Sa 3Cs lang.. Vax card, ‘di na kailangan sa malls — DILG

ni Lolet Abania | March 3, 2022

Hindi na kailangan ng COVID-19 vaccination card kapag papasok sa mga malls sa mga lugar na nasa ilalim ng Alert Level 1, ayon sa Department of the Interior and Local Government (DILG) ngayong Huwebes.

Nilinaw naman ni DILG spokesperson Jonathan Malaya na ang mga vaccination cards ay kailangan lamang sa mga establisimyento na kinokonsidera bilang 3Cs -- closed, crowded, close-contact venues, gaya ng restaurants, spas, at sinehan.

“So that we can sort of sort this confusion out, let us follow the advice of the Department of Trade and Industry Secretary Mon Lopez that the vaccination card is not required at the entrance of the mall. It is only required at the exact 3C establishment inside the mall, but not necessarily at the entrance of the mall,” sabi ni Malaya sa isang interview.

Ayon kay Malaya, tatalakayin ito ng DILG sa mga local government units (LGUs). Isinailalim simula Marso 1 hanggang 15, ang National Capital Region (NCR) at 38 iba pang lugar sa bansa sa Alert Level 1, ang pinakamababang COVID-19 risk classification.

Sa ilalim ng Alert Level 1, ang lahat ng establisimyento, mga indibidwal, o aktibidad, ay pinapayagang ma-operate, magtrabaho o isagawa ang full on-site o venue/seating capacity subalit dapat na ipinatutupad pa rin ang minimum public health standards.

Gayunman, sa unang araw ng implementasyon ng Alert Level 1 sa NCR, maraming tao ang dumagsa sa mga malls sa gitna ng COVID-19 pandemic.

70% venue capacity, aprub sa mga campaign rally – DILG

ni Lolet Abania | March 1, 2022

Papayagan lamang ang mga campaign rally ng hanggang 70% venue capacity sa ilalim ng umiiral nang Alert Level 1, ayon sa Department of the Interior and Local Government (DILG).

“Under the Comelec Resolution 10732, under Alert Level 1, allowed po up to 70% of the operational capacity of the venue whether indoor or outdoor,” paliwanag ni DILG Undersecretary Jonathan Malaya sa Laging Handa public briefing ngayong Martes.

“So meron pa rin po limitasyon sa numero ng mga tao na pwedeng dumalo sa isang pagtitipon kahit na po ‘yung lugar na ‘yun ay under Alert Level 1 na,” sabi ng opisyal.

Sa pangkalahatan sa ilalim ng Alert Level 1, ang lahat ng establisimyento, mga indibidwal, o aktibidad, ay pinapayagan na mag-operate, magtrabaho, o magkaroon ng full on-site or venue/seating capacity, subalit dapat na ipinatutupad pa rin ang minimum public health standards.

Ayon pa kay Malaya, ang DILG ay nakikipag-coordinate na sa Commission on Elections (Comelec) hinggil sa kung paano i-deputized ang mga ahensiya para ipatupad ang nasabing restriksyon.

Para sa mas murang gamot Botika ng Bayan, dapat palakasin — DILG

ni Lolet Abania | February 22, 2022

Ipinag-utos ng Department of the Interior and Local Government (DILG) sa mga local government units (LGUs) na dapat nilang palakasin ang mga Botika ng Bayan at Botika ng Barangay programs sa gitna ng mga reports na ilang sari-sari stores ang nagbebenta ng mga medisina at at pekeng gamot na ipinagbabawal sa batas.

Una nang hinimok ni DILG Secretary Eduardo Año, ang mga LGUs na mag-isyu ng mga ordinansa hinggil sa pagbabawal nito, at sa Philippine National Police (PNP) na arestuhin ang mga violators na mababatid na sangkot sa hindi awtorisadong pagbebenta ng mga gamot.

“Mayroon din tayong pag-uutos na i-strengthen ng ating mga LGUs ‘yung mga ibang programa ng pamahalaan katulad ng Botika sa Barangay at saka Botika ng Bayan,” pahayag ni Año sa isang interview ngayong Martes.

Ayon kay Año, mayroong tinatayang 170 Botika ng Bayan outlets ang itinayo ng pamahalaan sa buong bansa.

Matatandaan na ang Botika ng Barangay program ay inilunsad sa ilalim ng administrasyon ni dating Pangulong Gloria Macapagal-Arroyo noong 2001. Ito naman ay ni-revived noong 2018 sa ilalim ng pangalang Botika ng Bayan.

“’Yung Botika ng Barangay dating programa simula pa sa panahon ni GMA na kung saan sa mga barangay tinutulungan din ng LGU na ang isang committee or organization or isang NGO puwede magtayo ng drug outlet basta mayroong isa lang nagsu-supervise na pharmacist at tinutulungan natin ‘yan na maaprubahan para ito magsisilbing bilihan na mga gamot na mas mura kesa doon sa tinatawag na drugstore,” paliwanag ni Año.

“’Yung Botika ng Bayan eto sinimulan ‘yan sa panahon ni Pangulong Duterte noong 2018, mga 4th and 5th class municipalities ‘yung malalayo libre naman to ‘yung mga gamot na ordinaryong sakit libre ‘yan sa mga 170 Botika ng Bayan mayroon tayo sa buong bansa, kaya maganda na i-strengthen natin ‘yan,” dagdag ng opisyal.

Ayon kay Año, naglaan ang Department of Health (DOH) ng budget sa naturang programa at aniya, nagdagdag pa ang ahensiya ng pondo para rito upang matiyak na magkakaroon ang mga malalayong munisipalidad ng Botika ng Bayan.