School-based ML MVC Cup, itinatag para sa free education

ni Gerard Arce - @Sports | November 23, 2021

Isang hakbang ang isinagawa ng Collegiate Center for Esports (CCE) para alisin ang pangit na paniniwala at pagtingin ng mga magulang sa mga larong mobile games o mas kilala ngayong bilang E-sports matapos ilunsad ang school-based tournament na Mobile Legends: Bang Bang 5-on-5 Varsity Cup (MVC).

Pinangungunahan ng ilang mga atleta mula sa 10 koponan galing sa National Collegiate Athletic Association (NCAA) ang mga naglalaro sa naturang kompetisyon na naglalayong bigyan ng libreng edukasyon o scholarship bilang mga student-athletes. Binubuo ang torneo ng mga kasalukuyang mga undefeated teams na Colegio de San Juan de Letran Knights, Emilio Aguinaldo College Generals, Lyceum of the Philippines University Pirates, Mapua University Cardinals, San Sebastian-Recoletos Stags, University of Perpetual Help Dalta, College of St. Benilde Blazers, Jose Rizal University Heavy Bombers, Arellano University at San Beda College Red Lions.

Inihayag nina CCE spokesperson Waiyip Chong at Finance head Stanley Lao na tulad ng isang normal na student-athlete, hindi maaaring makapaglaro ang isang atleta kung ito’y may problema sa kanyang pag-aaral. Kaya’t nararapat lamang umano na pagtuunan nito ng pansin ang pag-aaral para makapasa at kaantabay nito ang paglalaro na tiyak naman na nababantayan at nasa tamang oras lamang.

“Kaya ginawa naming silang player from the schools o scholar para mag-aral sila, parang sa basketball, di ka makakalaro ng basketball kung may bagsak o incomplete ka na grades, ganun din ang gagawin natin sa CCE, you need to complete your grades papasa mo yan, attendance, para maglalaro ka na gagraduate ka pa,” wika ni Chong, sa weekly PSA Forum online.

“Ang importante rito ay marami tayong natutulungan at nareregulate ang paglalaro ng mga bata. Dati kase kapag pagpapasok ang mga parents, tatakas ang mga bata maglalaro, ngayon regulated, nasa school lahat, alam natin yung ginagawa nila, sa ganung paraan maco-control natin sila dahil regulated not like before,” dagdag naman ni Lao sa forum.

Kumpara umano sa mga professional players ng E-Sports, makukunsiderang maigsi lamang ang panahon ng paglalaro ng mga e-sports athletes mula sa schools at colleges, gayundin ang maliit lamang na papremyo na nakalaan rito na ang pangunahing layunin ay makapagtapos ng pag-aaral ang mga student-athletes.

Bren Esports, world champ sa Mobile Legends

ni Gerard Peter - @Sports | January 27, 2021

Bren lang ang malakas! Ito marahil ang pinatunayan ng koponan ng Bren Esports upang lampasan ang matinding pakikipagtuos laban sa Burmese Ghouls ng Myanmar, 4-3, linggo ng gabi, upang makamit ang World title ng Mobile Legends: Bang bang (MLBB) M2 World Championships sa Singapore.

Naitala marahil ng Bren ang isa sa pinakamalaking tagumpay, upang takpan ang panalong kinuha sa The Nationals Season 2 noong 2020, para hamigin ang $140,000.00 o mahigit P6.7 million na price money, kasama ang mapipiling skin ng isang hero na may tatak ng kanilang koponan.

Sumandal sa pamumuno ni KarlTzy ang koponan ng Bren upang pangunahan ang panalo sa huling dalawang laro para sa best-of-seven series para makabawi sa Burmese Ghouls na kumatay sa kanila noong first round ng playoffs, dahilan upang bumagsak ito sa lower bracket. Ngunit hindi nagpatinag ang Filipino group na karamihan ng miyembro ay naka-gold medal sa 2019 Southeast Asian Games na ginanap sa bansa.

Maagang nagpamalas ng lakas ang Bren nang kunin ang 19-15 na panalo sa game 1 mula sa mga hero na claude (KarlTzy), Mathilda (Pheww), Baxia (FlapTzy), alice (ribo) at atlas (Lusty), habang ang lopsided na 26-4 sa game 2 gamit ang mga hero na sina Yi Sun-Shin (KarlTzy), Selena (Pheww), Baxia (FlapTzy), Pharsa (ribo) at Chou (Lusty). Subalit kumunekta ng tatlong sunod na panalo ang Burmese Ghouls sa 11-8 sa game 3, 22-18 sa game 4 at 20-12 sa Game 5.

Ipinagpatuloy ni KarlTzy ang magandang laro sa deciding battle ng dominahin niya ang buong laro. Sinubukang painan ng Burmese Ghouls ang hero ni KarlTzy, ngunit pumalya ito. Tinapos ng Bren ang laban sa pamamagitan ng pagbasag sa mid turret ng kalaban habang tinagpas ng mga ito ang apat na hero’s ng kalaban para tuluyang makuha ang panalo sa M2 World Championships 2021.

Itinanghal bilang finals MVP si KarlTzy na may nakuhang papremyong $3,000.00, habang nakuha ng Burmese ang runner-up price sa larong sinasabing ‘greatest show’ sa kasaysayan ng MLBB esports na nagbigay ng napakagandang laro sa mga Filipino na nagmula sa mababang puwesto para sa kampeonato.

FIBA Esports Open II: U.S. at Argentina, champ

ni Anthony E. Servinio - @Sports | December 22, 2020

Matagumpay na nanatili sa Argentina ang kampeonato ng Timog Amerika habang naghari ang Estados Unidos sa Hilaga at Gitnang Amerika sa pagwawakas ng FIBA ESports Open II Lunes ng umaga. Pinatunayan ng dalawang bansa na hindi lang sila kampeon sa sahig ng Basketball kundi pati rin sa cyberspace bilang pinakamahusay na manlalaro ng NBA2K sa buong mundo.

Kinailangan ng Argentina ang tatlong laro upang patahimikin ang mga baguhan galing Uruguay sa serye ng kampeonato, 48-39. Wagi ang Argentina sa unang laro, 66-60, subalit bumawi ng malaki ang Uruguay sa pangalawa, 73-48.

Hinirang na Most Valuable Player si Adrian Lopez. Ang iba pa niyang mga kakampi ay sina Ramiro Diaz, Tomas Schell, Ramiro Ellero, Lautaro Rodriguez. Agustin Alonso at Lisandro Tisnes. Winalis ng Argentina ang elimination, 4-0, kasunod ang Uruguay sa 3-1. Mula sa pangalawa sa unang FIBA ESports Open noong Hunyo, pangatlo na lang ang Brazil (2-2) at sinundan ng Bolivia (1-3) at Venezuela (0-4).

Matapos parehong magpasiklab ng matinding opensa sa elimination, depensa ang naging susi ng pagwala ng mga Amerika sa Dominican Republic sa mga iskor na 48-45 at 60-56. Natapos ang elimination na tabla ang dalawang bansa kasama ang Puerto Rico sa 5-1 subalit sila ang nakapasok sa bisa ng FIBA tiebreaker.

Binubuo ang Team USA nina Spencer Wyman, Malik Hobson, Rafel Davis, Ramo Radoncic, Jack Mascone, Kenny Hailey at Wendi Fleming. Ang 33 anyos na si Fleming ay gumawa ng kasaysayan bilang pinakaunang kababaihan na lumahok sa FIBA ESports Open.

Nagkampeon sa Timog Silangang Asya ang Pilipinas sa unang FIBA ESports Open noong Hunyo. Pinag-isa ang rehiyon at Oceania sa sumunod na torneo at pumangalawa ng E-Gilas sa Australia noong nakaraang buwan.

Hihintayin ang pahayag ng FIBA kung kailan ang ikatlong edisyon ng torneo. Mula sa 17 bansa noong unang edisyon, lumaki sa 36 ang kalahok sa katatapos na torneo.