'Di pa raw safe… Face shield, kailangan pa rin — Nograles

ni Lolet Abania | June 17, 2021

Kinakailangan pa rin ang pagsusuot ng face shield sa ibabaw ng face mask sa gitna ng patuloy na laban sa pandemya ng COVID-19, ayon kay Cabinet Secretary Karlo Nograles ngayong Huwebes.

Ito ang naging tugon ni Nograles matapos ang pahayag ni Department of Health (DOH) Undersecretary Leopoldo Vega kahapon, hinggil sa hindi na kailangang isuot ang face shield sa ibabaw ng face mask kung nasa labas. “We will run this through the IATF meeting later,” ani Nograles sa interview sa CNN Philippines.

Ang Inter-Agency Task Force (IATF) ay nagsisilbing policy-making body ng gobyerno sa pagtugon sa COVID-19 pandemic.

“Face shields are still required,” diin ni Nograles.

Sinabi naman ni Senate President Vicente Sotto III na pumayag si Pangulong Rodrigo Duterte na ang face shields ay dapat na lamang gamitin sa mga ospital.

“Last night, the President agreed that face shields should only be used in hospitals. Allowed us to remove ours! Attn DOH!” ani Sotto sa Twitter ngayon ding Huwebes.

Gayunman, wala pang kumpirmasyon ang Malacañang tungkol sa pahayag ni Sotto.

Nauna rito, si Presidential Spokesperson Harry Roque, na nagsisilbing tagapagsalita para sa IATF ay nananatili sa kanyang pahayag na ang pagsusuot ng face shield sa ibabaw ng face mask ay nakapagdaragdag ng proteksiyon laban sa COVID-19.

Ang naging pahayag ni Vega ang nag-udyok din kay DOH Undersecretary Maria Rosario Vergeire para banggitin ang Joint Memorandum Circular 2021-0001, kung saan nakasaad sa memo na “face shields are required to be worn in enclosed public spaces, schools, workplaces, commercial establishments, public transport and terminals, and places of worship.”

Subalit sa pareho ring memo, nakasaad na ang face shields ay kailangang isuot sa “other public spaces wherein 1 meter physical distancing is not possible and there is gathering of more than 10 people at the same venue at the same time” tulad ng sitwasyon sa mga palengke.

Samantala, ipinahayag ni DOH Secretary Francisco Duque III na iaapela niya kay Pangulong Duterte ang naging desisyon umano nito na i-require na lamang ang paggamit ng face shields sa mga ospital.

Giit ni Duque, hindi pa napapanahon para balewalain ang paggamit ng face shields sa dahilang ang pagbabakuna ng gobyerno ng COVID-19 vaccine sa mga mamamayan ay nananatiling mababa.

“Any layer of protection is better than less protection,” ani Duque.

Kinumpirma naman nina Senators Joel Villanueva at Juan Miguel Zubiri ang naging pag-uusap nina Pangulong Duterte at Sotto nitong Miyerkules ng gabi, subalit ito anila ay isa lamang “off the cut” at hindi opisyal na talakayan.

May hinihintay pa, nakatengga lang… 1 M doses ng Sinovac, 'di pa maiturok

ni Lolet Abania | June 14, 2021

Hindi pa naipapamahagi ng Department of Health (DOH) ang pinakabagong shipment ng Sinovac COVID-19 vaccine dahil hinihintay pa ng ahensiya ang pagsusumite ng isang certificate mula sa Chinese drugmaker.

Ayon kay DOH Undersecretary Maria Rosario Vergeire, hindi pa nai-release ng Sinovac ang certificate of analysis para sa karagdagang 1 milyong doses na nai-deliver sa Pilipinas noong nakaraang linggo.

“We cannot distribute or transport these vaccines to specific recipients... kung hindi kumpleto ang dokumento namin,” ani Vergeire sa isang briefing.

Noong nakaraang buwan, naantala rin ang pamamahagi ng Sinovac doses sa mga vaccination sites dahil sa kakulangan ng pareho ring certificate.

Samantala, ayon kay Vergeire, ang pag-distribute ng 2.2. milyong Pfizer doses na na-deliver kamakailan sa bansa ay sisimulan na.

Aniya, batay na rin kay Vaccine Czar Secretary Carlito Galvez, Jr., ang 40% ng bagong Pfizer shipment ay mapupunta sa Metro Manila, Metro Cebu, Metro Davao, Bulacan, Cavite, Pampanga, Laguna, Batangas at Rizal, kung saan ang COVID-19 infections ay napakataas, habang ang natitirang 60% ay ide-deploy sa ibang mga lugar na may mataas na bilang ng COVID-19 cases.

Sinabi rin ni Vergeire na ang lahat ng 2 milyong AstraZeneca doses na mag-e-expire sa katapusan ng Hunyo at Hulyo ay naipamahagi at na-administer na rin.

Mahigit sa 4.6 milyong indibidwal ang nabakunahan na hanggang nitong Hunyo 8, malayo pa rin sa target ng gobyerno na maturukan ng COVID-19 vaccines ang 50 milyon hanggang 70 milyong Pilipino ngayong taon.

Nagpapanggap na may sakit para mabukunahan agad, kakasuhan

ni Lolet Abania | June 11, 2021

Nagbabala ang Department of Health (DOH) sa publiko laban sa mga nagsisinungaling at nagpapalsipika ng mga dokumento hinggil sa pagkakaroon ng comorbidities upang makatanggap ng COVID-19 vaccine.

Ayon kay DOH Undersecretary Maria Rosario Vergeire, ang pagsisinungaling tungkol sa pagkakaroon ng anumang sakit ay isang paglabag sa Republic Act 11332 o ang Law on Reporting of Communicable Diseases.

“Hindi lang diyan, baka hahanap pa tayo ng ibang batas na puwede nating gamitin pero ‘pag nagpa-falsify po kasi tayo ng mga sakit natin, katulad niyan, it’s going to be on public record, meron po 'yang mga penalties na. Meron na po tayong bina-violate niyan sa ating existing laws in the country,” ani Vergeire sa briefing ngayong Biyernes.

“Don’t go to that strategy. Hindi n'yo po kailangang gawin 'yan. Mag-antay lang po tayo at darating ang mga bakuna para mabakunahan po tayong lahat,” sabi pa niya.

Sa lumabas na ulat nitong Huwebes, ang mga local authorities sa mga siyudad sa Cebu at San Juan ay nakahuli ng ilang indibidwal na nagsisinungaling hinggil sa pagkakaroon nila ng comorbidities para lamang mabakunahan kontra-COVID-19.

Sa ngayon, mga health workers, senior citizens, persons with comorbidities, at essential workers ang prayoridad na bakunahan dahil sa limitadong supply nito. Ang mga persons with comorbidities ay kailangang may pruweba ng kanilang medical condition sa pamamagitan ng pinakabagong prescription na ibinigay ng doktor, may medical certificate, o laboratory test result.

Ayon kay Vergeire, kahit na may mga indibidwal na nagsisinungaling para lamang mabakunahan, kung saan nagpapakita ito na mataas ang interes ng marami sa COVID-19 inoculation campaign, ang prioritization list pa rin ang kinakailangang sundin.

“You don’t need to fake your documents, hindi n'yo kailangang magsinungaling na may sakit kayo. Mabibigyan po kayo kasi karapatan n'yo po ‘yan,” sabi ni Vergeire.

Sa naitala ng DOH, nasa mahigit sa 4.6 milyong indibidwal na sa ngayon ang nabakunahan kontra-COVID-19 hanggang nitong June 8.