8 patay sa Delta variant sa iba't ibang probinsiya

ni Lolet Abania | July 30, 2021

Inianunsiyo ng Department of Health na anim sa walong Delta variant na nasawi ay mga local cases.

Ayon kay DOH Undersecretary Maria Rosario Vergeire, ang mga namatay sa Delta variant na kanilang naitala ay mula sa San Nicolas, Ilocos Norte (1), Balanga, Bataan (1), Pandan, Antique (1), Cordova, Cebu (2), Pandacan, Manila (1).

Ang dalawa pang nasawi sa Delta variant ay mga returning overseas Filipinos (ROFs).

Sinabi ni Vergeire na ang mga namatay ay nasa edad 27 hanggang 78, kung saan 5 sa kanila ay lalaki.

Tatlo naman sa mga ito ay nakumpirmang hindi pa nababakunahan kontra-COVID-19 habang ang 5 ay isinailalim sa beripikasyon.

“We are continuously validating and verifying,” ani Vergeire sa briefing ngayong Biyernes.

Samantala, binanggit ng kalihim na pinag-aaralan na ng mga awtoridad ang posibleng community transmission ng mas nakahahawang Delta variant.

Aniya, ang community transmission ay pagkakaugnay ng mga kaso subalit hindi pa nila ito ma-identify.

“Sa ngayon, nakikita pa natin ang pagkaka-link ng mga kasong ito sa isa’t isa… pero siyempre, gusto pa rin nating maghanda dahil hindi po natin masasabi sa ngayon dahil hindi naman natin tine-test lahat ng merong sakit na positive sa COVID-19,” sabi ni Vergeire.

“We just need to act as if there is already this type of transmission happening in the country para mas maging cautious tayong lahat, meron tayong extra precaution. But for now, we cannot declare that because we need evidence for us to say that there is really community transmission of the Delta variant,” dagdag ng kalihim.

Sa ngayon, nakapagtala na ng 216 Delta cases sa bansa.

6 rehiyon, binabantayan ng DOH sa biglang pagtaas ng COVID

ni Lolet Abania | July 26, 2021

Anim na rehiyon ang mino-monitor ngayon ng Department of Health (DOH) matapos na magpakita ng tinatawag na “trend reversal”, mula sa negatibo ay naging positibo sa 2-linggong case growth rate na nagresulta sa pagtaas ng COVID-19 infections.

Ayon kay DOH Undersecretary Maria Rosario Vergeire, ang anim na region na kanilang mino-monitor ay Metro Manila, Cagayan Valley, Central Luzon, Calabarzon, Central Visayas, at Northern Mindanao.

Paliwanag ni Vergeire, ang reproduction number ay bilang ng mga tao na bawat isang kaso nito na maaaring maka-infect, kung saan nakapagtala ng 1.009 sa Metro Manila, 0.95 sa Cagayan Valley, 1.12 sa Central Luzon, 0.98 sa Calabarzon, 1 sa Central Visayas, at 0.91 sa Northern Mindanao.

Kapag ang reproduction number ay 1 o mas mataas pa, ibig sabihin, nagpapatuloy ang COVID-19 transmission.

Sa buong bansa, lumabas na tumaas ang mga kaso ng COVID-19 ng 1% nito lamang Hulyo 11 hanggang 24, subalit aniya, dapat na maging maingat sa paggamit ng salitang “surge” para ilarawan ang pagtaas ng infections.

“Ang surge, meron ‘yang definition sa epidemiology which is not what’s happening right now. Tumataas mga kaso — that, we can verify,” paliwanag ni Vergeire.

Ayon din kay Vergeire, ang Cordillera at Ilocos regions ay nakapagtala naman ng isang positive 2-linggong case growth rate nitong anim na linggo lamang, habang ang Northern Mindanao at Davao region ay maingat nilang binabantayan dahil sa mataas na ICU utilization rate.

Mino-monitor din ng DOH ang 26 probinsiya na nakapagtala ng mataas na average daily attack rate at low-risk hanggang moderate-risk sa 2-linggo case growth rate subalit hindi na binanggit ng ahensiya ang mga lugar.

Nakaalerto naman ang mga awtoridad matapos na kumpirmahin ng DOH ang local transmission ng mas nakahahawang Delta variant.

Sa ngayon, nasa 119 kaso na ang tinamaan ng Delta variant, habang 12 ang nananatiling active case.

Central Visayas, nasa third wave ng COVID-19 pandemic

ni Lolet Abania | July 12, 2021

Iniulat ni Dr. Eugenia Mercedes Caña, chief ng Department of Health Regional Epidemiology and Surveillance Unit (DOH RESU-7) ngayong Lunes na ang Central Visayas ay nasa third wave na ng COVID-19 pandemic.

“Yes. We are in a third wave now. We have been monitoring the cases for the last 4 weeks in Central Visayas, not just Cebu City and our epidemic curve shows an upward trend,” sabi ni Caña.

Dagdag niya, ang pangunahing dahilan ng pagtaas ng kaso ay ang mas maraming transmissible variants ng coronavirus na sanhi ng COVID-19.

“The virus keeps on evolving as its nature to mutate resulting to different variants which increases the virus’ transmissibility,” paliwanag ni Caña.

Isa pa sa mga nakikitang dahilan ng trend ng sakit ay ang mga gatherings o pagtitipun-tipon na isinasagawa ng ilang residente gaya ng mga kasal, fiesta at selebrasyon ng mga kaarawan.

“These events drive the transmission because you bring people together without observing the public health measures,” sabi ni Caña.

May isa pang binanggit na rason si Caña tungkol dito, ang hindi tamang pagpapatupad ng public health at social measures, at ang hindi pantay na distribusyon ng COVID-19 vaccines.

Subalit, ayon sa DOH Region VII, ang nasabing rehiyon ay mas mabuti na sa ngayon kumpara nu'ng second wave ng pandemya noong Pebrero at Marso.

Samantala, ayon kay DOH Undersecretary Maria Rosario Vergeire, bineberipika na ng DOH central office ang naging pahayag ng DOH RESU-7.

Sa isang interview kay Vergeire ngayong umaga, ang Region 7 ay nakapagtala ng 2-linggong case growth rate ng -7% at average daily attack rate ng 4.5 cases kada 100,000 population.

“‘Pag tiningnan po natin ‘yan, medyo mababa pa po ‘yan and we cannot consider that as high-risk as of now,” sabi ni Vergeire.

Gayunman, paliwanag ni Vergeire, ang DOH regional offices ay may kani-kanyang sariling granular analysis ng COVID-19 data.

“Bunsod lang ito ng kanilang pag-a-analyze ng kanilang datos. Atin pong bine-verify ‘yan 'pag ganyan at kung sakaling may kulang pa silang impormasyon na naibigay, isu-supplement po natin ‘yan,” pahayag ni Vergeire.