2 LPA, namataan sa Batanes at Eastern Samar

ni Lolet Abania | September 5, 2021

Dalawang low pressure area (LPA) ang namataan sa Philippine Area of Responsibility (PAR) ngayong Linggo, ayon sa PAGASA. Sa 24-oras na forecast ng PAGASA, ang isa sa LPAs ay nasa layong190 kilometro kanluran timog-kanluran ng Basco, Batanes ng alas-3:00 ng hapon, habang ang isa pang LPA ay nasa layong 465 kilometro silangan ng Guiuan, Eastern Samar.

Ayon sa PAGASA, madudulot ang LPA ng maulap na papawirin na may kalat-kalat na pagbuhos ng ulan at thunderstorms sa buong Eastern Visayas, Caraga, Batanes at Babuyan Islands.

Samantala, ang Metro Manila at ang natitirang bahagi ng bansa ay makararanas ng bahagyang maulap hanggang sa maulap na papawirin na may kasamang pulo-pulong pag-ulan sanhi ng localized thunderstorms.

Paalala ng PAGASA ang mga apektadong residente na paghandaan ang posibleng flash floods o landslides habang nakararanas ng matinding thunderstorms. Gayundin, mahina hanggang sa katamtamang bugso ng hangin at bahagya hanggang sa katamtamang coastal water conditions ang mararanasan sa buong bansa.

Lagundi at VCO trials kontra-COVID-19, malapit nang ilabas

ni Lolet Abania | June 27, 2021

Posibleng sa susunod na buwan mailabas ang paunang resulta ng pag-aaral sa mga herbal medicines ng Pilipinas na lagundi at virgin coconut oil bilang potensiyal na gamot para sa mga pasyenteng may COVID-19.

“'Yung VCO at lagundi, malapit na po siguro, by next month, baka mayroong preliminary analyses kung anong sinasabi ng datos ng pag-aaral na ito,” sabi ni Dr. Jaime Montoya, director ng Department of Science and Technology-Philippine Council for Health Research and Development sa interview ngayong Linggo nang umaga.

Matatandaang sinabi ni DOST Chief Fortunato Dela Peña na ang clinical studies para sa paggamit ng VCO kontra-COVID-19 ay makukumpleto sa pagtatapos ng June habang ang clinical trials para naman sa lagundi ay nagsimula noong October ng nakaraang taon.

Ayon sa DOST, nakumpleto ang Phase 2 ng clinical trials para sa VCO noong November habang ang completion ng hospital-based clinical trials para rito ay dapat sanang matapos noong May 31.

Subalit, ayon kay Montoya, naghihintay naman ng maraming volunteers na nais lumahok sa pag-aaral sa clinical trials para sa herbal plant na tawa-tawa na panlaban sa COVID-19.

“'Yung tawa-tawa po, medyo hindi ganoon kabilis ‘yung pagkukuha ng lalahok kasi ito ay boluntaryo, so ito, matatagalan pa nang kaunti,” saad ni Montoya.

Noong 2020, sinabi ng DOST na pinag-iisipan nilang gamitin ang tawa-tawa upang madagdagan ang treatment sa mga pasyenteng infected ng COVID-19.

Noong November, ibinunyag naman ni Montoya na isinagawa na ang Phase 1 clinical trials para sa tawa-tawa.

Kahit may naturukan na namaga ang puso... Pfizer, ituturok pa rin sa ‘Pinas — DOST

ni Ronalyn Seminiano Reonico | June 27, 2021

Walang rason para itigil ang pagbabakuna ng Pfizer COVID-19 vaccine sa Pilipinas, ayon sa opisyal ng Department of Science and Technology (DOST) sa kabila ng naiulat na side effects nito.

Matatandaang kamakailan ay naglabas ng babala ang US Food and Drug Administration (FDA) kaugnay ng rare cases ng myocarditis o pamamaga ng puso sa mga young adults at adolescents matapos mabakunahan ng Moderna at Pfizer.

Saad ni DOST–Philippine Council for Health Research and Development Executive Director Dr. Jaime Montoya, "Sa huli naming pagkakaalam, ito ay isasama ng (Philippine) FDA roon sa information na kasama ng bakuna pero hindi naman ito nangangahulugan na ito ay rason para hindi ibigay ang bakuna.

"Ito ay pinapaalalahanan na ito ay posibleng mangyari pero hindi nangangahulugan na may namamatay." Ayon kay Montoya, napag-alaman ng US FDA na ang mga nakaranas ng heart inflammation ay maaaring mayroong viral infection.

Aniya pa, "May nabigyan ng bakuna (ngunit) mayroon silang viral infection na hindi nila alam na sanhi ng tinatawag na myocarditis.” Samantala, inaasahang darating sa Pilipinas ang biniling 40 million doses ng Pfizer COVID-19 vaccines sa Agosto.