No-build zone policy, ipatutupad sa Davao de Oro

ni Eli San Miguel - Trainee @News | February 11, 2024

Nangako si Davao de Oro Governor Dorothy Montejo Gonzaga na ipatutupad ang no-build zone policy sa mga mapanganib na lugar na tinukoy ng Project NOAH matapos ang nakamamatay na landslide sa Maco, ayon sa pahayag ng provincial government ngayong Linggo.

Binigyang-diin ni Edward Macapili, isang executive assistant sa Davao de Oro, na mahalaga na ipatupad ang polisiya dahil itinuturing ang buong probinsya bilang isang ‘mining area.’

Itinuturing ang Project NOAH (Nationwide Operational Assessment of Hazards) bilang isang integradong programa sa pagsugpo at pag-iwas sa sakuna ng Department of Science and Technology (DOST). Isa sa mga bahagi nito ang pagtukoy ng mga eksaktong lugar na may mataas na posibilidad ng pagguho ng lupa.

Noong Martes ng gabi, isang landslide ang tumama sa garahe ng isang bus company, barangay hall, at residential areas sa Zone 1 Barangay Masara sa bayan ng Maco.

Naunang ibinunyag ni Macapili na idineklarang no-build zone ang lugar kung saan naganap ang landslide.

Namatay ang 30 katao dahil sa insidente, habang 77 naman ang patuloy na nawawala.

Mga gusali, patibayin laban sa lindol — DOST

ni Eli San Miguel - Trainee @News | December 12, 2023

Sinabi ng Department of Science and Technology (DOST) ngayong Martes, na kailangang ipagpatuloy ang pagpapatibay ng mga bahay at gusali na itinayo ilang taon na ang nakakaraan upang mabawasan ang posibleng bilang ng mga madidisgrasya mula sa mga lindol.

"We need to strengthen our building preparedness, and that is where the solution would lie on the potential number of casualty – kailangang patibayin para kumonti pa ang maapektuhan," pahayag ni DOST Secretary Renato Solidum Jr.

Sinabi rin ni Solidum na kailangan ng patuloy na kampanya sa impormasyon dahil kailangan din magkaroon ng kaalaman ng mga kabataan.

Samantala, ipinaliwanag ni Solidum na ang bilang ng lindol na yumanig sa bansa noong 2023 ay lumagpas sa bilang ng lindol na naranasan dahil sa mga aftershocks.

"If you count the aftershocks, yes. But there are sometimes years where we have major earthquake events, and major earthquake events would trigger a lot of aftershocks," aniya.

Bukod dito, sinabi rin ni Solidum na epekto ng lindol ang mahalagang usapin, na binigyang diin ang mga pagyanig sa Mindanao na hindi nagdulot ng "significant casualties.”

2 iskolar ng DOST, doctorate degree graduates na sa Italya

Fni Angela Fernando - Trainee @News | November 28, 2023

Nagtapos na ang dalawang Pinoy iskolar ng DOST na sina Lorraine Kay Cabral at Noel Salvoza ng kanilang post-graduate course sa larangan ng Molecular Biomedicine kamakailan.

Matagumpay din ang kanilang naging pananaliksik sa mga sakit sa atay sa Trieste University at sa Italian Liver Foundation.

Nagkaroon sila ng oportunidad na makapag-aral at mapagtagumpayan ang kanilang pananaliksik sa tulong ng kasunduan ng Philippine Department of Science and Technology (DOST), Philippine Council for Health Research and Development ng DOST (DOST-PCHRD) sa mga nasabing unibersidad at mga foundation sa Italya.

Napabilib naman nina Cabral at Salvoza ang founder ng Italian Liver Foundation na si Professor Claudio Tiribelli dahil sa kanilang dedikasyon.

Nais ng dalawang maging tulay upang maging epektibo ang pananaliksik sa molecular hepatology sa 'Pinas at maging instrumento upang maibahagi ang kanilang natutunan.

Naniniwala silang posibleng magbukas ng mga pinto sa larangan ng medisina ang kanilang kaalaman para sa mas makabagong mga solusyon at paggamot.