M5 World C'ship sa 'Pinas, ECHO Phl, Champion sa M4

ni Gerard Arce @Sports | January 17, 2023

Pagkakataon naman ng ECHO Ph na manaig bilang panibagong kampeon ng Mobile Legends: Bang Bang M4 World Championships upang maging ikatlong sunod na Filipinong koponan na manaig sa prestihiyosong online gaming matapos madaling walisin ang dating kampeon na Blacklist International sa iskor na 4-0, Linggo ng gabi sa Tennis Indoor, Senayan, Indonesia.

Tinapos ng ECHO Ph ang isang taong paghahari ng Blacklist sa pinakamataas na estado ng kompetisyon sa buong mundo at maibulsa ang $300,000 o mahigit sa Php16.4- M pangunahing papremyo sa kabuuang $800,000 na ipinamigay sa malakasang torneo, habang nauwi ng dating defending champion na Blacklist ang $120,000 bilang 2nd placer.

Naitala ni Karl “KarlTzy” Nepomuceno ang kauna-unahang manlalaro ng ML:BB na naging two-time World champion matapos makuha ang unang titulo sa Bren Esports noong 2021 sa Singapore, kung saan sila ang unang koponang Pinoy na nagkampeon sa kompetisyon na sinundan ng Blacklist International noong isang taon.

Nakasama ni Nepomuceno sa koponan sina Frederick Benedict “Bennyqt” Gonzales, Jankurt Russel “KurtTzy” Matira, Frediemar “3MarTzy” Serafico, Tristan “YAWI” Cabrera, Jaypee “JAYPEE” Dela Cruz, Sanford “Sanford” Vinuya at Jhonville Borres “Outplayed” Villar, habang susubukang makabawi ng Codebreakers sa susunod na edisyon na binubuo nina team captain Johnmar "OhMyV33nus" Villaluna, Danerie James “Wise” del Rosario, Kiel "Oheb" Soriano, Salic "Hadji" Imam at at Edward Jay “Edward” Dapadap, Kent Xavier “Kevier” Lopez, Mark Jayson “Eson” Gerardo, at Dexter Louise “DEXTER” Alaba.

Inanunsyo rin ang pagtatalaga sa Pilipinas bilang susunod na host country ng M5 World Championships sa Disyembre ngayong taon, kung saan minsan ng hinawakan ng bansa ang isang pandaigdigang ML:BB tourney na MSC 2019 sa Araneta Coliseum na pinagharian ng Onic Esports; na sinundan ng makasaysayang 30th SEA Games nang talunin ng SIBOL ang Indonesia.

All-Pinoy sa M4 World C'Ships: Blacklist kontra ECHO PH

ni Gerard Arce @Sports | January 16, 2023

Sa ikalawang sunod na pagkakataon ay muling magaganap ang isang All-Filipino championship match sa M4 World Championship (Mobile Legends: Bang Bang) tournament sa pagitan ng defending titlist Blacklist International at ECHO PH na itinala ang pambihirang panalo kontra Indonesian team na RRQ Kingdom nitong Sabado ng gabi sa iskor na 3-1 sa Tennis Indoor sa Senayan, Indonesia.

Tatangkain ng Blacklist na makaulit ng panalo sa rematch kontra ECHO PH na kanilang tinalo sa upper bracket Finals sa dikdikang 3-2 iskor noong Biyernes ng gabi.

Todo handa ang pangunahing pambato ng Codebreakers na sina team captain Johnmar "OhMyV33nus" Villaluna at Danerie James “Wise” del Rosario, habang inaasahang bubuhos ng suporta ang mga kakamping sina Kiel "Oheb" Soriano, Salic "Hadji" Imam at Edward Jay “Edward” Dapadap, Kent Xavier “Kevier” Lopez, Mark Jayson “Eson” Gerardo, at Dexter Louise “DEXTER” Alaba.

Susubukang agawin at makabawi ng ECHO PH na pagbibidahan nina Frederic Benedict “Bennyqt” Gonzales, Jankurt Russel “KurtTzy” Matira, Karltzy, Frediemar “3MarTzy” Serafico, Tristan “YAWI” Cabrera, Jaypee “JAYPEE” Dela Cruz, Sanford “Sanford” Vinuya at Jhonville Borres “Outplayed” Villar.

Bago magtapat sa finals ng Upper Bracket, naunang tinalo ng Blacklist ang paboritong RRQ Hoshi Indonesia sa iskor na 3-2 sa upper bracket ng knockout stage, Miyerkules ng gabi, habang pinulbos ng ECHO PH ang ONIC Esports ng Indonesia sa 3-1 panalo.

Parehong binalewala ng Codebreakers at ECHO ang maingay at katunggaling manood na buhos ang suporta sa Indonesian teams sa dikdikang laban na nauwi sa matinding palitan ng mahusay na pagpapatakbo ng diskarte at husay sa pagmamando ng laro.

'Pinas, mapapalaban sa NBA 2K23: eFIBA Season 1

ni Anthony E. Servinio @Sports | January 14, 2023

Pormal na ipinakilala ng FIBA ang unang torneo ng NBA 2K23: eFIBA Season 1 na magsisimula ngayong Enero 20 at isa ang Pilipinas sa 30 bansa na kalahok. Nais ng eGilas Pilipinas na ipagpatuloy ang mga tagumpay na natamasa sa FIBA eSports Open noong 2020 at 2021.

Sasabak ang mga Pinoy sa Southeast Asia Conference kasama ang mga pambato ng Indonesia at Mongolia sa isang single round robin o tig-dalawang laro bawat bansa. Ang dalawang may pinakamataas ng kartada ay tutuloy sa knockout championship sa Enero 24, isa sa anim na kokoronahan.

Nagkampeon agad ang eGilas sa pinakaunang FIBA eSports Open noong Hunyo, 2020 at tinalo ang Indonesia. Isinuko ng mga Pinoy ang tropeo sa Australia sa sumunod na torneo pagsapit ng Nobyembre at subalit bumawi at nabawi ito kontra Indonesia sa pangatlong edisyon noong Abril, 2021.

Tulad ng nakagawian, sa online at hindi face-to-face ang mga laro. Pinagharap ang mga magkakalapit na bansa upang makaiwas sa mga suliranin pagdating sa internet.

Ang iba pang bansa sa Asya ay nasa Middle East Conference na Lebanon, Saudi Arabia at Qatar. Isang dosena ang kalahok sa European Conference na Belgium, Cyprus, Pransiya, Alemanya, Gran Britanya, Italya, Latvia, Lithuania, Portugal, Espana, Turkiye at Ukraine.

Binubuo ang Africa Conference ng Tunisia, Ghana, Benin, Burkina Faso, Morocco, Ehipto, Cote d’Ivoire at Madagascar. Maglalaro agad ng championship sa Enero 26 ang Barbados at Puerto Rico para sa North America Conference at Argentina at Brazil sa South America Conference.

Ang mga laro ay gaganapin gamit ang Pro-Am mode ng NBA 2K23 na isa sa pinakasikat na online game sa buong mundo. Lahat ng kaganapan ay mapapanood sa opisyal na social media ng FIBA.