Staycation sa Holy Week sa mga hotel, aprub sa DOT

ni Mary Gutierrez Almirañez | March 22, 2021

Pinapayagan nang magbakasyon o mag-staycation sa Holy Week ang publiko na nasa ilalim ng National Capital Region at kalapit na probinsiya katulad ng Bulacan, Cavite, Laguna at Rizal, batay sa Department of Tourism (DOT) ngayong umaga, Marso 22.

Ayon kay Tourism Secretary Bernadette-Romulo Puyat, "Nakausap ko na ang lahat ng airlines, sinabi naman nila, puwede mag-rebook nang walang penalty ang hotel and restaurant associations.”

Sa kabila nito, pinapayagan lamang makapagbakasyon ang mga hindi bababa sa edad 15 at 65-anyos pataas na indibidwal.

Iginiit din niya ang hininging timeout ng mga doktor at health expert dahil nanganganib na mapuno ang mga ospital sa patuloy na paglobo ng COVID-19, partikular na sa Metro Manila. Aniya, “Humingi ang mga doktor kung puwede, timeout muna.

Nakakalungkot pero siyempre, kailangang mapagbigyan ang mga doktor. Sabi naman nila, 2 weeks lang pero nakakalungkot kasi bumubuwelo na tayo,

Holy Week, madaming aalis.” Sa ngayon ay umiiral na sa NCR ang panibagong restrictions sa ilalim ng general community quarantine (GCQ) na magtatagal hanggang sa ika-4 ng Abril.

Ipinatupad ng Inter-Agency Task Force (IATF) ang mga bagong guidelines matapos maitala ng Department of Health (DOH) ang 663,794 na kabuuang bilang ng COVID-19 sa bansa.

Bohol, bubuksan na sa publiko simula sa Dec. 15

ni Ronalyn Seminiano Reonico | December 9, 2020

Muli nang bubuksan sa mga local tourists ang Bohol simula sa December 15 nang walang age restrictions ngunit kailangang magpakita ng negative reverse transcription polymerase chain reaction result 72 oras bago ang pagbiyahe sa nasabing lugar.

Pahayag ni Department of Tourism Secretary Bernadette Romulo-Puyat, “I would like to thank Governor (Arthur) Yap for removing the age restrictions kasi Filipinos really travel as a family so that will be welcome news to all those who want to travel for Christmas na at least those above 65 and below 15 can go to Bohol and enjoy as a family.”

Samantala, ayon naman kay Yap, kailangang magkaroon ang mga turista ng pre-arranged booking sa DOT-certified hotel at tour operators.

Aniya, “Kailangang pre-booked kasi ang point natin dito as we reopen is hindi puwedeng do-it-yourself. The tourists must stay within their bubble because we want to watch where they are going and we want to make sure that they are safe.”

Intramuros, kinilala bilang World’s Leading Tourist Attraction

ni Lolet Abania | November 29, 2020

Itinanghal bilang World’s Leading Dive Destination ang Pilipinas ng 2020 World Travel Awards.

Ayon sa Department of Tourism (DOT), ito ang ikalawang pagkakataon na nagwagi ang bansa bilang World’s Leading Dive Destination matapos na unang kinilala noong 2019.

Muling kinilala sa buong mundo ang ‘Pinas na tahanan ng maraming dive sites tulad ng Tubbataha Reefs Natural Park sa Palawan, Apo Reef Natural Park sa Mindoro, at Apo Island sa Dumaguete, matapos na talunin ang walong magagandang dive destinations kabilang na ang Bora Bora, French Polynesia, Cayman Islands, Fiji, Galapagos Islands, Great Barrier Reef, Australia, Maldives, at Mexico.

Una nang pinarangalan ang ‘Pinas bilang Asia’s leading beach kasunod nito ang pangunguna ng bansa sa dive destination sa World Travel Awards 2020.

Bukod pa rito, ang Intramuros, Manila ay kinilala rin bilang World's Leading Tourist Attraction.

Ito ang kauna-unahang pagkakataong nakamit ng Manila ang ganitong parangal dahil sa ipinagmamalaking Walled City ng Intramuros laban sa 15 tourist spots kabilang ang Acropolis ng Greece, Burj Khalifa ng Dubai, ang Grand Canyon National Park ng USA, Mount Kilimanjaro ng Tanzania, at Taj Mahal ng India, at marami pang iba.

Samantala, itinatag ang World Travel Awards noong 1993 na kumikilala sa mga katangian at organisasyon sa buong mundo mula sa travel, tourism, at hospitality industries sa pamamagitan ng kanilang annual Grand Tour, mga serye ng anim na regional gala ceremonies na idinaraos sa bawat kontinente, kung saan kada taon ay nagsasagawa ng Grand Final Gala.