Pagbabawal sa disposable vapes, oks sa DOH

ni Eli San Miguel - Trainee @News | March 6, 2024

Nagpahayag ng suporta ang Department of Health (DOH) ngayong Miyerkules sa panukala ni Finance Secretary Ralph Recto na ipagbawal ang mga disposable vape products sa Pilipinas.

Sinabi ng DOH na nagdudulot ang lahat ng vape products ng malaking panganib sa kalusugan, kasama na ang "e-cigarette or vaping product use-associated lung injury" (EVALI), nicotine addiction, at mga sakit na respiratory at cardiovascular.

“Disposable vapes are also made with plastic and batteries which are not easily recyclable or biodegradable. These items result in electronic waste (e-waste) that contains harmful chemicals that can seep into soil and water sources, posing risks to both the environment and public health,” dagdag ng ahensya.

Noong Martes, inihayag ni Recto ang panukala na ipagbawal ang disposable vapes sa bansa dahil hindi raw rehistrado sa Department of Trade and Industry (DTI) ang karamihan sa mga ito at hindi nagbabayad ng excise taxes.

Noong una, sinabi ni Health Secretary Ted Herbosa na kanyang pinakiusap sa Philippine National Police (PNP) na tiyaking walang access ang mga menor-de-edad sa mga vape.

Binanggit din ni Herbosa ang kalbaryo sa pagtaas ng paggamit ng vape sa kabataan at binigyang-diin ang mga panganib sa kalusugan na dulot ng nicotine sa mga tao, sa pamamagitan man ng tabako o e-cigarette.

Gastroenteritis outbreak sa Baguio, tapos na — DOH

ni Eli San Miguel - Trainee @News | January 16, 2024

Opisyal nang nasugpo ang acute gastroenteritis outbreak sa Baguio City, ayon sa pahayag ng Department of Health (DOH) ngayong Martes.

Ayon sa datos mula sa Baguio City Health Services Office (CHSO), sinabi ni Health Undersecretary Eric Tayag na higit sa 3,000 na indibidwal ang naapektuhan ngunit walang namatay.

“Halos 400 ang talagang merong konsultasyon. Iilan lamang ang na-ospital,” sabi ni Tayag sa isang press briefing.

Iniulat ng CHSO noong Martes na may "steep downward trend" sa bilang ng mga kaso ng self-reported diarrhea cases sa Baguio mula sa 520 noong Enero 8, hanggang sa 13 lamang noong Enero 15.

Sinabi ni Tayag na mula lamang sa mga water refilling station ang mga water sample na positibo sa fecal coliform, samantalang negatibo sa pagsusuri ang pangunahing pinagkukunan ng tubig sa lungsod.

“Nai-report ng city health office sa amin na may na-isolate na virus—ang norovirus and sapovirus. Dito maiintindihan natin kung bakit naka-recover kaagad, sapagkat itong mga virus na ito, naging sanhi ng infection or diarrhea o acute gastroenteritis. Kadalasan bukod sa diarrhea ay nagsusuka at ito’y nakita sa mga pasyente na maaring nakuha sa contaminated water,” paliwanag niya.

Disgrasyang kaugnay ng paputok, 609 na — DOH

ni Eli San Miguel - Trainee @News | January 6, 2024

Iniulat ng Department of Health (DOH) ang siyam na bagong kaso ng pinsala na dulot ng paputok, na naitala mula alas-6 ng umaga noong Enero 5 hanggang alas-5:59 ng umaga ngayong Enero 6.

Nagdadala ito ng kabuuang bilang ng mga nadisgrasya sa 609 habang patapos na ang pag-mo-monitor ng DOH para sa fireworks season noong 2023.

Pinaalam rin ng ahensya na ang pinakabagong mga kaso, na may median age na 25, ay nagmumula sa walong taong gulang hanggang 55 taong gulang, kung saan kalalakihan ang 67 porsyento.

Binigyang-diin naman ng DOH na maaaring magkaroon ng karagdagang mga kaso na iuulat sa loob ng araw at kinukumpirma pa ang mga pinsalang dulot ng ligaw na bala (Stray Bullet Injuries o SBIs), na maaaring magdulot ng pagbabago ng kabuuang bilang sa mga susunod na araw.