3rd dose ng Pfizer, tablado sa DOH

ni Lolet Abania | July 9, 2021

Hindi pa inirerekomenda ng mga lokal na eksperto ang pagkakaroon ng isang booster COVID-19 shot dahil limitado pa ang datos nito, ayon sa Department of Health (DOH), matapos na ang American drugmaker na Pfizer ay nag-anunsiyong kakailanganin nila ang awtorisasyon para sa third dose ng kanilang bakuna.

“Ang kanilang rekomendasyon, hindi pa. Hindi pa natin ‘yan irerekomenda. Kailangan pa ng mas maraming ebidensiya para masabi natin that it’s going to be safe. Ang ating primary consideration dito is safety,” ani DOH Undersecretary Maria Rosario Vergeire sa briefing ngayong Biyernes at aniya, ang booster shot ay tinatalakay pa ng mga eksperto nito lamang Huwebes.

Paliwanag din ni Vergeire, ang pagkakaroon ng booster dose ay nakadepende sa itatagal o haba ng immunity na naibigay ng isang vaccine sa nakatanggap na indibidwal.

“Wala pang manufacturer na nakakapagbigay talaga ng eksakto na sinabi nilang, ‘Itong bakuna ko, hanggang anim na buwan lang at kailangan mo na muling ulitin.’ Wala pang ganu’ng ebidensiya,” ani Vergeire.

Nanawagan din si Vergeire para sa tinatawag na “solidarity” sa paghihintay na mabakunahan muna ang malaking populasyon ng bansa bago isipin ang pagkakaroon ng booster shots.

Nurse, medtech at Chinese na nagbenta ng Sinovac, arestado

ni Lolet Abania | July 2, 2021

Muling ipinaalala ng Department of Health (DOH) sa publiko na ang mga COVID-19 vaccines ay hindi ipinagbibili matapos na tatlo umanong sellers ng Sinovac doses ang inaresto.

Una nang sinabi ng National Bureau of Investigation (NBI) na nadakip nila ang tatlo sa apat na suspek na sangkot sa pagbebenta ng COVID-19 vaccines.

Isang entrapment operation ang ikinasa ng NBI Task Force Against Illegal Drugs (NBI-TFAID) kung saan nadakip ang isang nurse, isang medical technologist at isang Chinese na nagbebenta umano ng Sinovac vaccines.

Nakatanggap ng impormasyon ang NBI hinggil sa pagbebenta ng grupo ng nasabing bakuna. Isang poseur buyer ang bumili sa mga suspek ng 300 doses ng CoronaVac na nagkakahalaga ng P840,000.

Ayon pa sa NBI, kadalasang buyer nito ay mga Chinese.

Inaalam na rin ng ahensiya kung saan nanggaling ang supply nila ng naturang bakuna. Nagpahayag naman ng kalungkutan si DOH Undersecretary Maria Rosario Vergeire nang mabatid ang insidente.

“Bakit kailangang magkaroon ng ganitong pagkakataon na people are taking advantage of what we have right now?” ani Vergeire sa briefing ngayong Biyernes.

Hinimok naman ng kalihim ang publiko na tumanggap lamang ng COVID-19 vaccine mula sa gobyerno at hindi sa iba pa.

“‘Wag po kayong bibili sa ibang mga tao dahil wala po silang pagkukunan ng bakunang ‘yan, because it is just national government which can access these vaccines for now,” paliwanag ni Vergeire.

“Kahit isang dose lang po ng bakuna ang nasasayang dahil sa mga ganitong pamamalakad ay napakaimportante na po para sa atin,” dagdag niya.

Ang tatlong naarestong indibidwal ay sasampahan ng kaso dahil sa paglabag sa Food and Drug Administration Act.

Healthcare workers sa Indonesia, nagpositibo kahit nabakunahan na… Sinovac, epektibo pa rin — DOH

ni Ronalyn Seminiano Reonico | June 19, 2021

Iginiit ng Department of Health (DOH) na epektibo pa rin ang Sinovac ng China laban sa COVID-19 matapos maiulat ang 350 healthcare workers sa Indonesia na naturukan ng nasabing bakuna ngunit nagpositibo pa rin sa Coronavirus.

Pahayag ni DOH Undersecretary Maria Rosario Vergeire, "Let's get the vaccine. Let us not be doubtful. Let's give that confidence.”

Saad pa ni Vergeire, "Hindi po natin maikakaila na may breakthrough infections... pero kailangan pa rin po natin ng kumpletong datos para ma-analyze nang maigi.”

Karamihan umano sa mga healthcare workers na nagpositibo sa COVID-19 sa Indonesia ay asymptomatic at nagse-self-isolate sa bahay, ngunit ang ilan ay kinailangang i-admit sa ospital dahil sa mataas na lagnat at pagbaba ng oxygen-saturation levels, ayon kay Badai Ismoyo, head ng health office ng Kudus District sa Central Java.

Ayon naman kay Vergeire, kung 350 ang nagpositibo sa 5,000 health workers sa Indonesia, 7% lamang ito at masasabing epektibo pa rin ang Sinovac sa natitirang 93%.

Noong Enero nagsimulang magbakuna ang Indonesia sa mga healthcare workers na priority group at ayon sa Indonesian Medical Association (IDI), karamihan sa mga ito ay nakatanggap ng Sinovac COVID-19 vaccine mula sa China.

Ayon din naman sa public health experts sa Indonesia, bumaba ang bilang ng mga healthcare workers na namatay sa COVID-19 noong Enero hanggang Mayo ngunit nababahala sila sa pagtaas ng kaso sa Java.

Saad pa ni Dicky Budiman, epidemiologist ng Australia Griffith University, "The data shows they have the Delta variant (in Kudus) so it is no surprise that the breakthrough infection is higher than before, because, as we know, the majority of healthcare workers in Indonesia got Sinovac, and we still don’t know yet how effective it is in the real world against the Delta variant.”

Samantala, ayon kay Vergeire, hindi dapat mabahala ang mga Pilipino at wala pa umanong naitatalang kaso ng adverse events “which have direct causality with the vaccine."