108 sa 496 na nag-swimming sa Caloocan, na-trace na — DILG

ni Ronalyn Seminiano Reonico | May 13, 2021

Na-trace na ang 108 sa 496 na sangkot sa mass gathering sa Caloocan City public pool kamakailan sa kabila ng mahigpit na pagpapatupad ng COVID-19 health protocols, ayon sa Department of the Interior and Local Government (DILG).

Pahayag ni DILG Spokesperson Jonathan Malaya, “Mahirap nga po ang contact tracing sa sitwasyon na ito dahil marami pong kapabayaan ang management ng resort. In fact, hindi po kumpleto ‘yung mga impormasyon na nakalagay doon sa kanilang logbook o sa guest stubs.

“Lumalabas po na 496 ‘yung guest stubs na in-issue nila at hindi naman po natin alam kung lahat po talaga ng taong pumunta roon ay nag-fill-up ng guest stubs.

“Du’n po sa 496 na ‘yun, 232 ang may cellphone number ngunit hindi naman po ma-contact ang lahat ng ito.”

Ayon din kay Malaya, sa mga na-contact nilang pumunta sa naturang resort, 180 ang mula sa Caloocan City, 11 ang mula sa Bulacan, 3 ang mula sa Malabon, 5 ang mula sa Manila, 26 ang mula sa Quezon City at 7 ang mula sa Valenzuela City.

Samantala, aniya, isinailalim na sa antigen COVID-19 test ang 72 sa 108 na na-trace na.

Aniya, “Wala pa pong report sa amin ang local government unit (LGU) kung may nag-positive rito sa mga pumunta, mga na-contact natin na pumunta sa resort.”

May-ari ng Gubat sa Ciudad at bgy. chairman sa Caloocan, kinasuhan na

ni Ronalyn Seminiano Reonico | May 11, 2021

Pormal nang kinasuhan ang may-ari ng Gubat sa Ciudad public pool at ang chairman ng barangay sa Caloocan City na nakakasakop dito matapos mabuking ang operasyon nito sa kabila ng pagsasailalim sa NCR Plus sa modified enhanced community quarantine (MECQ).

Nagsampa sina City Health Officer Evelyn Cuevas at Business Permit and Licensing Office Head Emmanuel Emilio Vergara ng kasong administratibo laban kay Barangay 171 Chairman Romero Rivera dahil sa gross negligence of duty.

Pahayag naman ni Interior Secretary Eduardo Año, "Ang atin pong PNP at LGU ng Caloocan City ay nagsasagawa na ng pag-file ng kaso sa mga violators, kasama na po ang owner ng Gubat sa Ciudad Resort at ang pag-summon at pag-aresto sa barangay captain ng Barangay 171 sa Caloocan City sapagkat hindi niya naipatupad ang community health protocol."

Tinatayang aabot sa 300 katao ang involved sa naturang mass gathering na naganap sa resort.

Samantala, dahil sa insidente ay sinibak din sa puwesto ang commander ng Police Community Precinct Station 9 na si Maj. Harold Aaron Melgar, ayon kay Caloocan City Police Chief Col. Samuel Mina.

Si PLt. Ronald Jasmin Battala naman ang inatasan ni Mina na maging kapalit ni Melgar bilang bagong Station 9 commander.

Ipinag-utos din ni Mina sa lahat ng station commanders na magsagawa ng inspeksiyon sa mga nakatalagang areas of responsibility, maging sa mga business establishments.

Mga mayor, kakasuhan sa paglabag sa social gathering

ni Lolet Abania | May 8, 2021

Posibleng masampahan ng kaso ang mga lokal na opisyal ng gobyerno dahil sa pagkabigo ng mga ito na ipagbawal ang mga mass gatherings sa kanilang lugar, ayon sa Department of Interior and Local Government (DILG).

Sa isang statement ng DILG, ibinabala nito na ang pagkabigo ng mga local officials na ipatupad ang mga health protocols ay maaaring humantong sa tinatawag na administrative sanction o criminal charge for dereliction of duty sa ilalim ng Revised Penal Code.

“Maaaring administrative complaint or criminal case ang isampa laban sa pabayang LCEs (local chief executives). Hindi po gusto ng DILG na dumating sa puntong gawin ito, kaya sana ipatupad nang maayos ng LGUs (local government units) ang polisiya sa mass gatherings ayon sa quarantine classification sa kanilang lugar,” ani DILG Secretary Eduardo Año.

Batay sa guidelines ng Inter-Agency Task Force Against COVID-19 noong April 15, ang pagtitipon sa labas ng mga tahanan at pagtitipon sa loob ng tirahan ay ipinagbabawal sa mga lugar na nasa ilalim ng enhanced community quarantine (ECQ), modified ECQ (MECQ), at general community quarantine (GCQ).

Gayunman, ang mga gatherings ay pinapayagan ng hanggang 50 porsiyento ng seating o venue capacity lamang sa mga lugar na nasa modified GCQ (MGCQ), habang ang mga gatherings para sa itinatakdang government services at tinatawag na authorized humanitarian activities ay pinapayagan sa lahat ng lugar sa ilalim ng ECQ, MECQ, GCQ, at MGCQ.

Ipinagbabawal naman ang religious gatherings sa ilalim ng ECQ, habang pinapayagan ito sa MECQ para sa 10 hanggang 30 porsiyento ng seating capacity, depende rin sa regulasyong ipinatutupad ng lokal na pamahalaan.

Sa lugar na nasa GCQ, pinapayagan ito ng hanggang 30 hanggang 50 porsiyento habang sa MGCQ, pinapayagan ito ng hanggang 50 porsiyento ng seating capacity.

Ang mga necrological services o burol at libing ng namatay na hindi sa COVID-19 ay pinapayagan subalit limitado ito para sa mga miyembro ng pamilya sa lugar sa ilalim ng ECQ at MECQ, habang sa GCQ, pinapayagan ng 30 hanggang 50 percent capacity at sa MGCQ naman ay pinapayagan ng 50 percent ng venue capacity.

Ipinagbabawal pa rin sa mga lugar na nasa ECQ, MECQ at GCQ ang movie screenings, concerts, sporting events, entertainment activities, at work conferences, habang sa lugar na nasa MGCQ, pinapayagan ito ng hanggang 50 percent ng seating capacity subalit dapat na sumusunod sa ventilation standards.

Hinimok naman ni Año ang publiko na maghain ng kanilang reklamo laban sa mga tiwaling local officials sa DILG Regional Offices o sa DILG Emergency Operations Center at dilgeoc.complaint@gmail.com o tumawag sa (02) 8876-3454 local 881 to 884.