1.36-M halaga ng shabu, timbog

ni Zel Fernandez | April 22, 2022

Sa isinagawang buy-bust operation ng mga operatiba sa Tondo, Maynila noong Martes, Abril 19, kalaboso ang isang drug suspek matapos mahulihan ng P1.36 milyong halaga ng shabu.

Sa pinagsanib-puwersang pagkilos ng mga operatiba mula sa SOU NCR, PNP DEG, kasama ang SDEU PS2, CIDU DDEU MPD, RID/RDEU/RSOG NCRPO, and PDEA NCR, sinalakay ang Barangay 4 at naaresto ng mga awtoridad ang 47-anyos na drug suspek na kinilalang si Maria Mustapha KAMILAN.

Kasunod ng matagumpay na pagkakaaresto sa sindikato ng ipinagbabawal na gamot, nagpahayag ng papuri at pagbati si PNP Chief General Dionardo Carlos sa mga awtoridad na naging bahagi ng isinagawang operasyon kontra-droga.

“We continue our efforts to monitor the production and trafficking of these illegal substances. Thus, the series of operation resulting to the arrest of drug suspects. Congratulations to our operating teams,” aniya.

Nahaharap naman sa kasong paglabag ng Republic Act No. 9165 o ang Comprehensive Dangerous Drugs Act of 2002 ang suspek.

P300K shabu sa bola ng basketball, buking sa kulungan sa Davao

ni Lolet Abania | June 29, 2021

Kinumpirma ng Bureau of Jail Management and Penology Region XI (BJMP XI) na shabu ang nasa loob ng bola ng basketball na natagpuan sa compound ng Davao City Jail sa Male Dormitory.

Sa isang pahayag ng pamunuan ng BJMP XI, nakasamsam sila ng nasa 21 gramo ng hinihinalang shabu na nakabalot sa mga sachets na nasa loob ng bola ng basketball na tinatayang P300,000 ang halaga.

Sa ulat, habang nagsasagawa ng regular jail activity noong Sabado, narinig ng duty searchers ang malakas na kalabog ng bola mula sa bubong ng jail facility.

Gumulong pa ito sa bubong saka bumagsak malapit sa searching area. Lumalabas na punit ang naturang bola ng basketball, kung saan may laman sa loob nito habang dinikitan ng electrical tape ang bahaging may punit.

Sa naging instruction ng warden, agad na ininspeksiyon ng officer na naka-duty ang bola at nadiskubre ang 6 na sachets ng puting crystalline substance na nakumpirmang methamphetamine o shabu.

Ayon sa BJMP XI, hinihinalang ang bola ay ibinato mula sa bakanteng lote sa kabilang bahagi ng konkretong pader sa harap ng dormitory, subalit sumabit ito sa net na sadyang inilagay para maharang ang katulad na taktika.

Gayunman, ang insidente ay nai-report na sa Philippine Drug Enforcement Agency (PDEA) para sa kaukulang beripikasyon at tagging, habang nai-turnover na rin sa kanilang kustodiya ang hinihinalang shabu.

Patuloy namang iniimbestigahan ng BJMP XI ang sinumang lumabag at tumanggap ng naturang items.

Sa nangyaring insidente, mas pinaigting na ng BJMP ang mga security measures habang agad na aarestuhin ang mahuhuling magpupuslit ng anumang kontrabando sa loob ng jail facility.

“The BJMP will continue to be vigilant in securing our facilities to assure that all Persons Deprived of Liberty under our care will be detained according to the standards set about by the laws,” sabi pa ng BJMP.

P25.8-M marijuana plants, sinunog sa Kalinga

ni Lolet Abania | June 13, 2021

Aabot sa P25.8 milyong halaga ng marijuana plant ang natagpuan at sinunog ng mga awtoridad sa bayan ng Tinglayan, Kalinga.

Nagkasa ang mga operatiba ng Cordillera region police ng dalawang araw na operasyon, kung saan natagpuan nila ang limang marijuana plantation site sa Tinglayan.

Ayon sa mga awtoridad, nakatanggap sila ng intelligence report na may malaking marijuana plantation sa bulubunduking bahagi ng naturang bayan, kaya agad na nagsagawa ng surveillance nitong Biyernes at Sabado.

Nasa kabuuang 152,000 full-grown marijuana plants ang nakuha ng mga pulis na nagkakahalaga ng P25.8 milyon, habang sinunog din ang mga ito.