Lalaking nagbebenta ng sex videos ng mga bata, kinasuhan ng DOJ

ni Gela Fernando @ News | June 18, 2024

Nagsampa ng kaso ang mga piskal ng Department of Justice (DOJ) sa Regional Trial Court ng Cabanatuan, Nueva Ecija laban sa isang lalaki dahil sa pagbebenta ng malalaswang content ng mga menor-de-edad, ayon sa ahensya nitong Martes.

Sa ipinasang resolusyon, ang kaso ay para sa paglabag ng salarin sa Section 4(c) ng Republic Act 11930 o ang Anti-Online Sexual Abuse or Exploitation of Children (OSAEC) at Anti-Child Sexual Abuse or Exploitation Materials (CSAEM) Act.

Matatandaang nag-ugat ang kaso sa impormasyong natanggap ng National Bureau of Investigation (NBI) mula sa Inter-Agency Council Against Trafficking laban sa akusado nu'ng Marso.

Sa kanilang imbestigasyon, nakita nila ang mga social media accounts na nagbibigay ng mga malalaswang contents ng mga menor-de-edad para sa mababang halaga at maaari itong ma-access sa isang VIP Telegram Channel.

May mga under cover agents ang nagbayad upang matiktikan ang nasabing contents at doon nakatanggap ng link para sa mga sex videos kung saan kanilang nakita ang mismong suspek na pinagsasamantalahan ang ilang mga menor-de-edad sa iba't ibang videos.

Naglabas naman ang isang Korte sa Maynila ng warrant para maghanap, kumuha, at suriin ang computer data laban sa suspek nu'ng Mayo.

Sa paghahanap, natagpuan ng mga otoridad ang mga materyal ng sekswal na pang-aabuso at pananamantala sa mga menor-de-edad mula sa kanyang cellphone, mga parehong video na naka-post sa nasabing Telegram channel, na nagresulta sa kanyang pagka-aresto.

Samantala, binigyang-diin ng DOJ na sinisimbolo ng pagsasampa ng kaso ang pangako ng ahensyang protektahan ang mga indibidwal, at mga kabataan, mula sa posibleng pananamantala online.

400 PDLs, palalayain — DOJ

ni Eli San Miguel - Trainee @News | January 23, 2024

Inaasahang palalayain ng Bureau of Corrections (BuCor) ang halos 400 na mga persons deprived of liberty (PDLs) hanggang Enero 31, ayon sa Department of Justice (DOJ).

Sinabi ni DOJ Undersecretary Margarita Gutierrez na bahagi ang malaking bilang ng mga PDL na ilalabas sa patuloy na pagsusumikap ng pamahalaan na maibsan ang siksikan ng mga bilangguan nito.

“Ilan sa mga hakbang ng BuCor upang mapabilis ang pagpapalaya sa mga PDLs at maibaba ang congestion rate sa mga piitan ay ang probisyon ng serbisyong legal, paggamit at pagpapalakas ng single-carpeta system at pag-amyenda sa Rules of Parole and Executive Clemency,” paliwanag niya.

Binigyang-diin din niya na, “aabot na sa 9,228 persons deprived of liberty ang napalaya ng Bureau of Corrections sa ilalim ng Marcos administration bilang bahagi ng decongestion program ng pamahalaan.”

“Kabilang sa mga nakalaya ay mga acquitted, nakapagsilbi na ng kanilang sentensiya, at nagawaran ng parole at pardon,” aniya.

Sinabi niya na pinalaya ang 5,856 na Persons Deprived of Liberty (PDLs) noong 2023 at 3,372 PDLs na inilabas mula Hulyo hanggang Disyembre ng 2022.

Kasong terorismo vs 11 miyembro ng NPA, inirekomenda ng DOJ

ni Angela Fernando - Trainee @News | January 9, 2023

Nagpahayag ang  Department of Justice (DOJ) nitong Martes na kanilang inirekomendang sampahan ng kaso ng terorismo ang 11 sinasabing miyembro ng New People's Army (NPA).

Kinilala ang umano'y miyembro ng NPA na sina Jovito Marquez, Antonio Baculo, Sonny Rogelio, Veginia Terrobias, Lena Gumpad, Job Abednego David, Jessie Almoguera, Reina Grace, Bethro Erardo Zapra Jr., Daisylyn Castillo Malucon, at Yvaan Corpuz Zuniga.

Ayon sa DOJ, nasangkot sa isang ambush laban sa mga pwersa ng bansa ang 11 na indibidwal nu'ng Mayo 2023 sa Brgy. Malisbong sa Sablayan, Occidental Mindoro.

Dagdag ng ahensya, gumamit ang mga nasabing NPA ng mga high-powered firearms at improvised explosive devices.

Sinabi ng ahensya na itinuturing ng mga taga-prosecute ang pagsalakay bilang terorismo.