Panuntunan para sa granular lockdown, ilalabas na – DILG

ni Lolet Abania | September 12, 2021

Nakatakdang ilabas ang mga guidelines para sa pagpapatupad ng bagong COVID-19 alert level system sa Lunes, Setyembre 13 o sa Martes, Setyembre 14, ayon sa Department of the Interior and Local Government (DILG).

Matatandaang ipinahayag ng national government na magpapatupad na lamang ng dalawang quarantine classifications sa pilot implementation ng alert level system sa Metro Manila, kung saan nasa ilalim ngayon sa modified enhanced community quarantine hanggang Setyembre 15 o hanggang ang pilot quarantine with the alert level system ay ipatupad.

Ayon kay DILG spokesman Jonathan Malaya, pinaplantsa pa nila ang ilang probisyon ng alert level system subalit ilalabas din agad nila ito.

“Baka bukas or Tuesday, ilalabas na ito, after finally maaprubahan ng IATF (Inter-Agency Task Force on Emerging Infectious Diseases.),” ani Malaya sa isang radio interview ngayong Linggo.

Samantala, sinabi ni Malaya na para sa mga indibidwal na may vaccination schedules subalit nasa ilalim ng granular lockdown, sila ay hindi papayagan.

“Hindi muna sila mababakunahan. Mag-aantay sila until makatapos ang quarantine period and then puwede na sila mabakunahan agad,” sabi ni Malaya.

Dagdag pa ng opisyal na mababakunahan pa rin sila sa mga susunod na mga araw kung saan isasaayos ito ng kanilang local government units.

“’Yan ang naging arrangement namin with different LGUs. ‘Yung mga hindi nakarating sa previous sched, puwede mag-walk-in,” sabi pa ni Malaya.

Giit pa ni Malaya na ang mga authorized persons outside of residences APORs, kabilang na ang mga essential workers, ay hindi papayagang lumabas kung ang kanilang lugar ay isinailalim sa Alert Level 4.

Ang Alert Level 4 ay ang tinatawag na highest risk classification, kung saan ang dine-in, personal services, at mass gatherings ay hindi pinapayagan.

Pinayuhan naman ni Malaya ang mga essential workers na magpunta o manatili na muna sa kanilang mga kaanak hanggang hindi pa inalis ang granular lockdown sa kanilang lugar.

Mga usisero sa hostage taking sa Caloocan, wanted sa DILG

ni Lolet Abania | August 30, 2021

Naglabas ng direktiba ang Department of the Interior and Local Government (DILG) na agad magsagawa ng contact tracing sa Caloocan City matapos dagsain ng mga nag-uusyoso ang naganap na hostage-taking kamakailan.

Matatandaang nitong Biyernes nang gabi, naganap ang pangho-hostage ng isang lalaki na nasa impluwensiya umano ng droga sa isang 12-anyos na batang lalaki sa C3 Road, Caloocan City .

Nasagip naman ang bata ng mga awtoridad habang nakakulong na ang suspek.

Gayunman, kitang-kita sa video na dinumog ng mga tao ang hostage-taking incident na hindi alintana ang pandemya.

Agad namang kinordon ang lugar habang sinabihan na lumayo at pinaaalis ng mga pulis ang mga tao na nasa crime scene.

Ikinabahala ito ng DILG kaya ipinag-utos ng ahensiya ang agarang contact tracing sa lugar.

"Nagkaroon ng unnecessary mass gathering kaya dapat ay tutukan ‘yan ng barangay at baka magkaroon ng transmission diyan lalo na Delta variant,” ani DILG Secretary Eduardo Año.

Epalitiko na gagamitin sa kampanya ang COVID pandemic, lagot!

ni Lolet Abania | May 24, 2021

Ipinahayag ng Department of the Interior and Local Government (DILG) na wala pa silang naitatalang insidente hinggil sa mga politicians na ginagamit ang pandemya ng COVID-19 upang i-promote na ang sarili para sa halalan sa Mayo 2022.

Sinabi ni DILG Undersecretary at Spokesperson Jonathan Malaya na wala pa silang na-monitor na lokal na opisyal na nagbibigay ng cash assistance sa mga mahihirap at nagsasagawa ng sariling vaccination program para sa pulitikal na pangangampanya.

“The position of the DILG has been very consistent. Any aspect of the COVID-19 response shall not be used for political purposes,” ani Malaya sa isang press briefing na inorganisa ng National Task Force to End Local Communist Armed Conflict (NTF-ELCAC) ngayong Lunes.

Ayon kay Malaya, isang probisyon sa 2021 General Appropriations Act ang nagbabawal ng paglalagay ng pangalan, larawan at iba pang katulad nito ng mga public officials sa mga proyekto ng gobyerno.

“If ever there is such an incident, please report it to the DILG and we will investigate these local officials,” sabi ni Malaya.

Matatandaang nagbabala na rin sina Senador Richard Gordon at Senador Sonny Angara laban sa tinatawag na politicizing ng mga pulitiko sa kampanya ng pagbabakuna ng pamahalaan.