Edad 12 to 15, oks nang turukan ng Pfizer vaccine

ni Lolet Abania | June 8, 2021

Pinalawak na ang ibinigay na emergency use authorization (EUA) sa Pfizer na sasakop sa indibidwal na puwedeng mabakunahan ng COVID-19 vaccine.

Ayon kay DOH Undersecretary Maria Rosario Vergeire, binigyan ng EUA ang Pfizer para magamit ang bakuna sa mga edad 12 at pataas.

“While we welcome more vaccines that are approved for children and adolescents, due to limited vaccine supply, our vaccination strategy remains the same -- prioritize the vulnerable and adhere to our prioritization framework,” ani Vergeire.

“The general consensus of our vaccine experts is to revisit pediatric and adolescent vaccination once our vaccine supply has stabilized,” dagdag niya.

Sa isang report, inamyendahan ng Food and Drug Administration ang EUA na kanilang inaprubahan para sa Pfizer-BioNTech's vaccine upang maabot nito ang mga nasa edad 12 hanggang 15.

Nakasaad sa kopya ng Pfizer EUA sa FDA website na, “Amendment to include minors was issued on May 28.”

Una rito, inaprubahan ang Pfizer jab para gamitin sa mga indibidwal na nasa 16-anyos at pataas.

Matatandaang sinabi ni FDA Director General Eric Domingo na ang mga eksperto ay nagbigay ng “very favorable” o napakakanais-nais na rekomendasyon para sa paggamit ng Pfrizer vaccine sa mga menor-de-edad.

Noong March, ayon sa American pharmaceutical giant, nagpakita ang vaccine ng 100% efficacy laban sa COVID-19 sa mga adolescents na may edad 12 hanggang 15. Inihayag din ng Malacañang na ang mga Filipino teen-agers ay mababakunahan ng Pfizer vaccine kapag dumating na ang mga supplies nito.

Inaasahan namang mabibigyan ng 40 milyong doses mula sa nasabing kumpanya ang bansa ngayong taon.

Publiko naalarma… Brand ng COVID-19 vaccines, ipapaalam pa rin bago iturok — DOH

ni Lolet Abania | May 20, 2021

Dahil sa pangamba ng publiko sa unang lumabas na pahayag na hindi na ipapaalam sa mga vaccination sites ang brand ng COVID-19 na ibabakuna upang maiwasan ang pagiging mapili ng mga tatanggap nito, nilinaw ng Department of Health na ipapaalam pa rin naman kung anong brand ng COVID-19 vaccine ang ituturok bago mismo ang pagbabakuna.

“'Pag sinabi naman na hindi natin ia-announce ‘yung brand, we are not going to announce the brand as of [that] day,” ani DOH Undersecretary Maria Rosario Vergeire sa isang interview ngayong Huwebes.

“Siyempre, bago ‘yan ibakuna sa inyo, sasabihin ano ‘yung ibibigay,” sabi naman ni Dr. Gloria Balboa, ang DOH regional director sa Metro Manila sa isa ring interview ngayong araw.

Ayon sa mga opisyal, ang bagong strategy na ito ay bahagi ng kanilang solusyon para maiwasan ang pagdagsa ng mga tao sa vaccination sites. Anila, ito ang naging desisyon ng DOH makaraang dumugin ang mga vaccination sites sa Parañaque at Manila nito lamang linggo dahil nabatid ng mga tatanggap ng bakuna na Pfizer vaccines ang ituturok sa kanila.

Matapos ang naturang insidente, sinabi ng ahensiya na ang available na brand ng vaccines ay hindi na iaanunsiyo sa publiko bago pa ang pagbabakuna.

Paliwanag ng DOH, sakali naman na tumanggi sa vaccination dahil sa mas gusto nila ang ibang brand na iturok sa kanila, babalik sila sa dulo ng linya o pipila ulit sila sa hulihan ng pagbabakuna.

“All of these vaccines that are in the country are going to protect them,” diin ni Vergeire.

“Wala naman pong isang mas magaling o magiging mas epektibo para sa kanila.”

Sinabi pa ni Vergerie na nagsasagawa na rin ang DOH ng masidhing information campaign para mabigyang pansin ang isyu tungkol sa COVID-19 vaccines.

Matatandaang hinimok ni Senator Risa Hontiveros ang DOH na irekonsidera ang kanilang polisiya na non-disclosure ng brand ng bakuna bago ang pagbibigay nito dahil lalong magdudulot ito ng pagdududa sa publiko sa vaccination program ng gobyerno.

Subalit sa isang statement, ayon sa DOH, “Not announcing what brand will be available in inoculation sites will not take away the right of individuals to be informed of the vaccine they are taking.”

“The vaccination process entails on-site vaccine education, proper recording using vaccination cards, and monitoring for Adverse Events Following Immunization,” dagdag pang pahayag ng ahensiya.

Galing ibang bansa, sa ika-8 day na iko-COVID-19 test

ni Mary Gutierrez Almirañez | May 5, 2021

Inirerekomenda ng Department of Health (DOH) sa Inter-Agency Task Force (IATF) na isagawa sa ika-7 o ika-8 araw ang pagkuha ng COVID-19 test sa mga biyaherong dumarating sa bansa, sa halip na kunin iyon sa ika-5 araw na unang ipinatupad, batay kay DOH Undersecretary Maria Rosario Vergeire.

Aniya, “That’s why we are revising again our protocol… We want to be sure that we get to identify all of these travelers coming in accurately so that we can isolate properly and we can break the chain of transmission, but this is still for approval in the IATF.”

Kaugnay ito sa naobserbahang hindi nasusunod o nakukumpletong mandatory 14-day quarantine ng isang biyahero pagkarating sa kanyang local government unit (LGU) na itinuturong dahilan kaya nagiging mabilis ang hawahan ng virus.

Paliwanag pa ni Vergeire, “We have seen that there are lapses in this kind of protocol that’s why we are revising so that we can have stricter border control especially now that there are different variants.”

Sa ngayon ay pumalo na sa 1,075 cases ang nakapasok na South African variant ng COVID-19 sa bansa. Tinatayang 948 naman ang nagpositibo sa United Kingdom variant, habang nananatili pa rin sa 2 ang Brazilian variant. Samantala, 157 na ang nagpositibo sa P.3 variant o ‘yung COVID-19 variant na na-develop sa ‘Pinas.

Patuloy pa rin namang pinagbabawalang makapasok sa bansa ang mga biyahero galing India upang maiwasan ang Indian variant.