mindoro; Intensity IV sa Batangas City, Batangas; Carmona, Cavite; Calumpit at Plaridel, Bulacan; Intensity III sa Quezon City; Marikina City; Pasig City; Las Piñas City; Muntinlupa City; Malabon City; Navotas City; San Ildefonso, Pandi, Malolos, San Rafael, at Marilao, Bulacan; Intensity II sa San Juan City; Dagupan City; Polillo, Quezon; at Intensity I sa Guinayangan, Quezon; Magalang, Pampanga; Iriga at Sipocot, Camarines Sur; Daet, Camarines Norte; Palayan City, Nueva Ecija; Iloilo City; Kalibo, Aklan; San Jose City, Antique; at Bago City, Negros Occidental.

Sinundan ito ng 5.5-magnitude aftershock bandang alas- 04:57 nang umaga na may lalim na 108 kilometers.

Naitala ang Intensity V sa Calatagan, Batangas; Intensity IV sa Balayan, Calaca at Mabini, Batangas; Intensity III sa Quezon City; Makati City; Manila City; Tagaytay City at Naic, Cavite; Batangas City, San Pascual & Bauan, Batangas; Hermosa, Bataan; at Intensity II sa Lipa City, Batangas.

Naitala rin ang Instrumental Intensities na: Intensity IV sa Calatagan, Batangas; Intensity III sa Calapan City, Oriental Mindoro; Plaridel, San Ildefonso, Calumpit at Malolos City, Bulacan; Intensity II sa Marikina City; Las Piñas City; Pasig City; Batangas City, Batangas; Marilao, Pandi at San Rafael, Bulacan; Bacoor City at Carmona, Cavite; Dolores, Quezon; at Intensity I sa Quezon City; San Juan City; Infanta, Gumaca at Mulanay, Quezon.

Ayon sa PHIVOLCS, posibleng magkaroon ng mga aftershocks ngunit wala naman umanong banta ng tsunami dahil sa lindol.