AP Bren patuloy ang dominasyon at liderato sa MPLPH Season 13

ni Rey Joble @E-Sports | March 27, 2024

Nanatiling wala pa ring bahid ang paborito sa titulong AP Bren Sports at ipakita ang kanilang hangaring makuhang muli ang kampeonato ng MPLPH Season 13.

Winalis lahat ng AP Bren ang kanilang mga katunggali sa walong laro upang mapanatili ang liderato.

Sa ikaapat na pagkakataon, ipinakita ng AP Bren ang kanilang pagdomina sa torneo matapos walisin ang isa na namang kalaban – ang Minana Evos, 2-0. Pumapangalawa sa AP Bren ang Echo Express na may natipong walong panalo sa siyam na laro habang nasa ikatlong panalo ang Onic na may nakolektang anim na panalo sa walong laro.

Naiposte ng Echo ang kanilang ikaapat na sunod na panalo matapos blangkahin ang TNC Pro Team, 2-0.

Ito ang ikaanim na talo sa siyam na laro ng Minana na kasalukuyang umuokupa sa ikalimang puwesto sa torneo na kinabibilangan ng walong koponan. Ipinoste naman ng Onic ang kanilang ikatlong panalo sa isang serye matapos dominahin ang Minana.

Inilabas ng Onic si Duane “Kelra” Pillas’ Freya na siyang naging susi sa kanilang panalo. 

Sa laban kontra Minana, tila walang awat ang Onic at nadala pa nila ito sa laro kontra Omega. Halos perpektong laro ang ipinamalas ng Onic kung saan walang nasalanta sa mga manlalaro laban sa Omega.

Sa ikalawang laban, gumawa ng kanilang bagong estratehiya ang Omega kung saan nagkaroon ng palitan ng mga manlalaro kabilang dito sina John Paul “H2wo” Salonga, CJ “Ribo” Ribo Jr., Dexter “Exort” Martrinez, Nowee “Ryota” Macasa, at Jomari “Jown” Pingol, pero lumabas na mas handa ang Onic.

Sa isa pang laro, nakabawi ang Echo kontra RSG, 2-1. Matatandaang tinalo ng Raiders ang Echo sa kanilang MPL Invitational sa Indonesia noong Nobyembre ng nakaraang taon.

MLBB CN pre-season inilunsad, 8 koponan magbabakbakan

ni Rey Joble @E-Sports | March 23, 2024

Pormal na inilunsad ang pre-season ng 2024 MLBB CN na gagawin simula Marso 31.

Mahahati sa dalawang parte ang naturang torneo kung saan walong koponan ang maglalaban-laban sa Stage 1 — kabilang na rito ang JDG, KBG, LL, MYG, NOVA, XYG, MXG, and MAX. 

Matapos makumpleto ang dalawang parte ng torneo, ang dalawang premyadong teams na aangat ay tutulak para lumaro sa Esports World Cup (EWC) China Qualification Tournament na kabilang sa Mid-Season Cup (MSC). 

Dahil sa opisyal na pagpasok ng  MLBB CN Esports sa China, nais ni Mike Chu, ang pinuno ng MLBB CN Esports region, na makapagsagawa ng mas balansiyadong torneo at lumikha ng mas kapana-panabik na sistema sa naturang kompetisyon. “We hope to create a stable competition system for local clubs quickly, establish competitive training opportunities for professional players, and bring the highest level of competition content for players who are looking forward to the launch and testing of MLBB CN in the short term,” dagdag pa ni Chu.

Masaya ring ibinahagi ni Chu ang pagsali ng China sa MLBB CN.

Nitong nakaraang torneo, nagsilbing host ang China sa kauna-unahang pagkakataon sa isang premyadong kompetisyon kung saan nanaig ang NOVA Esports. 

Ibinahagi rin ni NOVA Esports CEO Li Tingting ang pagnanais ng kanilang grupo na mas mapalawak pa ang kanilang husay at tumulong sa layuning mas palakihin ang esports sa buong mundo. "NOVA Esports has always prioritised the growth and expansion of esports globally. Joining MLBB CN and learning more about the tournament and local esports roadmap has made us very optimistic about the path of its global esports ecosystem. We look forward to participating in the 2024 MLBB CN tournament."

Blacklist rumesbak, AP Bren, matikas pa rin

ni Rey Joble @E-Sports | March 18, 2024

Gaya ng inaasahan, nagpakitang Gilas ang Blacklist International para maiparamdam kaagad ang kanilang pagnanais na makuha ang titulo sa MPL-PH Season 13.

Tinalo ng Blacklist International ang Minana Evos, 2-1, at makapagbaon ng mas mataas na kumpiyansa. Galing sa mapait na pagkatalo sa tila grand finals level na sagupaan sa nagtatanggol na kampeong AP Bren Esports, 2-0, binuhos ng Blacklist ang kanilang atensyon sa paggapi sa Minana Evos at bumalik sa trangko.    

Matapos ang mainit na pasimula sa season kung saan dinaig ng Minana Evos ang TNC Pro, 2-0, hindi nila nabitbit ang klase ng laro laban sa gutom na Blacklist.  Sinamahan ang mga Agents ng Blacklist sa hilera ng mga nagwaging koponan ng Echo Express na madaling idinispatsa ang Onic Philippines, 2-0. Pahirapan naman para sa RSG Philippines ang pagsungkit sa 2-1 panalo kontra Smart Omega.

Samantala, magsasanib-puwersa ang Snapdragon Pro Series at Moonton Games para mas palakihin ang mas gawing kapana-panabik ang kompetisyon ng Mobile Legends: Bang Bang.

Ang tambalan ng naturang mga grupo  ang magbibitbit sa pinakapapular na mobile Multiplater Online Battle Arena game sa buong mundo sa iba’t-ibang rehiyon na kinabibilangan ng Snapdragon Pro Series.

Itinuturing na pinakamalaking  multi-title mobile esports league and dadalhin ng naturang grupo na magbibigay ng pinagsamang premyo na USD $780,000.

Ang mas pinalaking torneo ay maghahatid ng mas magandang kompetisyon sa mga kalahok na kinabibilangan ng mga bansa sa Europa, Latin America, gitnang Asya, at hilagang Africa, ay maghahatid din ng bagong plataporma para sa mga kababaihang players.   

Nakatakdang ilunsad ang all MLBB women’s league sa Southeast Asia. “With MLBB Esports having already begun taking root in the mainstream, our focus is on expanding our ecosystem to be even more inclusive and accessible,” ang sabi Ray Ng, Head of Esports Ecosystem, MOONTON Games. “We’re delighted to team up with Snapdragon Pro Series again to offer the international MLBB community even more opportunities to watch, compete, and celebrate their passion for the game.”