'Pinas, pasok mag-host ng board ng climate disaster fund

ni Angela Fernando - Trainee @News | December 10, 2023

Nagpahayag si Environment Secretary Maria Antonia Yulo-Loyzaga na kwalipikado ang 'Pinas na mag-host ng board ng climate disaster fund na tinatawag na "Loss and Damage Fund" dahil ang bansa ay patunay ng mga epekto ng pabago-bagong klima.

Ito ay sinabi ni Loyzaga sa ika-28 na United Nations Framework Convention on Climate Change (COP28) na ginanap sa Dubai, kung saan ang bansa ay naghahangad na maging host ng board ng Loss and Damage Fund, at magkaroon din ng puwesto sa Board of the Fund.

Ani Loyzaga, gumawa na ang bansa ng mga aksyon gamit ang pagpapatupad ng mga inisyatiba upang bawasan ang emisyon sa pamamagitan ng pagpopondo sa mga yaman na pinagkukunan ng renewable na enerhiya, pagiging matibay sa harap ng mga kalamidad, pagpapalawak ng mga kasanayan at social protection, lalo para sa mahihirap, upang makamtan ang isang makatarunganang transisyon, at pagsasama-sama ng mga aspeto ng klima sa mga plano at badyet para sa pag-unlad.

Saad naman ng Philippine Department of Environment and Natural Resources (DENR), ang 'Pinas ay may layong itaguyod ang biodiversity at karagatan bilang pinagmumulan ng mga solusyong kalikasan sa krisis ng klima, at magsilbing pundasyon para sa pag-unlad.

Unang araw ng COP28, tagumpay makalikom ng pondo

ni Angela Fernando - Trainee @News | December 1, 2023

Tagumpay ang U.N. climate summit matapos ang pagsang-ayon ng mga delegado sa isang bagong pondo upang matulungan ang mga bansang mahirap sa harap ng mga seryosong kalamidad.

Pahayag ni COP28 President Sultan Ahmed al-Jaber, ang naging desisyon ay positibong senyales ng momentum sa mundo at sa kanilang gawain sa Dubai.

Binigyang-daan ng mga itinalaga ang mga pamahalaan upang ipahayag ang kanilang mga kontribusyon sa pagtatag ng pondo sa unang araw ng dalawang linggong forum.

Nagsimula ang serye ng mga maliit na pangakong pondo na inaasahang lalaki habang nagtatagal ang forum, kasama dito ang $100-milyon mula sa host na United Arab Emirates ng COP28, aabot sa $51-milyon mula sa Britanya, $17.5-milyon mula sa US, at $10-milyon galing sa Japan.

Nag-alok naman ang European Union ng $245.39-milyon, kabilang ang $100-milyon mula sa Germany.

P-BBM, 'di tuloy sa COP28 sa Dubai

ni Angela Fernando - Trainee @News | November 30, 2023

Ipinaalam ni Pangulong Ferdinand 'Bongbong' Marcos Jr. nitong Huwebes na hindi na siya dadalo sa UN Framework Convention on Climate Change (COP28) sa Dubai, United Arab Emirates.

Sinabi ni Marcos sa kanyang post sa 'X' na ipinagkatiwala na niya kay Environment Secretary Ma. Antonio Yulo-Loyzaga ang pamumuno sa Philippine delegation para sa COP28 bilang kanyang kapalit.

Matatandaang binigyang-diin ng Pangulo ang kahalagahan ng COP28 dahil ang Pinas ay isa sa mga bansang sentro ng epekto ng pagbabago ng klima.

Sa kabilang banda, pagtutuunan muna ni Marcos ang isang pagpupulong para masolusyunan ang sitwasyon ng 17 Pinoy seafarers sa na kasalukuyang bihag sa Red Sea at masiguro ang kanilang kaligtasan.