600K trike drivers, mabibigyan na ng fuel subsidy — DILG

ni Lolet Abania | June 28, 2022

Umabot sa kabuuang 617,806 kuwalipikadong tricycle drivers sa buong bansa ang nakatakda ngayon na mabigyan ng kanilang fuel cash subsidy, ayon sa Department of the Interior and Local Government (DILG).

Sa isang pahayag ni DILG Secretary Eduardo Año, sinabi nitong nasa 148,784 mula sa 766,590 tricycle drivers na nag-apply para sa fuel subsidy ang na-disqualified dahil sa kakulangan ng kailangang verification gaya ng driver’s license numbers, hindi kumpleto ang e-wallet information, o mga pangalan na isinumite lang matapos ang deadline.

“Lahat ng nasa masterlist ng qualified tricycle drivers ay makakatanggap ng fuel subsidy. Hintayin na lang po natin ang abiso ng LTFRB para sa mga detalye at karagdagang impormasyon,” sabi ni Año.

Una nang nag-isyu ang DILG ng Memorandum Circular 2022-047, na nag-uutos sa local government units (LGUs) para mag-submit ng validated list ng mga tricycle drivers; tricycle franchisees; addresses; electronic wallet accounts; at ang bilang ng mga operating tricycles at iba pang detalye sa loob ng kani-kanilang hurisdiksyon.

Ang mga naturang mga detalye ay dapat suriin naman ng head ng Tricycle Franchising Board at ng head ng lokal na Tricycle Operators and Drivers Association.

7 illegal websites ng e-sabong, isinara — DILG

ni Lolet Abania | May 25, 2022

Pitong ilegal na websites ng e-sabong operations ang ipinasara na habang iimbestigahan ang administrators ng mga ito, ayon sa Department of the Interior and Local Government (DILG) ngayong Miyerkules.

Sa isang statement, sinabi ni DILG spokesperson Undersecretary Jonathan Malaya, nagsasagawa na ang Philippine National Police Anti-Cybercrime Group (PNP-ACG) ng imbestigasyon para tukuyin ang mga administrators ng ilegal na mga websites.

“These criminals thrive on the anonymity of the internet and they are taking advantage of this, but the PNP together with our colleagues from the National Bureau of Investigation will not rest until they have been unmasked,” ani Malaya.

Sa ngayon, nakapag-monitor ang PNP ng 12 websites at walong social media platforms na patuloy na nag-o-operate ng e-sabong activities sa kabila ng pagba-ban nito na ipinag-utos ni Pangulong Rodrigo Duterte.

Ayon kay Malaya, nakipag-ugnayan na ang DILG sa Department of Information and Communication Technology (DICT) upang isara ang mga naturang websites. Gayundin aniya, hiniling na ng ahensiya sa Meta, ang parent company ng Facebook, na agad na i-delete o i-suspend ang mga pahina ng kanilang platform na nagsasagawa ng e-sabong activities.

Sinabi rin ni Malaya na humingi na ang DILG ng assistance sa Globe, kung saan ang mga bettors at operators ay gumagamit ng GCash at katulad na platforms bilang mode of payment, upang maiwasan ang naturang platform na magamit sa ilegal na gawain. Matatandaang nai-report ang pagkawala ng 34 sabungeros. Kasunod nito, inaprubahan ni Pangulong Duterte ang rekomendasyon ng DILG na itigil ang e-sabong.

Pagpapaliban ng barangay elections nasa susunod na administrasyon — DILG

ni Lolet Abania | May 20, 2022

Nasa susunod na administrasyon na ang desisyon para ipagpaliban ang pagsasagawa ng barangay elections sa 2022, ayon sa Department of the Interior and Local Government (DILG).

“The DILG will leave it to the wisdom of the incoming Congress and President if they will enact a law postponing the barangay and SK [Sangguniang Kabataan] election,” pahayag ni DILG spokesperson Undersecretary Jonathan Malaya sa isang mensahe sa GMA News ngayong Biyernes.

“Otherwise it would be held as scheduled in December 2022,” saad pa ni Malaya. Nitong Huwebes, sinabi ni House Majority Leader Ferdinand Martin Romualdez na mahigit sa P8 bilyong halaga ng savings ang matitipid kung ang barangay elections ngayong taon ay maipagpapaliban.

Matatandaang noong Nobyembre 2021, isang bill ang inihain sa House of Representatives na layong ipagpaliban ang December 2022 barangay at Sangguniang Kabataan elections na gawing Mayo 2024.

Si Romualdez, na pinsan ni presumptive President Ferdinand “Bongbong” Marcos Jr., ay sinusuportahan ng mga prominenteng mambabatas at political parties para maging susunod na Speaker ng House of Representatives.

Una nang sinabi ni Marcos sa kanyang pangangampanya na sa halip na i-postpone ang barangay elections, isusulong niya ang pag-amyenda ng Local Government Code. Ayon pa kay Marcos, itutulak niya ang pagkakaroon ng 5-taong termino para sa mga barangay officials kapag nanalo siya sa pagka-pangulo.