100K trabaho, naghihintay sa Labor Day job fairs – DOLE

ni Lolet Abania | April 29, 2022

Inianunsiyo ng Department of Labor and Employment (DOLE) ngayong Biyernes na libu-libong oportunidad sa trabaho ang naghihintay para sa mga jobseekers sa Labor Day, Mayo 1.

Kasabay ng pagdiriwang ng ika-120th Labor Day, ilulunsad ng DOLE ang Trabaho, Negosyo, Kabuhayan Job and Business Fairs na lalahukan ng 900 employers sa buong bansa.

Sa isang statement, sinabi ni DOLE Secretary Silvestre Bello III na nasa 102,426 local at overseas employment opportunities ang nakalaan sa mga jobseekers sa naturang fairs.

Ayon kay Bello, ang partisipasyon ng mga employers sa gaganaping May 1 job fairs ay isang patunay na nagbunga na ang ginagawang pagsisikap ng gobyerno para sa employment recovery ng bansa na matinding tinamaan ng pandemya.

“This job fair is one of the employment recovery strategies to restart economic activities, restore consumer and business confidence, upgrade and retool the workforce, and facilitate labor market access,” saad ni Bello.

Aniya, karamihan sa mga vacancies para sa 26 job fair sites ay iyong nasa manufacturing, business process outsourcing, at retail/sales industries.

Sinabi ni Bello, para sa mga naghahanap ng trabaho sa local employment, naghihintay sa kanila ang 73,671 jobs gaya ng production operators/machine operators, customer service representatives, collection specialists, retail/sales agents/promodisers, at sewers na iniaalok ng 817 employers.

Samantala, nasa 28,755 overseas jobs naman mula sa Kingdom of Saudi Arabia, United Arab Emirates, Qatar, Kuwait, Germany, Poland, the United Kingdom, Japan, Taiwan, at Singapore, ang iniaalok ng 73 recruitment agencies.

Ang top overseas vacancies ay para sa mga nurse/nurse aide; carpenter, foreman, at welder; food server; household service worker; at auditor.

Binanggit naman ni Bello na ang site para sa main job fair sa Mayo 1 ay gaganapin sa Kingsborough International Convention Center sa San Fernando City, Pampanga, kung saan mahigit sa 10,000 trabaho ang iniaalok ng 90 employers.

Ayon pa sa DOLE chief, karamihan sa mga bakanteng trabaho ay production operators, skilled sewers, customer service representatives, production helpers, call center agents, helpers, staff nurses, at collections specialists.

DOLE: Double pay para sa mga empleyadong papasok sa regular holidays

ni Jasmin Joy Evangelista | April 5, 2022

Doble dapat ang matanggap na suweldo ng mga empleyadong papasok sa araw ng regular holiday, paalala ng labor department nitong Lunes.

Sa isang advisory, sinabi ng Department of Labor and Employment (DOLE) na ang mga manggagawang papasok sa April 9 o Araw ng Kagitingan, April 14 o Huwebes Santo at April 15 o Biyernes Santo, ay dapat na makatanggap ng 200% ng kanilang regular salary para sa unang walong oras.

Kailangan din silang bayaran ng karagdagang 30% ng kanilang hourly rate para sa overtime work, at karagdagang 30% sa kanilang basic pay ng 200% kung matatapat sa kanilang rest day ang holiday.

Para sa overtime work sa regular holiday, ang mga empleyado ay kailangang bayaran ng additional 30% ng kanilang hourly rate sa naturang araw.

Para sa April 16 o Black Saturday, ang “no work, no pay” principle ay maia-apply maliban na lamang kung mayroong polisiya ang kumpanya sa pagpapasuweldo sa special day.

Ang mga magtatrabaho tuwing special day ay kailangang bayaran ng karagdagang 30% sa unang walong oras ng trabaho, at karagdagang 30% ng kanilang hourly overtime work rate.

Ang mga manggagawang magre-report sa special day sakaling matapat sa kanilang rest day ay dapat bayaran ng karagdagang 50% ng kanilang basic pay sa unang walong oras, at karagdagang 30% sa overtime.

Nauna nang inanunsiyo ng Malacañang ang April 9, 14, at April 15 bilang regular holidays, at April 16 bilang special non-working holiday.

6 rehiyon, naghain na ng petisyon para sa minimum wage hike – DOLE

ni Lolet Abania | March 21, 2022

Ipinahayag ng isang opisyal ng Department of Labor and Employment (DOLE) na anim na regional wage boards ang nakatanggap ng mga petisyon hinggil sa pagtataas ng minimum wages ng mga manggagawa.

Sa Laging Handa public briefing ngayong Lunes, sinabi ni DOLE Undersecretary Benjo Benavidez na ang mga petisyon ay sasailalim pa sa isang proseso kabilang dito ang mga pagdinig at public consultations.

“Alam naman po natin na meron nang mga rehiyon, kung hindi ako nagkakamali, anim na rehiyon kung saan nakasampa na ‘yung mga petisyon for wage increase,” sabi ni Benavidez.

Ayon kay Benavidez, hindi pa siya makapagbigay ng eksaktong panahon kung kailan mailalabas ang desisyon dahil ang mga regional boards ay kailangan pang iproseso ang mga petisyon base sa itinakdang rules and regulations.

Gayunman, naniniwala ang opisyal na ang desisyon ay maaaring i-release sa Mayo o Hunyo, habang aniya, ang ilang petisyon ay kamakailan lamang inihain.

Wala naman tugon pa si DOLE Secretary Silvestre Bello III hinggil sa listahan ng ahensiya ng mga rehiyon kung saan ang mga petisyon ay naihain.

Una nang inatasan ni Bello ang Regional Tripartite Wages and Productivity Boards (RTWPB) sa buong bansa na i-review ang minimum wages.

Ayon sa kalihim, ang kasalukuyang P537 daily minimum wage sa National Capital Region (NCR) ay hindi na sapat sa pangunahing pangangailangan gaya ng pagkain, electricity at water bills.

Suportado naman ng Malacañang ang minimum wage reviews na isinasagawa ng DOLE.