P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

Rizal, hinati na sa 3 distrito

ni Mary Gutierrez Almirañez | April 12, 2021

Inaprubahan na ni Pangulong Rodrigo Duterte ang batas na naghahati sa mga lalawigan ng Rizal sa tatlong distrito, batay sa pinirmahan niyang Republic Act 11533.

Nakasaad sa bagong batas ang mga sumusunod na hatian sa bawat distrito:

Second legislative district

• Cardona

• Baras

• Tanay

• Morong

• Jala-jala

• Pililia

• Teresa

Third legislative district

• San Mateo

Fourth legislative district

• Rodriguez

Paliwanag pa ni Senator Francis Tolentino, “The move aims to help the local government units involved to better respond to the needs of the people and also help facilitate in the long-term rehabilitation and the capacity building efforts of the province following this pandemic.”

Batay sa tala, mahigit 2.9 million ang populasyon sa Rizal, kung saan 449,103 ang nasa ikalawang distrito, habang 252,527 naman ang nasa ikatlong distrito, at 369,222 ang nasa ika-apat na distrito.

Sa ilalim ng konstitusyon, ang lungsod na may mahigit 250,000 na residente ay pinapayagang magkaroon ng isang representante sa House of Representatives.

Sa ngayon ay kabilang ang Rizal sa mga lugar na isinasailalim sa modified enhanced community quarantine (MECQ) dahil sa mataas na kaso ng COVID-19.

Ilang araw missing in action... P-Duterte, nag-jogging at nagmotor

ni Ronalyn Seminiano Reonico | April 10, 2021

Nag-upload si Senator Christopher “Bong” Go ng mga larawan at video ni Pangulong Rodrigo Duterte ngayong Sabado kaugnay ng tanong ng publiko kung nasaan ang pangulo gayundin ang pagkabahala ng ilang mamamayan sa kalusugan nito dahil sa hindi pagpapakita nitong mga nakaraang araw at pag-postpone ng kanyang regular briefing.

Saad ni Go sa kanyang Facebook post, "Mga kababayan ko, malungkot at mahirap ang maging Pangulo sa panahong ito. Suportahan natin si Tatay Digong, ang taong totoong nagmamahal."

Makikita sa mga larawan at video na nagdya-jogging si P-Duterte at may kuha rin na nakasakay siya sa motor habang naka-face mask at face shield.

Hindi naman binanggit ni Go kung kailan at saan kinunan ang mga naturang larawan.