P600 M suportang pangkabuhayan para sa maliliit na negosyo — DTI

ni Lolet Abania | March 30, 2022

Target ng Department of Trade and Industry (DTI) na maglabas ng P600-milyong halaga ng suportang pagkabuhayan para sa mga maliliit na negosyo at kumpanya, subalit nangangailangan ito ng exemption mula sa election ban patungkol sa spending o paggastos.

Ayon kay Department of Trade and Industry (DTI) Secretary Ramon Lopez, layon ng ahensiya na magbigay ng 105,394 livelihood kits, kabilang dito ang 1,500 benepisyaryo para sa bawat rehiyon sa Abril, Mayo, at Hunyo, na nakatumbas ng 300 hanggang 400 livelihood kits kada probinsiya.

Gayunman, binanggit ni Lopez na nananatili pa ito sa deliberasyon dahil sa election ban kaugnay sa tinatawag na public spending para sa imprastruktura at iba pang proyekto na ipinatutupad ng Commission on Elections (Comelec).

“Importante ho na makakuha tayo ng Comelec exemption. Importante ho ngayong kailangan ng tao ng kabuhayan lalo na dahil sa pandemya kaya kailangan po mapagpatuloy natin ito,” pahayag ni Lopez sa isang report sa Talk to the People ni Pangulong Rodrigo Duterte na ipinalabas ngayong Miyerkules.

Una nang sinabi ng DTI na 10% ng mga MSMEs (micro,-small,-and medium-sized enterprises) ay napilitang magsara noong Hunyo 2021.

Halos kasing taas ito sa 52.66% na naitala noong Mayo 2020, sa panahon ng pagdami ng mga isinasagawang quarantine restrictions. Batay sa DTI, “micro enterprises are defined as those with total assets worth less than P50,000; cottage enterprises with assets worth P50,001 to P500,000; small with P500,001 to P5 million; and medium from over P5 million to P20 million.”

Ayon naman kay Lopez, nakikipag-ugnayan na ang DTI sa Comelec para sa exemption application, kung saan nakaiskedyul ang pagre-release ng mga ito ngayong linggo – sa Cebu sa Huwebes, Marso 31, at sa Laguna sa Biyernes, Abril 1.

33 pangunahing bilihin, isinailalim sa price increase request list – DTI

ni Lolet Abania | March 27, 2022

Umabot sa kabuuang 33 ng basic necessities and prime commodities (BNPC) ang nakabilang sa tinatawag na price increase request list dahil na rin sa sunud-sunod na pagtaas sa presyo ng langis sanhi ng labanan sa pagitan ng Ukraine at Russia, ayon sa Department of Trade and Industry (DTI) ngayong Linggo.

Sa isang radio interview kay DTI Secretary Ramon Lopez hinggil sa epekto ng Ukraine-Russia war, sinabi nito, “Meron na hong mga paggalaw, nakita naman natin. Actually ‘yung hindi covered ng BNPC, nai-report sa atin sa grocery stores at supermarkets, may mga pagtaas din.”

“’Yung covered ng BNPC, mula naman nung nag-umpisa itong giyera, wala pang adjustment. Actually may nag-submit ng request ng adjustment at ‘yun ‘yung pinag-aaralan nga ng DTI. I think mga around 33 products,” dagdag ng opisyal.

Ayon kay Lopez, ilan sa mga naturang 33 produkto na napabilang sa listahan ng hiling na taas-presyo ay gatas, at canned goods gaya ng sardines at meatloaf.

Sa ngayon ay tinitingnan na ang mga ito ng Consumer Protection Group ng DTI upang madetermina ang magiging cost adjustments nito.

Noong Enero 2022, nagbigay ang DTI ng updated na suggested retail prices (SRP) para sa BNPCs gaya ng canned goods at iba pang produktong pagkain, bottled water, dairy, at karaniwang gamit sa bahay o kitchen supplies.

“Hindi naman natin tinatanggal itong SRP system natin para gabay ito doon lalo na sa basic necessities and prime commodities. Ibig sabihin, mino-monitor ito. Ito ‘yung bago maka-increase ‘yung manufacturers, dumadaan muna sa DTI para kung papayagan kung gaano kalaki lang ang pwede,” paliwanag ni Lopez.

Una nang sinabi ni DTI Assistant Secretary Ann Cabochan na ang ahensiya aniya, “is not keen on implementing a price freeze on basic necessities as Republic Act No. 7581 or the Price Act has mechanisms in place for mandating so.”

Work from home, optional na sa Alert Level 1 – DTI

ni Lolet Abania | February 28, 2022

Magiging optional na ang work-from-home arrangement sa mga lugar na isasailalim sa Alert Level 1 sa susunod na buwan dahil na rin sa bumubuting sitwasyon ng COVID-19 sa bansa, ayon sa Department of Trade and Industry (DTI).

Sa isang interview ngayong Lunes kay DTI Secretary Ramon Lopez, sinabi nitong hinihikayat na ang pagkakaroon ng mga onsite work sa ilalim ng Alert Level 1.

“Ie-encourage ‘yung onsite work [under Alert Level 1], ibig sabihin less na ‘yung work from home, magiging optional na ‘yung work from home,” sabi ni Lopez.

Asahan na mangyari ito para aniya, lumakas ang mga negosyo, gaya ng mga stores at restaurants dahil sa marami na ring tao ang lalabas ng kanilang mga bahay.

“Ang maganda dito kapag pumapasok na uli ‘yung mga tao physically, nabubuhay ‘yung mga restaurants at ‘yung mga tindahan, ‘yung mga stores, kasi nasa labas ‘yung mga tao at wala na sa bahay,” paliwanag ni Lopez.

Una nang inanunsiyo ng gobyerno nitong weekend na isasailalim ang National Capital Region (NCR) at marami pang lugar sa bansa sa Alert Level 1 mula Marso 1 hanggang 15, 2022.

Ayon kay Lopez, sa ilalim ng Alert Level 1, lahat ng establisimyento, mga tao, o aktibidad ay pinapayagan nang mag-operate ng 100% capacity. Gayunman, ang vaccination requirement ay mananatili para sa indoor activities.

“Magbubukas ang ekonomiya but less ang restrictions,” ani opisyal.

Sinabi pa ni Lopez na ang requirements para sa intrazonal at interzonal travels ay mababawasan na rin.

“Wala na ‘yung requirement na RT-PCR [test], ‘yung mga PNP clearance. Pero malaking bagay pa rin ‘yung vaccination card,” saad pa ni Lopez.