May mga bitak sa pader at concrete ng flyover... Nagtahan Bridge, isasara — MMDA

ni Lolet Abania | October 12, 2021

Nakatakdang isara ang southbound lane ng Nagtahan Bridge sa Manila para sa gagawing rehabilitation at repairs nito, ayon sa Metropolitan Manila Development Authority (MMDA) ngayong Martes.

Sa isang press briefing, ipinakita ni MMDA Chairman Benhur Abalos ang mga larawan ng mga crack o bitak na matatagpuan sa mga pader at concrete ng southbound ng flyover.

“The reason why we are showing you this dahil alam kong maraming motorists ang magiging inconvenienced sa mangyayari, mata-traffic. Pero please tingnan niyo naman ‘yung danger: delikado naman ito, ang laki ng crack na ito, baka bumigay ang ating tulay,” paliwanag ni Abalos.

Noong Pebrero, ang Department of Public Works and Highways (DPWH) ay nakakita na rin ng maraming bitak sa wingwall, sa concrete pedestal ng steel railings, at sa circular joint jackets ng flyover.

Ang Nagtahan flyover ay kabilang sa listahan ng DPWH na mga tulay sa Metro Manila na kailangan nang i-repair.

Ayon pa kay Abalos, ngayong buwan sisimulan ang rehabilitasyon at repairs ng naturang tulay habang inaasahang makukumpleto ito sa Abril 2022.

“The southbound lane [will be closed] up to April [next year] but for the meantime the northbound lane will be open but it is still undergoing repair maski na open siya,” sabi ni Abalos.

12 mins biyahe na lang... BGC-Ortigas Center Road Link, bubuksan na – DPWH

ni Lolet Abania | September 24, 2021

Target nang buksan ng Department of Public Works and Highways (DPWH) simula Oktubre 1, 2021, ang two-way, one-lane viaduct project na nasa Lawton Avenue, Makati City na direktang patungo sa 8th Avenue ng Bonifacio Global City (BGC) sa Taguig City para magamit na ng mga motorista.

“We’re excited that the Lawton Avenue to Global City viaduct section of the BGC-Ortigas Center Road Link Project will potentially be delivered to completion this September 30,” ani DPWH Secretary Mark Villar.

Nakumpletong gawin ang naturang bahagi ng BGC-Ortigas Center Road Link Project tatlong buwan matapos na buksan ng DPWH ang portion na kumukonekta sa lungsod ng Pasig at Mandaluyong patungong Kalayaan Avenue sa Makati via Sta. Monica-Lawton Bridge noong Hunyo 12, 2021.

Sinabi pa ni Villar, “Only a few more days, we are closer to our goal of cutting travel time between Bonifacio Global City and Ortigas Center to only 12 minutes.”

Ayon pa sa DPWH, base sa inspection report ni Unified Project Management Office (UPMO) Operations Undersecretary Emil Sadain, concrete-paved na ang approach 3 sa 8th Avenue na mayroong parapet wall sa magkabilang gilid, kasunod nito ang accelerated construction works ng joint venture contractor na Persan Construction Inc. at ng Sino Road and Bridge Group Co. Ltd. na aniya, “just in time for the planned inauguration this end of the month.”

“With the substantial completion of the median barrier, asphalt overlay of the viaduct ramp is anticipated by this weekend to be followed by the pavement marking and light post installation,” ayon kay Sadain.

Sinabi rin ng ahensiya na mahalaga ang 565-meter Lawton Avenue-Global City Viaduct dahil ito ang mag-uugnay sa dati nang nadaraanang Kalayaan Bridge na kilala rin bilang Sta. Monica-Lawton Bridge na nagli-link sa Pasig City at Makati City sa kahabaan ng Pasig River.

Ang viaduct at Kalayaan Bridge ay isinagawa bilang bahagi ng kabuuang 1.481-kilometer alignment ng P1.79-billion BGC-Ortigas Center Road Link Project.

Kabilang din sa konstruksiyon ng BGC-Ortigas Center Road Link Project ang kinakailangang improvement naman ng 362-meter Brixton Street (corner Reliance Street) patungong Fairlane Street at Pasig/Mandaluyong side para mas marami pang madaraanan ang mga motorista.

Ang BGC-Ortigas Center Link Road Project ay isa sa mga pangunahing Build, Build, Build na isinasagawa para matulungan ang EDSA Decongestion Program ng gobyerno na layong mapabuti ang sitwasyon ng trapiko sa nasabing lugar at iba pang pangunahing daan sa Metro Manila.

EDSA, luluwag na simula sa June 12 — Sec. Villar

ni Lolet Abania | May 19, 2021

Magiging mabilis na ang biyahe ng mga motorista sa dalawang pangunahing business centers mula sa dating isang oras ay magiging limang minuto na lang kapag natapos na ang proyektong Bonifacio Global City-Ortigas Center Link Road, ayon kay Department of Public Works and Highways (DPWH) Secretary Mark Villar.

Ito ang naging pahayag ni Villar, kasabay ng kanyang anunsiyo na ang link road project ay bahagyang bubuksan sa pagdiriwang ng bansa ng Independence Day sa Hunyo 12.

“We are connecting two cities, we are connecting two major centers. Kung dati, ang biyahe, puwedeng umabot nang isang oras, baka mga 5 minutes na lang from Ortigas to Makati or Taguig,” ani Villar sa isang interview ngayong Miyerkules.

Ayon sa kalihim, bahagi ito ng plano ng pamahalaan para maibsan ang matinding trapiko sa EDSA kaya isinagawa ang road project. Aniya, asahan na mababawasan ang traffic sa EDSA ng 20% hanggang 25%. Gayundin, ang traffic sa C5 ay mababawasan ng 10% kapag tapos na tapos na ang proyekto.

“We plan to open the main span by Independence Day that is June 12. Once finished, it will significantly decongest EDSA,” sabi ni Villar. Ang 1.367-kilometer Bonifacio Global City-Ortigas Center Link Road project ay bahagi ng proyekto ng Metro Manila Logistics Network na layong mabawasan ang tinatawag na one-hour-long drive sa pagitan ng BGC at Ortigas business districts ng 12 minutong biyahe lamang.

Target din aniya na makumpleto nang husto ang buong proyekto sa September 2021, kung saan mas madali na ang pagbibiyahe at pagpunta sa mga lungsod gaya ng Pasig, Mandaluyong, Taguig at Makati habang maiiwasan pa ng mga motorista ang masikip na daloy ng trapiko sa EDSA at C-5.

Ayon pa kay Villar, ang Estrella-Pantaleon bridge naman ay madaraanan na rin ilang linggo matapos ang pagbubukas ng BGC-Ortigas Link.