Taas-SRP sa 82 basic goods, aprub na sa DTI

ni Lolet Abania | May 13, 2022

Naglabas ang Department of Trade and Industry (DTI) ng updated na listahan ng suggested retail prices (SRP) ng mga pangunahing bilihin at iba pang pangangailangan, habang inaprubahan ang taas-presyo nito para sa 82 items.

Sa isang statement ngayong Biyernes, sinabi ng DTI na mula sa 218 stock keeping units (SKUs) sa retail price guide list, 62% o 136 items ay pinanatili ang kanilang kasalukuyang price levels na umiiral simula pa Enero ngayong taon.

Ayon sa DTI, aprubado na ang “minimum increase” para naman sa natitirang 38% o 82 SKUs, sa pinakabagong SRP list.

Kabilang sa mga produktong inaprubahan para sa SRP hikes ay tinapay, canned fish, potable water na nasa mga bottles at containers, processed milk, locally manufactured instant noodles, kape, asin, laundry soap, detergent, mga kandila, flour, processed at canned pork, processed at canned beef, suka, patis, toyo, toilet soap, at batteries.

Ayon pa sa DTI, ang halaga ng 71 mula sa 82 SKUs ay nagdagdag ng kanilang presyo mula 2% hanggang 10%.

Gayunman, giit ng DTI ang naturang price increase ay mas mababa pa rin kumpara sa global price movement ng mga raw materials.

“To illustrate, the prices of major raw materials like tamban (for canned fish products), mechanically deboned meat (for processed meat products), buttermilk (for processed milk), and palm oil (for toilet paper and instant noodles) increased by 0.56% to 32.14%. Additionally, fuel prices went up by 28.84%,” pahayag ng DTI.

Binanggit naman ng DTI na ang price guide ay maaaring ma-access ng publiko sa DTI website.

“The Department carefully evaluates the requests for price adjustments from the manufacturers of BNPCs under the DTI’s jurisdiction. It is imperative that the DTI and the industry collaborate to ensure the consumers of high-quality products at affordable prices,” saad ni DTI Secretary Ramon Lopez.

“Despite the adjustments in several basic and prime goods, the DTI assures the public that all increases in the SRPs were kept to a minimum level to provide consumers with reasonably-priced goods amidst the pandemic,” dagdag ni DTI Undersecretary Ruth Castelo.

Kasunod ng pagtaas ng produktong petrolyo… Taas-presyo sa bilihin, hirit ng mga manufacturers

ni Zel Fernandez | April 20, 2022

Nagbabadyang magmahal ang mga bilihin matapos humirit ng taas-presyo sa kanilang produkto ang ilang mga manufacturers.

Ayon sa DTI, aabot sa ₱1-₱3 ang taas-presyong hinihiling ng mga manufacturers sa ilang mga pangunahing produkto na kinakailangang paghandaan ng bulsa ng mga mamimili.

Matatandaang nitong nakaraang Enero lamang ay 73 produkto na sakop ng suggested retail price (SRP) ang nagtaas-presyo, ngunit panibagong taas-presyo na naman sa ilan pang mga bilihin ang inihihirit ng mga manufacturers.

Humigit-kumulang 30 centavos ang hinihingi ng ilang kumpanya ng instant noodles at kape, ₱1.25-₱3 ang hirit na dagdag-presyo sa asin, ₱1-₱2 sa ebaporada at kondensadang gatas, habang ₱1 sa mga de-latang sardinas at ₱1-₱3 naman sa mga de-latang karne.

Tinukoy na sanhi nito ang mataas na presyo ng produktong petrolyo, raw materials at packaging na ikinalulugi umano ng ilang mga kumpanya ng mga pangunahing bilihin.

Pinag-aaralan naman ng Department of Trade and Industry ang mga hirit na umento sa mga nabanggit na produkto, ngunit makikiusap pa rin ang ahensiya na babaan pa ang hinihinging taas-presyo bilang konsiderasyon sa kakayahan ng mga konsiyumer.

Gayunman, nilinaw ni DTI Usec. Ruth Castelo, nililimitahan pa rin aniya ng ahensiya ang price movement ng mga bilihin upang hindi maging pahirap sa mga mamimili ang dagdag-singil sa mga bilihin sa merkado.

Sa ngayon, wala pang inaaprubahang dagdag-presyo ang DTI sa mga pangunahing bilihin na sakop ng suggested retail price (SRP).

BOC, DA at DTI, joint force… Smuggled carrots, nasabat sa Divisoria

ni Zel Fernandez | April 20, 2022

Sampung kahon ng smuggled na carrots ang nasabat sa pag-iinspeksiyon ng mga operatiba sa Divisoria, kagabi.

Tinatayang aabot sa halagang ₱8,000 ang mga smuggled carrots na nakumpiska ng Bureau of Customs, kasunod ng isinagawa nitong joint operations kasama ang Department of Agriculture at Department of Trade and Industry sa mga natitinda ng agricultural products sa Divisoria.

Sa mas pinaigting pang kampanya laban sa smuggling, ipinaliwanag ng DA na matagal na nilang tinututukan ang mga nagpupuslit ng mga imported agricultural products upang matulungan ang mga lokal na magsasakang nahihirapang makapagbenta ng kanilang mga aning gulay dahil sa matinding kumpetensiya sa merkado dulot ng mga imported goods.

“Marami na kaming nahuli sa pantalan hanggang dito sa second border. ‘Pag sinabi nating second border, du’n na sa mga cold storage mismo, sinusuyod natin ang mga cold storage,” pahayag ni Serapio Garabiles, Jr., inspection officer ng Department of Agriculture.

Ayon sa BOC, ipinupuslit umano ang mga imported na gulay kasama ng mga aprubadong produkto kaya minsan ay nakalulusot ito sa inspeksiyon sa mga pantalan.

Babala pa ng DA at BOC, hindi sila titigil sa pagsawata sa mga iligal na nagpupuslit ng mga gulay sa bansa upang higit pang maprotektahan ang mga lokal na magsasaka at mga mamimili, “tandaan ninyo ‘yan pati ang mga smuggler inaalam na namin. Dalawang beses na kaming nag-operate sa palengke, pagbibigay ‘to ng warning na hindi kami titigil. Ang pangatlong operation namin may kulong na”, ani Garabiles.

Dagdag naman ni Chief Alvin Enciso, MICP Customs Intelligence and Investigation Service, “pwede ho kayong tumakbo pero hahabulin at hahabulin po namin kayo. Sayang lang ho ‘yung gagastusin n’yo para mailabas. Pagdating mo sa mga palengke, sa mga warehouses, hahabulin pa rin ho namin ‘yon”.

Sasampahan sana ng kaso ang mga mahuhuling may-ari ng mga kumpiskadong produkto ngunit wala nang umangkin sa mga ito.