Suspensiyon, pirmado ng 23 senador... Operasyon ng E-Sabong sa ‘Pinas, itigil – P-Digong

ni Zel Fernandez | May 3, 2022

Iniutos na ni Pangulong Rodrigo Duterte ang agarang pagpapatigil ng operasyon ng E-Sabong sa bansa, batay sa rekomendasyon ni Department of Interior and Local Government (DILG) Secretary Eduardo Año.

"And the recommendation of Secretary Año is to do away with E-Sabong. He cited the validation report coming from all sources. So, since it's his recommendation and I agreed with it and it is good, so E-Sabong will end by tonight," anang pangulo sa Talk to the People na nai-taped kagabi ng Lunes, na ipinalabas naman ngayong Martes nang umaga.

Nauna nang naatasan ni Pangulong Duterte si Año na magsagawa ng survey ukol sa "social impact" ng E-Sabong sa mga mamamayanang Pilipino kung saan tinukoy ng kalihim ang mga hindi pa rin nareresolbang pagkawala ng ilang mga sabungero sa bansa.

Isa rin sa mga nabanggit ng pangulo na impluwensiya umano ng online sabong sa mga Pinoy ay ang kakulangan sa tulog o pagiging puyat dahil sa pagkaadik dito.

Aniya, "It might not be sophisticated, but still, it is a survey. [It is] loud and very clear to me that it was working against our values."

Gayundin, ang pagpapatigil umano ng E-Sabong sa bansa ay kasunod ng dumaraming panawagan na suspendihin na ang multibillion cockfighting industry na hinihinalang may kaugnayan sa mga kidnapping at pagkawala ng mga sabungero sa mga nagdaang buwan.

Ang naturang pagpapatigil sa online sabong ay nilagdaan ng halos 23 senador sa ilalim ng Resolution 996, na humihimok sa Philippine Amusement and Gaming Corporation (PAGCOR) na suspendihin ang lisensiya ng mga E-Sabong operators at agarang ipatigil ang lahat ng mga aktibidad na may kaugnayan dito hanggang sa maresolba na ang kaso ng 31 nawawalang sabungero.

Bago ito, hindi inaprubahan ni Duterte ang panawagang suspensiyon sa E-Sabong operations dahil kumikita umano nang milyon ang gobyerno mula sa mga pustahan sa naturang sugal. Kaya sa halip, inutusan nito ang Kongreso sa regulasyon ng operasyon nito sa pamamagitan ng paghahain ng legislative franchise.

Gayunman, kalaunan ay naging bukas ang pangulo sa panawagang pagpapatigil ng E-Sabong bunsod ng malinaw na "social problem" na kinasasangkutan ng mga sabungero at ng kanilang mga pamilya.

Kaugnay nito, tinatayang aabot sa P3.69 bilyon ang nakolekta ng gobyerno sa gaming operations ng walong E-Sabong licensees mula noong Abril hanggang Disyembre 2021, batay sa datos na inilabas ng PAGCOR.

Samantala, mula Enero hanggang nitong Marso 15, 2022 ay nagkaroon naman umano ng koleksiyon na nasa P1.37 bilyon mula sa operasyon ng pito pang licensees.

Eid’l Fitr sa Mayo 3, idineklarang regular holiday ni P-Du30

ni Lolet Abania | May 2, 2022

Idineklara ni Pangulong Rodrigo Duterte ang Martes, Mayo 3, 2022, bilang regular holiday para sa pag-obserba ng Eid’l Fitr o ang end of Ramadan.

Nitong Mayo 1, nilagdaan ni Pangulong Duterte ang Proclamation 1356 na nagdedeklarang holiday ang naturang okasyon.

Sa kanyang Proclamation, ayon sa Pangulo, makapagbibigay ang nasabing holiday sa mga Pilipino ng aniya, “the full opportunity to join their Muslim brothers and sisters in peace and harmony in the observance and celebration of Eid’l Fitr, subject to the public health measures of the national government.”

Una nang sinabi ni Executive Secretary Salvador Medialdea nitong Linggo na idedeklara ng Malacañang ang Martes, Mayo 3, na national holiday, bilang pagdiriwang ng Eid’l Fitr.

Ito ay matapos na ianunsiyo naman ng Grand Mufti ng Bangsamoro Darul Ifta nito ring Linggo na ang Eid’l Fitr commemoration ay magsisimula ngayong Lunes, Mayo 2.

Ang Eid’l Fitr ay isang Muslim holiday, kung saan nagpapahinga ng pag-aayuno para sa banal na buwan ng Ramadan, na nagsimula noong Abril 3.

Hinimok naman ni Bangsamoro Autonomous Region in Muslim Mindanao (BARMM) Chief Minister Ahod Ebrahim ang publiko na manatiling maging maingat at sumunod sa mga minimum public health standards sa panahon ng selebrasyon nito.

Mahigit 30, ‘di pa nakikita... Mga nawawalang sabungero, posibleng sinunog na – Duterte

ni Zel Fernandez | May 2, 2022

Kasunod ng balitang may mahigit 30 nawawalang sabungero ang hindi pa nahahahanap matapos ang kontrobersiya sa E-Sabong, hinala ni Pangulong Duterte ay tuluyan na umanong ‘pinatahimik’ ang mga ito.

Kasabay ng naging pagbisita ng pangulo sa San Fernando, Pampanga, para sa pagbubukas ng kauna-unahang OFW Hospital sa bansa, ibinahagi nito ang kanyang suspetsa na posibleng sinunog na umano ang mga katawan ng mga nawawalang sabungero sa bansa.

Pahayag pa ni Pangulong Duterte, sadya umanong mayroong mga pulis na sangkot sa pagkawala ng mahigit 30 sabungero na tukoy na umano sa mga ganu’ng istilo.

Kabilang umano rito ang harap-harapang pagpasok sa isang bahay upang dukutin ang kanilang subject, na naging diskarte na aniya ng ilang tiwaling law enforcement agents tulad ng ilang kapulisan ng PNP.

Samantala, hindi pa rin umano nalilihis ang espekulasyon na ang pananabotahe ng ilang mga sabungero ay nadiskubre ng mga sindikato na maaaring naging sanhi upang dakpin ang mga ito na hanggang ngayon ay wala pa ring ulat sa kinaroroonan o kung buhay pa nga ba ang mga biktima.