Rider na tulak, huli sa akto

ni Maeng Santos @News | September 26, 2026

Photo: Ang motorsikoo ng umano'y rider na tulak, arestado sa P374,000, buy-bust money - PNP Valenzuela City Police Station

Isang rider na sangkot umano sa pagtutulak ng droga ang naaresto sa buy-bust operation sa Valenzuela City, Biyernes ng madaling-araw.

Sa ulat kay NPD Director P/BGen. Benliner Capili, sinabi ni Valenzuela Police Chief P/Col. Joseph Talento na naaresto ng Station Drug Enforcement Unit ang suspek na si alyas Moymoy, 28, ng Brgy. Wawang Polo, sa Kabesang Imo St. corner Langka St., Brgy. Balangkas.

Isinagawa ang operasyon sa pangunguna ni PLt. Sherwin Dascil, katuwang ang PDEA, matapos makatanggap ng impormasyon hinggil sa umano’y pagbebenta ng suspek ng shabu.

Naaresto si Moymoy matapos umanong bentahan ng P8,500 halaga ng shabu ang isang pulis na nagpanggap na buyer alas-3:30 ng madaling-araw.

Ayon kay SDEU investigator PSSg. Cris Paul Collo, nakuha sa suspek ang nasa 55 gramo ng hinihinalang shabu na nagkakahalaga ng P374,000, buy-bust money, sling bag, P150 cash at motorsiklong ginagamit umano sa pagde-deliver ng droga.

Delivery rider, tiklo sa P1.7M shabu

ni Maeng Santos @News | August 20, 2026

Photo: PNP-NCRPO

Mahigit P1.7 milyong halaga ng shabu ang nasamsam sa dalawang hinihinalang high‑value drug personalities nang matimbog sa buy‑bust operation sa Caloocan City, Martes ng gabi.

Mahaharap sa kasong paglabag sa Comprehensive Dangerous Drugs Act of 2002 ang mga suspek na isang 24-anyos na lalaking courier rider at 26-anyos na babaeng make-up artist.

Ikinasa ng mga tauhan ni Caloocan Police Chief P/Col. Joey Goforth ang buy-bust operation sa koordinasyon sa PDEA, kasunod ng natanggap na impormasyon ng mga operatiba ng Station Drug Enforcement Unit hinggil sa umano’y illegal drug activities ng mga suspek.

Nang matanggap ang signal mula sa isa nilang kasama na nagpanggap na poseur-buyer na hudyat na positibo na ang transaksyon, agad lumusob ang mga operatiba ng SDEU sa pangunguna ni PLt. Restie Mables at inaresto ang mga suspek alas-10:19 ng gabi sa loob ng isang housing project sa Brgy. 188.

Sa ulat ni NPD Acting Director P/BGen. Benliner Capili kay NCRPO Regional Director PMGEN Anthony Aberin, nakuha sa mga suspek ang 252.2 grams ng suspected shabu na nagkakahalaga ng P1,714,960 at buy-bust money.

2 estudyante arestado sa P1.12 M ilegal na droga

ni Lolet Abania | September 24, 2021

Inaresto ang dalawang college student matapos na makuhanan ng hinihinalang shabu at marijuana na mahigit sa P1 milyon ang halaga sa isang buy-bust operation ng pulisya sa Barangay Damayan, Quezon City.

Umabot sa 150 gramo ng umano’y shabu na nagkakahalaga ng mahigit sa P1 milyon ang nakumpiska ng mga awtoridad mula sa mga suspek.

Paliwanag ng 19-anyos na suspek, sumusunod lamang umano siya sa iniuutos sa kanya na i-deliver ang mga hinihinalang shabu kapalit ng cash na P300 hanggang P500.

Subalit inamin nitong nagawa na niya ito noon ng limang beses.

Isa pang college student ang dinakip matapos na makuhanan naman ng 1 kilo ng marijuana na may street value na P120,000.

Inamin din ng suspek na sumusunod lamang umano siya sa instructions na i-deliver ang naturang ilegal na droga.

Ayon sa isang opisyal ng barangay ang mga suspek ay hindi residente sa lugar at maaaring doon lamang sila sinabihang magkikita.

Nahaharap ang mga suspek sa reklamo na may kaugnayan sa paglabag sa provisions ng Comprehensive Dangerous Drugs Act of 2002.