May free-visa privileges... Dayuhan na bakunado na, puwede na sa ‘Pinas

ni Lolet Abania | November 26, 2021

Magsisimula nang tumanggap ang Pilipinas ng mga fully vaccinated na dayuhan na papayagang manatili sa bansa ng walang visa pero sa limitadong panahon lamang.

Sa isang press briefing ngayong Biyernes, ayon kay acting Presidential Spokesperson Karlo Nograles, ang bagong polisiya na inaprubahan ng COVID-19 task force ng gobyerno ay ipapatupad mula Disyembre 1 hanggang 15.

Ang listahan ng mga bansa, kung saan ang mga mamamayan nito ay maaaring maka-avail ng kanilang visa-free privileges, ay makikita sa website ng Department of Foreign Affairs (DFA).

Sa ilalim ng guidelines, iyong mga papayagang makapasok sa bansa ay kailangang may hawak na passports na valid ng humigit-kumulang na anim na buwan sa panahon ng pagdating nito at mayroong return o outbound tickets ng kanilang bansang pinagmulan o susunod na bansang destinasyon.

Bago dumating ng Pilipinas, kailangan na ang foreign national ay eksklusibong namamalagi sa “green” list countries o teritoryo ng 14 na araw. Ang mga lugar sa ilalim ng green list ay itinuturing na nasa low-risk para sa COVID-19 transmission.

Gayundin, dapat na magprisinta ng patunay ng kanilang vaccination.

Para sa mga fully vaccinated na dayuhan, isang negative RT-PCR test ang required na kunin sa loob ng 72 oras bago pa ang departure nito mula sa bansang pinagmulan.

Sa pagdating sa bansa, wala nang facility-based quarantine at wala na ring on-arrival RT-PCR test na kailangan, subalit ang mga passenger ay dapat na mag-self-monitoring para sa anumang sintomas hanggang 14 na araw, kasama na rito ang unang araw ng pagdating sa bansa.

Ang mga biyahero na transiting naman sa pamamagitan ng non-green list countries o teritoryo ay hindi itinuturing na nagmula o bumisita sa naturang lugar kung nanatili sila sa airport sa buong panahong iyon at hindi sila cleared para makapasok ng immigration authorities.

Ang testing at quarantine protocols ng mga menor-de-edad ay dapat na sumunod sa protocols ng mga magulang o guardian na nagta-travel kasama nito.

Ang guidelines ay nabuo isang linggo matapos na ang Inter-Agency Task Force for the Management of Emerging Infectious Diseases (IATF) ay inaprubahan in principle ang pagpasok ng mga turista na mga fully vaccinated kontra-COVID-19 mula sa mga bansa sa ilalim ng green list.

Matatandaang isinuspinde ang visa-free privileges nang unang buwan noong nakaraang taon dahil sa COVID-19 pandemic.

Rizal monument, ilalagay sa Alberta, Canada

ni Lolet Abania | June 3, 2021

Isang 3-talampakang monumento ng Pambansang Bayani na si Dr. Jose Rizal ang nakatakdang ilagay sa isang parke sa Alberta, Canada.

Ayon sa Department of Foreign Affairs (DFA), mula sa obra ng Pilipinong iskultor na si Toym Imao, ang Rizal monument ay ilalagay sa Nose Creek Regional Park sa Airdrie, isang sikat na venue para sa Filipino community events, bilang tribute rin sa mga Pinoy na nasa Alberta.

“The Rizal Monument will be a tribute to all the hardworking Filipinos in Alberta, which hosts the second-largest Filipino population in Canada, and will be a source of pride for the whole Filipino community,” ani Philippine Consul General Zaldy Patron sa isang statement ngayong Huwebes.

Sinabi rin ng DFA na una nang iminungkahi ni Patron ang nasabing monument kay Airdrie Mayor Peter Brown noong Hunyo, 2019.

Inaprubahan naman ito ng Airdrie City Council sa kanilang March 1 at April 6 sessions.

“We are very proud and pleased to announce our support for a community project that recognizes and celebrates Airdrie’s unique Filipino heritage,” sabi ni Brown.

“The monument will make a welcome addition to our already beloved Nose Creek Regional Park,” dagdag niya.

Inaasahang makukumpleto ang Rizal monument sa October, 2021.

Banat ni DFA Sec. Locsin sa China, pinalagan ni Spox Wenbin

ni Ronalyn Seminiano Reonico | May 4, 2021

Hindi pinalagpas ng China ang naging matapang na pahayag ni Department of Foreign Affairs (DFA) Secretary Teodoro Locsin, Jr. kamakailan laban sa naturang bansa dahil sa patuloy na presensiya ng mga Chinese vessels sa West Philippine Sea (WPS).

Pahayag ni Foreign Ministry Spokesperson Wang Wenbin sa regular press briefing sa Beijing, "Facts have proven time and time again that megaphone diplomacy can only undermine mutual trust rather than change reality.

"We hope that [a] certain individual from the Philippine side will mind basic manners and act in ways that suit his status.”

Noong Lunes, matatandaang nag-tweet si Locin ng: “China, my friend, how politely can I put it? Let me see… O… GET THE F*** OUT. What are you doing to our friendship? You. Not us. We’re trying. You. You’re like an ugly oaf forcing your attentions on a handsome guy who wants to be a friend; not to father a Chinese province."

Ayon kay Presidential Spokesperson Harry Roque, humingi ng paumanhin si Locsin sa Chinese ambassador, ngunit paglilinaw ng Foreign Affairs secretary, tanging kay China's Foreign Minister Wang Yi lamang siya nag-sorry.

Saad pa ni Locsin, “To my friend Wang Yi only. Nobody else.”

Nilinaw naman ni Wenbin na mananatili ang kanilang pagtulong sa Pilipinas sa kabila ng mga isyu sa WPS.

Saad pa ni Wenbin, "China has always been and will remain committed to properly handling differences and advancing cooperation with the Philippines through friendly consultation, and will continue to provide assistance within its capacity to the Philippines in its efforts to fight the epidemic and resume economic development.”