Duterte sa CHR: Pagkamatay ng pulis sa buy bust, imbestigahan din!

ni Zel Fernandez | April 28, 2022

Pinaiimbestigahan ni Pangulong Duterte sa Commission on Human Rights (CHR) ang pagkamatay ng isang pulis, kabilang ang nasawing drug suspek, sa ikinasang buy bust operation sa Brgy. Biga, Tanza, Cavite nitong nakaraang Abril 24.

Giit ng pangulo, kung nagkataong suspek lamang ang namatay sa insidente kamakailan, tiyak umanong lalabas na namang masama ang mga pulis at palalabasing salvage o sadyang pinatay ang suspek.

At dahil mayroon umanong miyembro ng kapulisan ang namatay sa ikinasang operasyon ng mga awtoridad kontra-droga, nais ni Duterte na siyasatin ng CHR ang puno’t dulo ng insidente upang maging patas ang pagkilala ng hustisya sa bansa.

Paliwanag pa ng pinuno, mula nang magsimula ang kampanya ng kanyang administrasyon kontra-droga, madalas umano na ang hanay ng kapulisan ang nagiging dehado sa tuwing may napapaslang na drug suspek sa mga isinasagawang operasyon at palagi raw itong ‘big deal’ sa komite.

Samantalang kapag mga pulis naman aniya ang namamatay, hindi umano nagtatagal ang balita na mismong sa Kampo Crame lamang umiikot o kaya naman ay sa istasyong kinabibilangan ng nabiktimang pulis, na kalaunan ay kagyat ding nalilimutan ang pangyayari.

Takot daw ‘makatay’... P-Du30, ‘di dadalo sa United States-ASEAN summit sa Mayo

ni Lolet Abania | April 27, 2022

Tinanggihan ni Pangulong Rodrigo Duterte ang imbitasyon na dumalo sa United States-ASEAN summit sa Washington DC, na gaganapin pagkatapos ng May 9 elections.

Sa Talk to the People na ipinalabas ngayong Miyerkules nang umaga, sinabi ni Pangulong Duterte na hindi makabubuti para sa kanya na dumalo sa May 11-13 summit dahil sa panahong iyon ay malalaman na at mayroon nang bagong pangulo ang bansa.

“May invitation kasi ako sa America to join ASEAN countries to have a dialogue with [US President Joe] Biden. Ang problema kasi the dates are May 11 to 13, ang aming conference. By the time tapos na ang eleksyon, malaman na natin kung sino ang bagong presidente,” saad ng Pangulo.

“Ang mahirap kasi kung ako ang nandu’n, I might take a stand that could not be acceptable to the next administration,” aniya pa.

Ipinahayag din ng Punong Ehekutibo ang tungkol sa kanyang safety kung magta-travel siya patungo sa US para sa nasabing summit.

“Kaya takot rin ako na pumunta roon. Una, mawala. Pangalawa, makapasok ako sa lugar na baka makatay lang ako. Pangatlo is a matter of principle. Noon pa sinasabi ko na talaga na ayaw ko. Reason is akin na lang ‘yun,” paliwanag pa ni P-Duterte.

Ayon sa Pangulo, inatasan na niya sina Executive Secretary Salvador Medialdea at Department of National Defense (DND) Secretary Delfin Lorenzana na pumunta sa US para talakayin ang aniya, ‘maraming bagay’, kabilang na ang ASEAN Summit at ilang kumpidensyal na usapin.

20 private armed groups, nabuwag ng PNP

ni Lolet Abania | April 26, 2022

Humigit-kumulang sa 20 private armed groups (PAG) ang nalansag ng Philippine National Police (PNP) bago pa ang May 2022 elections.

Sa isang interview ngayong Martes, sinabi ni PNP spokesperson Police Colonel Jean Fajardo na karamihan sa 20 PAGs ay mula sa Bangsamoro at bahagi ng local terrorist groups.

“More or less nasa 20 na po ‘yung ating na-dismantle, na-disband, at na-delist po doon sa listahan natin ng mga private armed group,” sabi ni Fajardo.

Ayon kay Fajardo, ilang mga politicians ang umano’y nagha-hire ng naturang PAG members kaugnay sa isinasagawa ng mga ito sa eleksiyon.

Kung may sapat na silang ebidensiya, sinabi ni Fajardo na magsasampa ang PNP ng mga reklamo laban sa mga nasabing politicians na nag-e-employ ng mga PAGs.

Binanggit pa ni Fajardo na ang National Task Force for the Disbandment of Private Armed Groups ay nakatakdang mag-isyu ng official resolution para i-delist ang tatlong natitirang aktibong pre-identified PAGs.

Matatandaan noong Abril 18, nagbabala si Pangulong Rodrigo Duterte sa mga kandidato sa 2022 elections na ang pagkakaroon ng mahigit sa dalawang body guards, aniya, ay nangangahulugan na bumubuo ng pagpapanatili ng private army, kung saan salungat ito sa election laws ng bansa.

“We have decided and have communicated this with the Cabinet... The rule should really be followed… that more than two bodyguards would be considered a private army,” saad ni Pangulong Duterte.

“And if you think there is danger to your person, a certain place or person, ipatawag ng RD ‘yan, ipatawag ng chief of police at kausapin. Maiwasan ‘yung away lalo na ang paggamit ng armas,” dagdag ng pangulo.