600K empleyado nakabalik na sa trabaho — DOLE

ni Lolet Abania | March 2, 2022

Inanunsiyo ng Department of Labor and Employment (DOLE) na mahigit sa 600,000 manggagawa ang nakabalik na sa kanilang mga trabaho nitong Lunes, bago pa isinailalim ang National Capital Region (NCR) at 38 iba pang lugar sa bansa sa Alert Level 1.

Sa isang interview kay DOLE Secretary Silvestre Bello III ngayong Miyerkules, sinabi nitong inasahan na rin nila na tataas pa ang bilang ng mga manggagawang balik-trabaho kapag ibinaba na ito sa naturang alert level system.

“As of Monday, may nakabalik nang, hindi naman exact ito, more than 600,000 ang nakabalik na. We expect na marami pang babalik kasi full operation na,” ani Bello.

Sa ilalim ng Alert Level 1, ang lahat ng establisimyento, mga indibidwal, o aktibidad, ay pinapayagan na mag-operate, magtrabaho, o ipatupad ang full on-site o venue/seating capacity subalit dapat na isinasagawa pa rin ang minimum public health standards.

Ipinaliwanag naman ni Bello na ang mga empleyado na nasa work-from-home arrangements na babalik na sa kanilang mga trabaho o onsite work, subalit unvaccinated pa laban sa COVID-19, ay mananatiling required na magprisinta ng negative RT-PCR test result kada dalawang linggo.

“’Yun ang desisyon namin sa IATF. Kung hindi ka bakunado, puwede ka pumasok kaya nga lang for the protection naman ng mga coworkers mo and especially of the workplace, magpa-swab ka para natitiyak na pagpasok mo negative ka,” giit ng opisyal.

“Otherwise, biro mo, kung may isang nakapasok, eh ‘di ubos ang buong workforce mo,” dagdag pa ni Bello. Samantala, inamin ni Bello na ang P537 minimum wage para sa NCR employees ay masyadong maliit.

Gayunman, ayon sa kalihim, ang adjustment ng minimum wage ay nakadepende sa assessment ng regional wage board, habang kinukonsidera rin nila ang kapasidad ng mga employers para mag-increase ng mga sahod ng kanilang mga empleyado.

“Personally, talagang medyo maliit na ‘yung P537 dito sa Metro Manila. Pero ang isang pinakamahalagang i-consider natin ay kaya ba ng mga employers,” sabi pa ni Bello.

Mayor Vico humingi ng paumanhin sa naganap na gulo sa pila ng TUPAD program sa Pasig City

ni Jasmin Joy Evangelista | February 23, 2022

Humingi ng paumanhin si Pasig City Mayor Vico Sotto matapos na mauwi sa tulakan, siksikan, at balyahan ang pila sa Tulong Panghanapbuhay sa Ating Disadvantaged/Displaced Workers (TUPAD) program ng Department of Labor and Employment sa Rainforest Park at Plaza Bonifacio.

Sa report ng "24 Oras," ang mga aplikante ay nagbabalyahan at nagsisigawan habang nakikiusap ang mga organizers na huwag magtulakan upang maiwasan ang stampede.

Ang ilan ay hindi rin maayos na nakasuot ng face mask.

"Hindi namin inaasahan na ganoon. Sa kadamihan ng tao, nagkatulakan na sila," pahayag ng isang aplikante.

Sa isang pahayag, humingi ng paumanhin si Mayor Vico.

"Ako po ay humihingi ng paumanhin sa panandaliang kaguluhan na nangyari sa dalawang venue ng LGU-TUPAD sign up natin," aniya.

"Ayon sa report ng Peace and Order Department, maayos ang pila noong nag-umpisa ito kaninang umaga. Ngunit sa Plaza Bonifacio ay biglang may sumigaw ng, 'Bara-barangay ang pila!' kaya nagkagulo-gulo ang pilahan. Sa Rainforest Park naman ay may tumulak ng isang gate kaya nag-unahan ang mga tao papasok ng venue noong bumukas ito," dagdag niya.

Ang TUPAD program ay isang community-based package ng tulong kung saan nagbibigay ito ng trabaho para sa mga displaced workers, underemployed, at self employed workers.

Mga nag-apply sa ayuda ng DOLE, umabot na sa halos 100K

ni Jasmin Joy Evangelista | February 8, 2022

Umabot na sa halos 100,000 ang nag-apply para sa ayuda ng Department of Labor and Employment (DOLE) sa ilalim ng COVID-19 Adjustment Measures Program (CAMP).

Sa ngayon ay 30,000 na ang aprubado habang 17,000 naman ang for evaluation.

Nauna nang sinabi ng DOLE na hindi pasok sa programa ang mga 2020 o 2021 pa natanggal sa trabaho at mga naka-flexible working arrangement o yung bawas lang ang araw ng pasok kaya marami sa mga nag-apply ang ‘denied’.

Ayon sa DOLE, prayoridad sa CAMP ang mga nawalan talaga ng traabaho.

Sa tantiya naman ng Department of Trade and Industry, marami na ang mga manggagawang nakabalik sa trabaho sa mga lugar na nasa alert level 2.