43K establisimyento, binigyan ng safety seals – DTI, DOH

ni Lolet Abania | October 5, 2021

Nasa kabuuang 43,332 pampubliko at pribadong establisimyento ang naisyuhan na ng safety seal certifications sa buong bansa, ayon sa national agencies ngayong Martes.

Sa isang joint statement, hinimok ni Department of Trade and Industry (DTI) Secretary Ramon Lopez ang iba pang mga negosyo na i-adopt na rin ang naturang seal bilang bahagi ng paglaban ng industriya sa COVID-19.

Ang safety seal ay patunay na ang isang establisimyento ay sumusunod sa minimum public health standards kontra-COVID-19.

“Businesses can do their share in the fight against the pandemic and create a healthy space for consumers to transact their purchases and for employees to gainfully and safely earn a living,” ani Lopez.

Sa kasalukuyan, nakatanggap ang Safety Seal Technical Working Group ng 85,731 aplikasyon, kung saan 43,332 applications ang naaprubahan na habang ang 9,858 applications, ilan dito ay denied o ini-refer sa naaangkop na ahensiya.

Ang natitira namang aplikasyon ay patuloy pang iniinspeksyon.

Para sa mga establisimyento na naghahangad na mag-apply para sa safety seal, kinakailangang i-adopt ang StaySafe.PH o anumang local government unit (LGU)-mandated digital contact tracing application at magpatupad ng minimum health standards laban sa virus.

“The implementation of the Safety Seal Program is a very laudable initiative that highly reinforces our country’s response to combat COVID-19,” ayon kay Department of Health (DOH) Secretary Francisco Duque III said.

“As we gradually reopen our economy, it is important to ensure that our people are safe, and adherence to Minimum Public Health Standards is one vital key to this aspect,” dagdag pa ni Duque.

Pagbubukas uli ng gym, inihirit ng DTI

ni Lolet Abania | September 26, 2021

Hiniling ni Department of Trade and Industry (DTI) Secretary Ramon Lopez sa pamahalaan na muling buksan ang mga gym sa ilalim ng ipinatutupad na alert level systems sa bansa.

Sa kasalukuyan, ang Metro Manila ay isinailalim sa Alert Level 4 simula noong Setyembre 16 hanggang 30.

Sa nasabing alert level system, pinapayagan lamang na mag-operate ang mga restaurants at salons sa limitadong kapasidad.

Samantala, ipinahayag ni Lopez na iminungkahi na ng ahensiya sa Inter-Agency Task Force for the Management of Emerging Infectious Diseases (IATF) na payagan na ang muling pagbubukas ng mga gym na mayroong 10% capacity.

“’Yung susunod po nating ipapa-allow, dahil sa prinsipyo ng exercise, ay ‘yung gym.

Pinag-iisapan ‘yan. ‘Yung exercise kasi nakakataas ng immunity,” paliwanag ni Lopez sa isang interview ngayong Linggo.

Sinabi pa ng kalihim na ni-require na nila sa mga gym ng paglalagay ng mga air purifiers.

Gym owners, umapela sa DTI na payagan na silang magbalik-operasyon

ni Jasmin Joy Evangelista | September 19, 2021

Magkakaroon nb pagpupulong ang Department of Trade and Industry (DTI) sa mga gym owner para pag-usapan ang mga gagawing health protocols oras na payagan ang pagbubukas ng mga ito.

Ito ay sa gitna ng mga apela ng Philippine Fitness Alliance (PFA) na payagan na silang magbukas sa ilalim ng bagong quarantine system.

"Magsu-suggest sila ng extra safety protocol. Titingnan ho natin. Hindi po natin mapapangako sa ngayon dahil pilot test pa lang sa ngayon," ani Trade Secretary Ramon Lopez.

Sa ngayon ay nasa alert level 4 ang buong NCR sa pilot implementation ng alert level classification system.

Hirit naman ni Lopez, kung maaari raw ay gawin nang outdoor ang setup ng mga gym lalo't karamihan ay indoor at madalas maghiraman ng kagamitan ang mga gumagamit nito.

"'Yung sa gym po, indoor siya. Hindi po kasingdami ang empleyado, marami lang ho ang customer at ang isa pang delikado sa gym ay siyempre 'yung paghinga nang malalim, siyempre 'yung pag-exercise at pag-share ng equipment," ani Lopez.

"Ang bagong business model kung puwede ho, outdoor. Gumawa tayo ng location na kung puwede mas may free air flow, iyon po ay mas safe po sa ating lahat sa mga customer at workers," dagdag niya.

Samantala, iginiit naman ng PFA na wala silang naitalang on-site transmission sa mga gym at fitness center sa ngayon at paulit-ulit anila nilang pinaaalalahanan ang mga miyembro nila na sumunod sa health protocols.