P2B para sa mga nawalan ng kayod sa ECQ, inihirit

ni Ronalyn Seminiano Reonico | August 08, 2021

Inihihirit ni Department of Labor Secretary Silvestre Bello III kay Pangulong Rodrigo Duterte at sa Department of Budget and Management (DBM) na maglaan ng P2 billion pondo para sa cash assistance sa mga manggagawang apektado ng dalawang linggong enhanced community quarantine (ECQ) sa National Capital Region.

Ani Bello sa isang panayam, “Humingi kami kay Pangulong Duterte at sa DBM, humirit kami ng P2 billion kasi ang estimated natin ay maaapektuhan ang 300 to 400 workers, [sila] ang nawalan ng trabaho o mababawasan ng trabaho rito sa loob ng dalawang linggong ECQ.”

Pinoproseso pa umano ang naturang request ng DOLE at ayon kay Bello, kabilang ang mga apektadong manggagawa sa Laguna sa ikinokonsidera ng ahensiya na bigyan ng cash aid dahil isinailalim din ang naturang lugar sa mahigpit na quarantine classification.

Samantala, hanggang sa Agosto 20 pa isasailalim ang Metro Manila sa ECQ dahil sa banta ng COVID-19 Delta variant.

Pagpapadala ng mga OFWs sa Saudi Arabia, stop muna

ni Ronalyn Seminiano Reonico | May 28, 2021

Sinuspinde ng pamahalaan ang deployment ng mga overseas Filipino workers (OFWs) sa Saudi Arabia.

Sa inilabas na memorandum ni Department of Labor and Employment (DOLE) Secretary Silvestre Bello III, ipinag-utos niya sa Philippine Overseas Employment Administration (POEA) ang pansamantalang suspensiyon ng deployment ng mga OFWs sa Saudi Arabia matapos makatanggap ang ahensiya ng ulat na pinasasagot umano ng mga employers/foreign recruitment agencies sa mga manggagawang Pilipino ang mga kailangan upang makapasok sa naturang bansa.

Saad pa ni Bello, “In the interest of the service, you are hereby instructed to effect the temporary suspension of deployment of OFWs to the Kingdom of Saudi Arabia effective immediately and until further notice.

"The department received reports that departing OFWs are being required by their employers/foreign recruitment agencies to shoulder the costs of the health and safety protocol for COVID-19 and insurance coverage premium upon their entry in the Kingdom."

Samantala, ayon sa DOLE, maglalabas sila ng official statement kung kailan muling magpapatuloy ang deployment ng mga OFWs sa Saudi Arabia kapag nalinaw na ang naturang isyu.

P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.