Ayuda muna — DOTr... Taas-pasahe, tablado

ni Mylene Alfonso @News | September 23, 2026

Photo: LTFRB / File

Nilinaw ng Malacañang na wala pang pinal na desisyon kaugnay sa pagtataas ng pamasahe sa kabila ng patuloy na pagmahal ng presyo ng langis dulot ng krisis sa Middle East.

Ayon kay Palace Press Officer Undersecretary Claire Castro, layunin ni Pangulong Ferdinand Marcos Jr. na mapanatiling balanse ang sitwasyon upang hindi agad maramdaman ng mga commuter ang epekto ng oil price hike.

Aniya, patuloy na tinutugunan ng pamahalaan ang pangangailangan ng transport sector habang iniiwasang maipasa sa publiko ang dagdag na pasanin.

“Mabigat po talaga kasi kung pagsasabay-sabayin lahat, so noon pa naman ang gusto ng Pangulo ay balansiyado, tumaas man ang presyo ng krudo ay hindi naman masyadong mararamdaman ng ating mga commuters dahil—kung tataas man ang pamasahe,” pahayag ni Castro sa briefing sa Palasyo.

“So, ang ginagawa po ng gobyerno ng pamahalaan ay tinutugunan naman din po ang pangangailangan mismo dito sa transport sector,” ani Castro.

Sinabi rin aniya ni Department of Transportation (DOTr) Secretary Giovanni Lopez na ginagawa ng gobyerno ang lahat ng posibleng hakbang upang matulungan ang mga tsuper at transport operator, at ang pagtataas ng pamasahe ay dapat manatiling huling opsyon.

“Pinipiga pa muna natin ang gobyerno kung ano pang puwedeng gawin para makatulong sa mga tsuper at transport operator na hindi ipasa sa mga commuters ang pasanin. Kung pagtaas ng pamasahe ay sana maging last resort natin. Tuluy-tuloy pa rin ang DOTr initiatives para maibsan ang pagtaas ng presyo ng langis, tulad ng fuel discount, free toll sa mga buses,” wika ni Lopez.

“At napag-usapan na rin sa UPLIFT meeting last week with ES Ralph Recto ang targeted subsidy para sa mga transport group sa pamamagitan ng AICS,” paliwanag ni Lopez.

Kabilang sa mga patuloy na ipinatutupad na ayuda ng DOTr ang fuel discount, libreng toll para sa mga provincial bus, PITX terminal fee waiver para sa PUVs hanggang katapusan ng taon, waived terminal fees sa 86 SM transport terminals, 50% diskwento sa MRT-3 at LRT-2, P1 Ro-Ro terminal fee, at mga libreng sakay na programa. 

Inihahanda rin ang targeted subsidy para sa mga transport group sa pamamagitan ng Assistance to Individuals in Crisis Situation (AICS).

Binigyang-diin naman ni Castro na bagama’t hindi kontrolado ng gobyerno ang digmaan sa Middle East at ang epekto nito sa presyo ng langis at pagkain, patuloy nitong pinaghahandaan ang mga hakbang upang mabawasan ang epekto nito sa mga Pilipino.

Kada 90 araw — DOTr... Drug test sa lahat ng PUV driver

ni Gina Pleñago / Mai Ancheta @News | May 6, 2025

Photo File: FB / DOTr / Vince Dizon / PRC

Oobligahin na ng Department of Transportation (DOTr) ang lahat ng tsuper ng pampublikong sasakyan na sumailalim sa mandatory drug test kasunod ng mga aksidente na ikasawi ng ilang mamamayan.

Ito ang inanunsyo ni DOTr Secretary Vince Dizon makaraang mabatid na ayaw umanong magpa-drug test ang driver ng Solid North Bus na nakaaksidente sa Subic-Clark-Tarlac Expressway (SCTEX).

Sinabi ni Dizon na nagalit ito makaraang malaman na ayaw magpa-drug test ang driver ng Solid North Bus subalit hindi aniya ito maaaring tumanggi dahil nakapatay ito ng 10 katao.

Ilalabas agad ng opisyal ang kanyang direktiba para sa mandatory drug test ng lahat ng mga pampublikong tsuper sa bansa.

Makikipagtulungan aniya ang Land Transportation Office (LTO) at Land Transportation Franchising and Regulatory Board (LTFRB) sa Philippine Drug Enforcement Agency (PDEA) sa pagpapatupad sa direktiba.

Kasabay nito, inatasan ni Dizon ang LTFRB at LTO na baguhin ang maximum na bilang ng oras sa pagmamaneho ng mga PUV driver mula sa anim na oras at gawin itong apat na oras, at kailangan mayroong karelyebo ang driver kung ang biyahe ay mas mahaba sa apat na oras, partikular sa mga kumpanya ng bus na bumibiyahe sa mga probinsya.

Binigyang-diin ni Dizon na hindi maaaring ang konduktor ang maging karelyebo ng driver at dapat magkaroon ng mahigpit na kaalaman ang mga driver sa pagmamaneho upang maiwasan ang mga aksidente.

DOTr sa publiko: Magkomyut vs. trapik

ni Eli San Miguel - Trainee @News | January 23, 2024

Inudyok ni Department of Transportation (DOTr) Command and Control Operations Center chief Charlie Del Rosario, ang publiko ngayong Martes na magkaroon ng "paradigm shift" at gumamit ng pampasaherong transportasyon sa halip na pribadong sasakyan upang maiwasan ang mabigat na trapiko.

“We encourage po ‘yung paggamit ng mass transportation dito na rin po sa Kamaynilaan dahil nga po alam naman po natin na napakarami po ng ating motor vehicle sa lansangan, private vehicles po ‘yan,” pahayag ni del Rosario sa briefing ng Bagong Pilipinas Ngayon.

Sinabi sa traffic index ng TomTom International BV, isang location technology company, na nanguna ang Metro Manila sa 387 na mga lungsod sa buong mundo na iniranggo batay sa trapiko sa metro area.

Binigyang-diin din ni Del Rosario ang mga pangunahing proyektong pangtransportasyon ng gobyerno tulad ng Metro Manila subway at MRT-4 extension, na pinaniniwalaang makakatulong na bawasan ang paggamit ng pribadong sasakyan.

Gayunpaman, kinikilala niya na hindi madaling abutin ang kanilang obhektibo.

“Ongoing pa rin po at tuloy-tuloy ‘yung ating subway [project], so we are looking at the possibility—kasi hindi naman po natin magagawa ito ng isang upuan lamang, it will take some time—so ‘yung mga proyektong ‘yan ay tuloy-tuloy po na pinamumunuan ng Kagawaran ng Transportasyon,” sabi ni Del Rosario.

“We just have to have that paradigm shift: ‘yung pagbabago ng kaisipan na imbis po na gumamit ng private vehicle natin, gumamit po tayo ng mass transportation,” dagdag niya.