MRT3, 100% passenger capacity na bukas — DOTr

ni Lolet Abania | February 28, 2022

Itataas na ang passenger capacity sa MRT3 sa 100% mula sa dating 70% simula bukas, Marso 1, kasabay ng pagsasailalim sa National Capital Region (NCR) sa Alert Level 1 mula naman sa dating Alert Level 2, ayon sa Department of Transportation (DOTr) ngayong Lunes.

Sinabi ng DOTr na ang MRT3 ay may kapasidad na maglulan ng 1,182 pasahero bawat train set o 394 kada wagon. Binubuo ang bawat train set ng tatlong wagon.

“Ang pagtataas ng kapasidad ng mga tren ay bilang tugon ng pamunuan ng MRT-3 at Kagawaran ng Transportasyon sa pagtaas ng demand sa pampublikong transportasyon sa pagbubukas ng mas maraming establisimyento sa Metro Manila,” pahayag ng DOTr sa Facebook.

Gayunman, paalala ng ahensiya sa mga pasahero na mahigpit pa ring ipatutupad ang minimum public health standards, kung saan ang magsalita o makipag-usap, kumain, uminom at sumagot sa mga tawag sa cell phones ay mananatiling ipinagbabawal sa loob ng mga tren.

Ayon pa sa DOTr, ang mga pasahero ay required pa rin na magsuot ng face mask subalit ang pagsusuot ng face shields ay mananatiling boluntaryo.

“Upang matiyak ang kaayusan at implementasyon ng minimum public health standards sa buong linya, patuloy na magtatalaga ng mga train at platform marshals ang pamunuan ng MRT-3 sa mga tren at istasyon nito,” dagdag ng ahensiya.

DOTr Asec. Libiran nagbitiw na sa puwesto dahil sa mga personal na dahilan

ni Jasmin Joy Evangelista | February 22, 2022

Nagbitiw na sa puwesto si Transport Assistant Secretary Goddes Libiran, dahil sa mga personal na dahilan.

"I have tendered my resignation as Assistant Secretary for Communication and Commuter Affairs of the DOTr (Department of Transportation)," pahayag ni Libiran sa kanyang Facebook post. "My resignation will be effective on February 28."

Ayon kay Libiran, naging mahirap ang nakaraang tatlong buwan para sa kanya dahil sa pagkaka-infect ng COVID-19 sa kanyang pamilya at pagiging biktima ng pagnanakaw.

“Since last week, I started receiving questions confirming whether or not I have resigned from the Department of Transportation (DOTr). Today, I confirm it. Yes, I have crossed my rubicon,” ayon sa kanyang pahayag.

"I am leaving not because I will join any campaign, or because I no longer love my job. I am leaving because I have decided to once and for all, prioritize my family, and become a mother to my only child, who was barely a year old when I joined DOTr," paliwanag niya.

Nagpasalamat din si Libiran sa kanyang boss, Secretary Arthur Tugade, na ayon sa kanya ay pinagpursigihan ang bawat project, program o inisyatibo na nakatulong upang mapaunlad ang public transportation system sa ilalim ng Duterte administration.

"It will always be in hindsight where one will really grasp and appreciate how his tremendous work ethic and management style will benefit you in the long term. I am truly blessed to have been given the opportunity and the privilege to be under someone like him," ani Libiran.

Pinasalamatan din niya si President Rodrigo Duterte: “I would also like to thank President Duterte for giving us the inspiration, and for allowing Secretary Tugade and the DOTr to flourish and extend all the leeway in pursuit of his mandate to give the Filipinos a more comfortable life.”

Halos 11K foreign travelers, pumasok sa ‘Pinas — DOTr

ni Lolet Abania | February 19, 2022

Umabot sa halos 11,000 dayuhang turista ang tinanggap ng pamahalaan simula nang muling buksan ang mga borders ng Pilipinas para sa international travelers mula sa mga visa-free countries, ayon sa Department of Transportation (DOTr) ngayong Sabado.

Sa Laging Handa briefing, sinabi ni DOTr-Office for Transportation Security Administrator Raul del Rosario na nasa tinatayang 10,676 foreign tourists ang pumasok sa bansa simula noong Pebrero 10 (reopening date) hanggang Pebrero 15.

Aniya, umakyat sa 10% ang mga foreign arrivals na naging resulta sa bagong polisiya na ipinatupad ng gobyerno.

“Inaasahan pa natin na dadami pa ito pagdating ng summer months,” sabi ni Del Rosario. Binanggit naman ng opisyal na nasa 91% ng dumating na mga foreign nationals sa bansa ay fully vaccinated na kontra-COVID-19.

Ayon pa kay Del Rosario, karamihan sa mga foreign travelers na lumapag sa Ninoy Aquino International Airport (NAIA) ay mula sa United States, Canada, the United Kingdom, Australia, at South Korea habang ang mga dumating naman sa Cebu, marami sa kanila ay mula sa South Korea, Singapore, Qatar, at the United Arab Emirates.

Sinabi pa ng opisyal na nagpaplano na rin ang mga airlines na i-boost ang mga flight capacity nila sa Marso bilang paghahanda para sa summer peak season.

“They’re looking forward to increasing arrivals by summer and they’re really preparing well. Excited sila dahil ito ay magbo-boost ng financial status ng mga airline,” saad ni Del Rosario.

Samantala, ipinahayag din ni Del Rosario na sa ngayon wala nang bansa ang nasa ilalim ng red list ng gobyerno, kung saan pinapayagan na ang lahat ng international travelers – Filipinos o foreigners – na pumasok sa Pilipinas.

“Wala na po ‘yung red list countries natin,” wika ni Del Rosario, na ang tinutukoy niya ay mula sa listahan ng destinations na unang hinigpitan ng Pilipinas na makapasok dahil sa COVID-19 situation sa mga naturang bansa.