San Pablo-Lucena route ng PNR, balik-operasyon sa Mayo

ni Lolet Abania | February 15, 2022

Pinag-iisipan na ng Philippine National Railways (PNR) na muling buksan ang kanilang San Pablo, Laguna hanggang Lucena, Quezon route sa Mayo matapos ang halos walong taong tigil-operasyon nito.

Nagsagawa naman si Department of Transportation (DOTr) Secretary Arthur Tugade ng inspeksyon sa ruta ng San Pablo-Lucena ng PNR.

Ayon kay Tugade, ang pagbubukas uli ng nasabing ruta ay hindi lamang maili-link ang PNR sa Bicol network, ito rin aniya, “unlock economic potentials and enhance mobility in Southern Luzon.”

Binanggit din ni Tugade na bukod sa ginagamit ito bilang passenger commuter service, ang PNR Lucena-San Pablo route ay maaari ring i-convert sa isang commercial o cargo freight service.

Sinabi naman ni PNR assistant general manager at spokesperson Ces Lauta, nang tanungin ito kung kailan bubuksan muli ang ruta, “Not later than May 2022.”

Halos isang dekada na hindi operational ang PNR San Pablo-Lucena route na may 44-kilometer inter-provincial commuter railway, kung saan bahagi ito ng commuter train service na patungong Bicol na may mga stations at flag stops para sa araw-araw na commuters o may maikling biyahe lang.

Matatandaang tumigil ang operasyon ng ruta noong Oktbre 2013 matapos na mag-collapse ng isang abutment.

Gayunman, ayon sa DOTr, kapag nagpatuloy na ang operasyon nito, magkakaroon ang commuter line ng dalawang terminal stations at apat na flag stops sa pagitan, at ang travel time o tagal ng biyahe ay 1 oras at 32 minuto lamang mula Lucena hanggang San Pablo.

30-araw para magpabakuna kontra-COVID-19.. “No vax, no ride”, ipapatupad — DOLE, DILG, DOTr

ni Lolet Abania | January 26, 2022

Bibigyan na lamang ang mga hindi bakunado at partially vaccinated na mga manggagawa sa National Capital Region (NCR) ng 30 araw simula Enero 26, upang magpatuloy sa pagsakay sa mga pampublikong transportasyon para sa pagpunta nila sa iba’t ibang lugar sa Metro Manila, ayon sa isang joint statement na inilabas ng Departments of Labor and Employment, Transportation, at Interior and Local Government ngayong Miyerkules.

Batay sa statement, hindi na papayagan ang mga ito na sumakay sa mga public utility vehicles (PUV) kung sila ay hindi pa rin fully vaccinated hanggang sa pagtatapos ng 30-day period.

Ayon kay DOTr Undersecretary Artemio Tuazon Jr., ang gawaing ito ay sumusuporta sa gobyerno sa pagsisikap nitong mapataas ang COVID-19 vaccination rate ng bansa sa gitna ng banta ng mas nakahahawang Omicron variant.

“This joint decision is also meant to support the vaccination drive of the entire government. We want our workers to get fully vaccinated especially now that there is no longer a shortage of COVID-19 vaccines, and there is a threat of highly transmissible variants of the virus,” ani Tuazon.

“We are giving our workers the time to get themselves vaccinated,” dagdag pa niya. Nilinaw naman ng DOTr official, na hindi aniya ito matatawag na discriminatory.

“As jointly decided by the DOLE, DILG and DOTr, workers who will remain unvaccinated 30 days after the announcement are not being barred from their workplaces,” giit ni Tuazon.

“They are simply not allowed to use public transportation, but can still use other means such as active transport, private vehicles, or company shuttle services,” paliwanag niya.

Matatandaang nagpahayag ang mga transport rights groups at human rights advocates ng kanilang posisyon hinggil sa “no vax, no ride” policy, kung saan anila, mas organisado at mas sistematikong pamamaraan ang kailangan para mapigilan ang pagkalat ng virus.

Paliwanag naman ng DOTr, ang kanilang polisiya ay para maprotektahan ang mga unvaccinated na tamaan ng naturang respiratory disease, at upang mapigilan ang ekonomiya na tuluyang bumagsak dahil sa pagsasara ng maraming establisimyento.

“If we do not act now, all industries and business sectors will be severely affected,” ayon pa sa statement.

Seaman’s book, libre na sa mga bagong seafarers

ni Lolet Abania | January 25, 2022

Ibibigay na nang libre ng pamahalaan ang mga seaman’s books para sa mga first-time seafarers, ayon sa Department of Transportation (DOTr).

Sa Talk to the People ni Pangulong Rodrigo Duterte nitong Lunes, nai-report din ni DOTr Secretary Arthur Tugade na babawasan din ng Maritime Industry Authority ng 50% ang gastos para naman sa renewal ng mag-e-expire na seaman’s books.

“’Yung mga first time seamen, na kukuha ng seaman’s book, ang halaga nito P1,000 to P1,800 depende kung sa’n mo kukunin, libre na ho ‘yun,” sabi ni Tugade.

“Paano ang renewal? 50% discount up to December this year,” dagdag ng opisyal.

Ang seaman’s book ay katumbas ng isang working visa para sa seafarers.