30-araw para magpabakuna kontra-COVID-19.. “No vax, no ride”, ipapatupad — DOLE, DILG, DOTr

ni Lolet Abania | January 26, 2022

Bibigyan na lamang ang mga hindi bakunado at partially vaccinated na mga manggagawa sa National Capital Region (NCR) ng 30 araw simula Enero 26, upang magpatuloy sa pagsakay sa mga pampublikong transportasyon para sa pagpunta nila sa iba’t ibang lugar sa Metro Manila, ayon sa isang joint statement na inilabas ng Departments of Labor and Employment, Transportation, at Interior and Local Government ngayong Miyerkules.

Batay sa statement, hindi na papayagan ang mga ito na sumakay sa mga public utility vehicles (PUV) kung sila ay hindi pa rin fully vaccinated hanggang sa pagtatapos ng 30-day period.

Ayon kay DOTr Undersecretary Artemio Tuazon Jr., ang gawaing ito ay sumusuporta sa gobyerno sa pagsisikap nitong mapataas ang COVID-19 vaccination rate ng bansa sa gitna ng banta ng mas nakahahawang Omicron variant.

“This joint decision is also meant to support the vaccination drive of the entire government. We want our workers to get fully vaccinated especially now that there is no longer a shortage of COVID-19 vaccines, and there is a threat of highly transmissible variants of the virus,” ani Tuazon.

“We are giving our workers the time to get themselves vaccinated,” dagdag pa niya. Nilinaw naman ng DOTr official, na hindi aniya ito matatawag na discriminatory.

“As jointly decided by the DOLE, DILG and DOTr, workers who will remain unvaccinated 30 days after the announcement are not being barred from their workplaces,” giit ni Tuazon.

“They are simply not allowed to use public transportation, but can still use other means such as active transport, private vehicles, or company shuttle services,” paliwanag niya.

Matatandaang nagpahayag ang mga transport rights groups at human rights advocates ng kanilang posisyon hinggil sa “no vax, no ride” policy, kung saan anila, mas organisado at mas sistematikong pamamaraan ang kailangan para mapigilan ang pagkalat ng virus.

Paliwanag naman ng DOTr, ang kanilang polisiya ay para maprotektahan ang mga unvaccinated na tamaan ng naturang respiratory disease, at upang mapigilan ang ekonomiya na tuluyang bumagsak dahil sa pagsasara ng maraming establisimyento.

“If we do not act now, all industries and business sectors will be severely affected,” ayon pa sa statement.

Nagpositibo sa self-administered COVID-19 test kits, dapat ipaalam sa barangay – DILG

ni Lolet Abania | January 21, 2022

Hinimok ng Department of the Interior and Local Government (DILG) ang publiko lalo na iyong mga nagpopositibo sa ginagawang COVID-19 self-administered test kits na dapat nilang i-report ito sa kani-kanilang barangay officials.

“Halimbawa nag-positive kayo, i-report niyo na sa barangay dahil unang-una, aalagaan kayo ng barangay,” sabi ni DILG Undersecretary Martin Diño sa Laging Handa public briefing ngayong Biyernes.

Ito ang naging pahayag ni Diño nang tanungin tungkol sa ilang mga indibidwal na nagpositibo sa ginawang self-administered COVID-19 test habang pinili nitong sumailalim na lamang sa self-quarantine, subalit hindi ito inire-report sa mga awtoridad.

Ayon kay Diño, kapag ini-report nila ang sarili, makapagpo-provide ang mga awtoridad ng contact tracing, mamo-monitor ang kanilang health, at mabibigyan ng iba pang uri ng assistance.

Kaugnay nito, kailangan na aprubahan muna ng Food and Drug Administration (FDA) ang mga self-administered COVID-19 antigen test kits. Gayunman, sa ngayon ang mga ito ay ginagamit na ng marami.

Hanggang nitong Enero 18, tinatayang nasa 11 manufacturers ng self-administered antigen test kits ang nag-apply na sa FDA para sa approval nito.

Una nang sinabi ni Department of Health (DOH) Epidemiology Bureau Director Dr. Alethea de Guzman na ang bilang ng COVID-19 infections sa bansa ay aniya, “understated.”

“Kapag hindi kayo nagpa-RT-PCR or hindi kayo na-antigen, hindi kayo masasama sa bilang,” ani De Guzman.

“But there are also those who are asymptomatic, unknowingly infected na hindi natin nade-detect kaya hindi rin po sila nabibilang doon sa total confirmed cases natin,” sabi pa ni De Guzman.

Dahil sa backlog.. 7 sa 10, kayang bigyan ng COVID-19 vaxx certificate — DILG

ni Lolet Abania | January 14, 2022

Pito lamang sa 10 indibidwal na nag-apply para sa COVID-19 vaccination certificate sa pamamagitan ng VaxCertPH portal ang maaaring makakuha ng sertipikasyon, dahil ito sa tinatawag na backlogs sa data uploading, ayon sa Department of the Interior and Local Government (DILG).

Paliwanag ni DILG spokesperson Jonathan Malaya sa isang interview na ilan sa mga local government units (LGUs) ay mas nakatutok sa kanilang vaccination program kumpara sa pag-update ng mga datos sa online portal.

“Dahil po dito, sa 10 taong nag-apply, pito lang ang may success. ‘Yung tatlo, no record found,” sabi ni Malaya. Payo ni Malaya sa mga hindi pa nakakakuha ng digital copy ng kanilang vaccination certificate na iprisinta muna ang kanilang vaccination cards sakaling mag-inspeksyon ang mga awtoridad sa kanila.

Kaugnay nito, maraming LGUs na ang nagpasa ng mga ordinansa hinggil sa pagpapatupad ng restriksyon sa mga hindi pa bakunadong indibidwal.

Gayundin, tsini-check ng mga awtoridad ang mga vaccination cards ng mga indibidwal na lumalabas. Ilang services din, gaya ng public transport ay nagre-require na ng vaccination cards bago pa makasakay.

Matatandaang noong Nobyembre, binanggit ni DILG Secretary Eduardo Año na ang immunization record ng gobyerno ay nananatiling mayroong 10 million gaps sa mga entries nito.

Hinimok naman ng Malacañang ang mga LGUs na madaliin na ng mga ito, ang encoding ng mga vaccine recipients’ information sa verification database system ng bansa.