P180B, nawala sa ekonomiya sa 2-week ECQ — DTI

ni Ronalyn Seminiano Reonico | April 15, 2021

Tinatayang aabot sa P180 billion ang nawala sa ekonomiya ng bansa dahil sa ipinatupad na dalawang linggong enhanced community quarantine (ECQ), ayon sa Department of Trade and Industry (DTI).

Pahayag ni DTI Secretary Ramon Lopez, “Doon sa nawala sa ekonomiya, ang estimate po for the two weeks ay around 1 percent ng ating GDP. ‘Yung 1 percent na ‘yon, kung tayo ay may GDP ng mga P18 trillion, 1 percent ay P180 billion po ang estimate na nawala sa ating ekonomiya.”

Isinailalim sa ECQ ang NCR Plus o ang Metro Manila, Bulacan, Cavite, Laguna at Rizal simula noong March 29 hanggang April 11 kung saan ipinagbawal ang operasyon ng ilang establisimyento at noong April 12, ipinatupad ang mas maluwag na quarantine classification na modified ECQ.

DTI Sec. Ramon Lopez, nagka-Covid ulit

ni Mary Gutierrez Almirañez | March 18, 2021

Nagpositibo muli sa COVID-19 si Department of Trade and Industry (DTI) Secretary Ramon Lopez, ayon sa ipinarating niyang text message ngayong umaga, Marso 18.

Aniya, “I regret to inform you I tested positive again. Got the result just this morning. I am asymptomatic. I will have another test later to confirm. Hoping false positive.”

Kilala si Lopez sa mga adbokasiya niya pagdating sa ekonomiya at isa rin siya sa mga namamahala hinggil sa muling pagbubukas ng ekonomiya sa kabila ng patuloy na paglaganap ng COVID-19 sa bansa.

“Been wearing a mask and shield and distancing outside home but still got hit,” dagdag pa niya. Nauna nang iniulat na nagpositibo rin sa naturang virus sina Interior Secretary Eduardo Año, Education Secretary Leonor Briones at Public Works Secretary Mark Villar, na pare-parehong magaling na.

Sa ngayon ay isinasailalim na si Lopez sa isolation. Matatandaang Disyembre noong nakaraang taon nang una siyang magpositibo sa virus.

Sinehan, bubuksan na sa Marso 5

ni Mary Gutierrez Almirañez | March 2, 2021

Pinapayagan nang muling magbukas ang mga sinehan simula sa ika-5 ng Marso, alinsunod sa kautusan ng Department of Trade and Industry.

Ayon kay DTI Secretary Ramon Lopez, dahan-dahang papayagan sa ilalim ng general community quarantine (GCQ) ang ilang negosyo na inilipat bilang category 3 mula sa category 4, katulad ng driving schools, sinehan at museums.

Aniya, sa ilalim ng GCQ ay pinapayagan nang mag-operate sa maximum na 25% capacity ang mga tradisyunal na sinehan habang 50% capacity sa mga lugar na nasa ilalim ng MGCQ.

Samantala, ang mga social event naman ay pinapayagan hanggang 30% capacity sa ilalim ng GCQ at 50% sa MGCQ areas.

Pinapayagan na ring i-operate hanggang 50% capacity ang mga library, museum, cultural centers, meeting at conventions, limited tourist attractions, at videogame arcades na nasa GCQ at 75% sa mga nasa MGCQ areas.

Dagdag pa niya, ito ang magsisilbing gabay sa pagbubukas ng ilang negosyo na nasa ilalim ng general community quarantine (GCQ) at modified general community quarantine (MGCQ).

Matapos mailathala at maihain sa UP Law Center ay magiging epektibo na ang bagong memorandum.