Presyo ng rollback, kulang, out of stock... Pasaway na gas station, isumbong — DOE

ni Mervin Reyes @News | November 12, 2026

Photo: File / BIR

Nagbabala ang Department of Energy (DOE) sa mga gasolinahang hindi nagpapatupad ng itinakdang bawas-presyo sa mga produktong petrolyo, na maaari umanong maituring na price manipulation.

Ayon sa ahensiya, maaari itong maglabas ng show cause order at magpataw ng kaukulang multa sa mga gasolinahang mapatutunayang lumabag.

Hinimok din ng DOE ang publiko, lalo na ang mga motorista, na i-report ang mga hindi sumusunod sa rollback sa pamamagitan ng 8888 hotline o “Gas Station Concerns” feature sa eGovPH app.

Ilang motorista ang nagreklamo sa kulang na bawas-presyo habang may ibang gas station naman ang wala umanong stock.

Inatasan ang mga kumpanya ng langis na tiyaking naipaaalam sa lahat ng kanilang mga gasolinahan ang tamang pagpapatupad ng bagong presyo.

Naglabas ng babala ang DOE kasunod ng malakihang rollback na P16.80 kada litro sa gasolina, P4.10 sa diesel, at P3.70 sa kerosene.

P0.20 taas-presyo sa diesel... P5.50 rollback sa gasoline

ni Mervin Reyes @News | October 18, 2026

Photo: File

Posibleng bumaba ng P5.30 hanggang P5.50 kada litro ang presyo ng gasolina sa susunod na linggo, habang maaaring manatili o tumaas nang P0.20 kada litro ang presyo ng diesel.

Batay sa pagtataya ng isang source mula sa industriya ng langis, gamit ang buong linggong Mean of Platts Singapore (MOPS) trading at average ng palitan ng piso kontra dolyar, inaasahan ang nasabing pagbabago sa presyo.

Ayon sa source, bumaba ang presyo ng gasolina dahil sa paghina ng demand at pagbuti ng suplay sa Asya. Nakadagdag din sa pagbaba ang mas mataas kaysa inaasahang imbentaryo ng gasolina sa United States, na nagpapahiwatig ng mahinang demand.

Samantala, nakatulong sa pagpigil sa pagtaas ng presyo ng diesel ang planong emergency stock releases ng mga bansang kasapi ng International Energy Agency (IEA), kasunduan ng US at Russia sa diesel, at muling pagpapahintulot ng China sa pag-export ng refined petroleum products ngayong Oktubre.

Tuwing Lunes inaanunsyo ng mga kumpanya ng langis ang opisyal na pagbabago sa presyo, na ipatutupad kinabukasan.

P4.20 rollback sa gasoline, P0.40 taas diesel

by Jeff Tumbado @News | October 17, 2026

Posibleng bumaba ng P4 hanggang P4.20 kada litro ang presyo ng gasolina sa susunod na linggo, simula Oktubre 19, habang inaasahang tataas naman ng P0.20 hanggang P0.40 kada litro ang diesel.

Batay sa pagtataya ng oil industry, dulot ng pagbuti ng suplay ng gasolina sa Asya ang inaasahang rollback. Samantala, nananatiling mataas ang presyo ng diesel dahil sa limitadong pandaigdigang imbentaryo.

Maaari pang magbago ang mga pagtataya depende sa galaw ng pandaigdigang merkado ng langis.