Taas-pasahe tablado sa DOTr

ni Lolet Abania | March 16, 2022

Hindi inaprubahan ng Department of Transportation (DOTr) ang petisyon na itaas ang pamasahe sa mga public transports, kung saan pinaniniwalaang ang pagpapatupad ng fare hike ay maaaring magresulta sa pagtaas ng inflation rate sa bansa.

Sa Talk to the People ni Pangulong Rodrigo Duterte na ipinalabas ngayong Miyerkules, sinang-ayunan ni DOTr Secretary Arthur Tugade ang pahayag ni Socioeconomic Planning Secretary at National Economic and Development Authority (NEDA) chief Karl Kendrick Chua na ang pagtataas ng minimum jeepney fare at minimum wage ay posibleng pagtaas ng inflation rate ng bansa sa 5.1%.

“Kaya nga ang posisyon ng Department of Transportation ngayon ay hindi magtaas ng fare. Kasi ‘yung impact ng fare hike ay ipinakita ni Secretary Karl kanina, tatamaan ‘yung tinatawag natin na inflation rate,” sabi ni Tugade.

“Ang position namin, ‘wag kayong magtaas ng fare, ng mga pamasahe, tanggapin ang ayuda, gamitin ‘yung subsidiya,” dagdag pa ng kalihim.

Maraming grupo na ng public utility vehicle (PUV) drivers at operators ang naghain ng kanilang petisyon para sa taas-pasahe kaugnay ng sunud-sunod na fuel price hike dahil sa nagaganap na labanan sa Ukraine at Russia.

Upang mabawasan ang nararanasang hirap, sinimulan ng gobyerno ngayong linggo ang distribusyon ng P6,500 fuel subsidies sa mahigit 377,000 na kwalipikadong PUV drivers at operators.

Umabot sa kabuuang P2.5 bilyon ang alokasyon sa Fuel Subsidy Program ng DOTr, kung saan inilabas ito noong nakaraang linggo.

Ayon kay Tugade, sa nasabing P2.5 bilyong budget, ang P1.75 billion o 70% ay nakalaan sa PUVs sa ilalim ng Land Transportation Franchising and Regulatory Board (LTFRB); P625 million o 25% para sa tricycles sa ilalim ng Department of the Interior and Local Government (DILG); at ang natitirang P125 million o 5% para sa delivery services sa ilalim naman ng Department of Trade and Industry (DTI).

Nakatakda ang pamamahagi ng ayuda sa public utility jeepneys at buses mula Marso 14 hanggang 18.

Ang subsidies para naman sa UV express, taxis, shuttles, tourists, at technology and app-based transport network vehicle service (TNVS) ay ibibigay sa pagitan ng Marso 14 hanggang 25.

“Aaminin ko po na ‘yung ayudang binibigay natin ngayon ay hindi eksaktamento todo-todo. Kulang pa rin ho ‘yan, kailangang repasuhin kaya nga tayo may second tranche sa April. Ganu’n din ho ‘yung sistema ng distribution sa second tranche,” sabi pa ni Tugade.

4-car train set bawat biyahe, plano ng MRT 3

ni Lolet Abania | March 12, 2022

Plinaplano na rin ng Metro Rail Transit Line 3 (MRT3) na palawigin ang kanilang configuration mula sa dating 3-car train ay gawin na itong 4-car train setup upang magdagdag ng kapasidad ng mga pasahero na sumasakay ng tren araw-araw.

Sa isang Facebook post nitong Biyernes, ayon sa pamunuan ng MRT3 balak nilang gumamit ng isang 4-car train setup stems mula sa isinagawa nilang “dynamic testing” operation noong Marso 9, 2022.

Ayon sa MRT3, target nilang i-expand ang kapasidad ng mga naisasakay sa istasyon sa pamamagitan ng pag-deploy ng mga tren na may 4 cars o bagon sa bawat train set.

Nabuo ang inisyatibo, matapos ang matagumpay na dynamic testing ng isang tren na may 4-car configuration na isinagawa ng pamunuan para tiyakin na ligtas na tumatakbo ang behikulo, maginhawang sakyan at matatag ito at hindi madidiskaril.

“With 4-car train sets, we can further increase our line capacity, which will enable us to serve more riding public with safe and reliable transport system as the country navigates into the ‘new normal’,” pahayag ni Director for Operations Michael Capati.

Ayon pa sa pamunuan, ang station platforms ng MRT3 ay dinisenyo para mag-accommodate ng 4-car train operation.

“But the pocket track, where trains park off the main line, has been found to have insufficient length to accommodate the safe operation of trains in 4-car configuration,” batay sa MRT3.

Gayunman, inirekomendang i-redesign ang track sa hilagang bahagi ng mainline para mapayagan ito at magkaroon ng ligtas na operasyon ng 4-car train sets.

Common station ng rail systems, kumpleto na sa pagtatapos ng Marso – DOTr

ni Lolet Abania | March 5, 2022

Nakatakdang makumpleto ang isang grand central station na magkokonekta sa apat na railway lines sa Metro Manila sa pagtatapos ng Marso ngayong taon, ayon sa Department of Transportation (DOTr).

Sa isang statement ng DOTr ngayong Sabado, nakasaad ang naging anunsiyo hinggil dito ni DOTr Secretary Arthur Tugade sa kanyang ginawang site inspection sa North Avenue Common Station nitong Huwebes, Marso 3.

Ayon sa ahensiya, nagbunga na rin ang Common Station project matapos ang mahigit 15 taong konstruksyon nito, simula nang aprubahan ito ng National Economic and Development Authority-Investment Coordination Committee (NEDA-ICC) noong Disyembre 2006.

“Notwithstanding the fact that I did not close EDSA to traffic, notwithstanding the fact that I did not suspend or realign the operations of the MRT3, the construction of the Common Station’s building structure will be completed by the end of March,” pahayag ni Tugade.

Target namang simulan ang operasyon nito sa Hulyo 2022, habang iniutos na ng kalihim na gawin ang commencement of operation nito sa mas maagang petsa. Ani Tugade, “without sacrificing quality of work and reasonability of cost.”

“I will henceforth, until my term ends, inspect and make sure that the electromechanical system will also be in place so that this Common Station – a long-time dream of the Filipino people – will come into reality. I hope it can be done during the term of President Mayor Rodrigo Roa Duterte,” sabi pa ni Tugade.

Katuwang dito ng kalihim sina Japan Ambassador to the Philippines Kazuhiko Koshikawa, Japan International Cooperation Agency (JICA) chief representative Eigo Azukizawa, BF Corporation CEO Marides Fernando, iba pang mga transport officials, at mga private sector partners, upang i-check ang progreso ng naturang proyekto.

Ayon sa DOTr, ang Station Building ng Area A ay konektado na ngayon sa Area B o ang Atrium, kung saan 100% nang kumpleto.

“The 13,700-square meter concourse area will interconnect four major railway lines, namely LRT1, MRT3, MRT7, and the Metro Manila Subway Project,” saad ng DOTr.

“Today, we are very pleased to welcome Secretary Tugade. You can see that the status of the [station] building is well on its way and we are rushing; 24/7 work is going on here at the station to complete it as per the Secretary's schedule,” pahayag naman ni Fernando.

Ayon pa sa DOTr, kapag ito ay operational na, ang Common Station ay kayang mag-accommodate ng halos 500,000 pasahero araw-araw.