Patay sa 7.8 lindol, 61 na

ni Jeff Tumbado @News | June 14, 2026

Photo: BFP

Umakyat na sa 61 ang bilang ng mga nasawi sa magnitude 7.8 na lindol na tumama sa ilang bahagi ng Mindanao noong Hunyo 8, ayon sa Office of Civil Defense (OCD).

Ayon kay OCD Assistant Sec. Bernardo Rafaelito Alejandro IV, patuloy pa rin ang beripikasyon ng mga pangalan ng mga nasawi

Bumaba naman sa 33 ang bilang ng mga nawawala mula sa dating 40, habang umabot

na sa 1,221 ang bilang ng mga nasugatan.

Karamihan sa mga namatay dahil sa bumagsak na debris ay naitala sa General Santos City, habang ang mga nasawi dahil sa landslide ay mula sa Jose Abad Santos at Sarangani Island.

Patuloy naman ang search and rescue operations sa mga apektadong lugar.

P84M ayuda, naipamigay na sa mga nilindol — DSWD

ni Jeff Tumbado @News | June 14, 2026

Photo: DSWD

Nasa mahigit 500K katao ang naapektuhan ng magnitude 7.8 na lindol na tumama sa Maasim, Sarangani noong Hunyo 8, habang umabot na sa higit P84 milyon ang naipamahaging ayuda ng pamahalaan.

Ayon sa pinakahuling ulat ng DSWD Disaster Response Operations Monitoring and Information Center Report No. 9 na inilabas alas-6 ng gabi nitong Biyernes, nasa kabuuang 137,081 pamilya o 553,068 indibidwal mula sa 401 barangay sa Regions IX, XI, XII, at Bangsamoro Autonomous Region in Muslim Mindanao ang naapektuhan ng malakas na pagyanig.

Sa datos ng DSWD, nasa 2,131 pamilya o 9,393 indibidwal ang pansamantalang nanunuluyan sa 26 na evacuation center.

Samantala, 13,480 pamilya o 54,274 katao naman ang nakikitira sa kanilang mga kamag-anak at kaibigan sa labas ng mga evacuation facility.

P50K sa namatayan sa 7.8 lindol — PBBM

ni Mylene Alfonso @News | June 11, 2026

Photo: Pangulong Bongbong Marcos sa lindol sa Mindanao - FB

Magbibigay ang pamahalaan ng tig-P50,000 ayuda sa bawat pamilya na namatayan dahil sa magnitude 7.8 na lindol sa Mindanao noong Lunes.

Ito ang inanunsyo ni Pangulong Ferdinand Marcos Jr. sa kanyang pagbisita sa General Santos City upang inspeksyunin ang mga lugar na naapektuhan at pangasiwaan ang pamamahagi ng Assistance to Individuals in Crisis Situation (AICS) sa mga residente.

“Lahat ng pamilya na meron silang casualty na biktima na nasawi, magbibigay tayo ng tig-P50,000 para sa kanila, para tulong dun sa kanilang naging malapit sa kanila na namatay,” pahayag ni Marcos.