30-araw para magpabakuna kontra-COVID-19.. “No vax, no ride”, ipapatupad — DOLE, DILG, DOTr

ni Lolet Abania | January 26, 2022

Bibigyan na lamang ang mga hindi bakunado at partially vaccinated na mga manggagawa sa National Capital Region (NCR) ng 30 araw simula Enero 26, upang magpatuloy sa pagsakay sa mga pampublikong transportasyon para sa pagpunta nila sa iba’t ibang lugar sa Metro Manila, ayon sa isang joint statement na inilabas ng Departments of Labor and Employment, Transportation, at Interior and Local Government ngayong Miyerkules.

Batay sa statement, hindi na papayagan ang mga ito na sumakay sa mga public utility vehicles (PUV) kung sila ay hindi pa rin fully vaccinated hanggang sa pagtatapos ng 30-day period.

Ayon kay DOTr Undersecretary Artemio Tuazon Jr., ang gawaing ito ay sumusuporta sa gobyerno sa pagsisikap nitong mapataas ang COVID-19 vaccination rate ng bansa sa gitna ng banta ng mas nakahahawang Omicron variant.

“This joint decision is also meant to support the vaccination drive of the entire government. We want our workers to get fully vaccinated especially now that there is no longer a shortage of COVID-19 vaccines, and there is a threat of highly transmissible variants of the virus,” ani Tuazon.

“We are giving our workers the time to get themselves vaccinated,” dagdag pa niya. Nilinaw naman ng DOTr official, na hindi aniya ito matatawag na discriminatory.

“As jointly decided by the DOLE, DILG and DOTr, workers who will remain unvaccinated 30 days after the announcement are not being barred from their workplaces,” giit ni Tuazon.

“They are simply not allowed to use public transportation, but can still use other means such as active transport, private vehicles, or company shuttle services,” paliwanag niya.

Matatandaang nagpahayag ang mga transport rights groups at human rights advocates ng kanilang posisyon hinggil sa “no vax, no ride” policy, kung saan anila, mas organisado at mas sistematikong pamamaraan ang kailangan para mapigilan ang pagkalat ng virus.

Paliwanag naman ng DOTr, ang kanilang polisiya ay para maprotektahan ang mga unvaccinated na tamaan ng naturang respiratory disease, at upang mapigilan ang ekonomiya na tuluyang bumagsak dahil sa pagsasara ng maraming establisimyento.

“If we do not act now, all industries and business sectors will be severely affected,” ayon pa sa statement.

Pagbabakuna sa pinagtatrabahuhan kontra-COVID, target ng DOLE

ni Lolet Abania | January 20, 2022

Pinag-iisipan ng Department of Labor and Employment (DOLE) ang posibilidad na payagan ang mga workplaces o mga lugar na pinagtatrabahuhan bilang vaccination sites, para mas maging madali sa mga empleyado na hindi pa nababakunahan laban sa COVID-19 na maturukan ng vaccine.

“Opo, tinitingnan din natin ito. Gawin nating mas accessible ‘yung mga bakuna sa mga manggagawa,” ani DOLE Undersecretary Benjo Santos Benavidez sa Laging Handa briefing ngayong Huwebes.

Ginawa ng opisyal ang pahayag matapos na pitong pharmacies at clinics sa National Capital Region (NCR) ang pinayagan ng gobyerno na mag-administer ng primary doses at booster shots sa gitna ng COVID-19 surge sa bansa.

Tinawag ang programa na “Resbakuna sa mga Botika”, kung saan target na makapagbakuna ng 3,500 shots sa kanilang pilot run na nagsimula na ngayong araw, Enero 20 hanggang 21.

“Ang alam ko ngayon nga ay merong pilot implementation na ang pagbabakuna ay nasa mga piling mga botika na. Sana ‘yung pagbabakuna ay ituloy-tuloy na rin sa mga pagawaan,” sabi ni Benavidez.

Aniya, ang mga nakibahaging mga botika at clinics sa Metro Manila sa nasabing programa ay The Generics Pharmacy, Generika Drugstore, Mercury Drug, Southstar Drug, Watsons, Healthway, at QualiMed Clinic.

Ayon kay Benavidez, ito ay bilang konsiderasyon sa naging usapin hinggil sa “no vaccination, no ride” policy na ipinatupad ng gobyerno, kung saan nagbabawal sa mga unvaccinated individuals na sumakay sa mga pampublikong transportasyon na sinimulan noong Lunes, Enero 17.

Gayunman, matapos ang hinaing ng publiko, nilinaw ng mga opisyal ng gobyerno nitong Martes na exempted ang lahat ng workforce o mga manggagawa mula sa naturang polisiya dahil sa pagbibigay ng mga ito ng kanilang essential services.

11,500 workers, tambay sa ipinatupad na Alert Level 3 — DOLE

ni Lolet Abania | January 19, 2022

Nasa tinatayang 11,500 workers mula sa inaasahang 100,000 nito, ang nawalan ng trabaho simula nang ipatupad ang Alert Level 3 sa maraming lugar sa bansa, batay sa report ng Department of Labor and Employment (DOLE) ngayong Miyerkules.

Sa isang interview kay DOLE Secretary Silvestre Bello III, sinabi nito na inihahanda na nila ang pagbibigay ng financial assistance sa mga nawalan ng hanapbuhay sa Metro Manila at iba pang lugar na isinailalim sa Alert Level 3 sa gitna ng pagtaas ng COVID-19 cases.

“Although the estimate that there would be at least 100,000 to 200,000 workers that will be displaced because of the Alert Level 3, our experience, and I’m very happy to note, na as of yesterday, ang na-displace lang na workers because of Alert Level 3 ay 11,500 plus,” ani Bello.

Bukod sa bilang na ito, mayroon din aniyang tinatayang 20,000 workers naman na nabawasan ang kanilang working hours sa ilalim ng tinatawag na flexible working arrangement.

“Dahil nabawasan ang working hours nila, nabawasan ang kanilang kita, but the status of their employment is secured,” paliwanag ng kalihim.

Una nang sinabi ni Bello na ang DOLE ay naglaan ng P1 bilyon bilang antisipasyon sa posibilidad na ilang mga manggagawa ang pansamantalang ma-terminate o mabawasan ang kanilang working hours dahil sa mas mahigpit na quarantine status.

Aniya, aabot sa tig-P5,000 ang ibibigay na ayuda sa posibleng 100,000 hanggang 200,000 na displaced workers sa ilalim ng COVID-19 Adjustment Measures Program (CAMP).

Sa kasalukuyan, ang National Capital Region (NCR) at tinatayang 50 iba pang lugar ay isinailalim sa Alert Level 3 hanggang sa katapusan ng buwan.

Sa ilalim ng Alert Level 3, maraming establisimyento ang pinapayagang mag-operate ng 30% indoor venue capacity subalit eksklusibo ito para sa mga fully vaccinated individuals, at 50% outdoor venue capacity naman, basta ang mga empleyado ay fully vaccinated na.

Ang trabaho naman sa mga opisina ng gobyerno ay limitado rin sa 60% ng kanilang onsite capacity.