Pati sa surplus stores.. Mga laptop ng DepEd, ibinibenta online

ni Madel Moratillo | May 10, 2023

Nais ng Makabayan bloc na magkaroon ng Congressional inquiry sa sinasabing bentahan umano ng laptop na binili para sa mga guro ng Department of Education (DepEd).

Sa resolusyong inihain nina ACT Teachers Partylist Representative France Castro, Gabriela Women’s Party Rep. Arlene Brosas, at Kabataan Partylist Rep. Raoul Manuel, nakasaad na nais nilang atasan ng liderato ng Kamara ang Committee on Good Government and Public Accounts na mag-imbestiga.

Batay sa impormasyon ng Makabayan, ang mga nasabing laptop ay napunta umano sa Facebook Marketplace o surplus stores sa Cebu and Rizal.

Nakasaad sa resolution na may mga guro ang nagsabing wala silang natanggap na laptop na binili para sa DepEd Computerization Program noong kasagsagan ng pandemya na panahong nagpatupad ng blended teaching.

Sa imbestigasyon umano ng DepEd Central Visayas nadiskubreng 100 laptop ang naibenta sa surplus store sa Cebu

Bakasyon balik-Marso, pinag-aaralan pa — P-BBM

ni Mylene Alfonso | April 25, 2023

Sa lalong madaling panahon maglalabas ng desisyon ang kasalukuyang administrasyon kaugnay sa magiging desisyon sa hirit na ibalik sa Marso ang bakasyon ng mga estudyante ngunit marami pa rin kailangang ikonsidera lalo na ang pabagu-bagong lagay ng panahon sa bansa.

Ayon kay Pangulong Ferdinand Marcos, Jr., pinag-aaralan pang mabuti ng pamahalaan ang pagbabalik ng dating school calendar dahil natapos na rin ang lockdown sa COVID-19 pandemic.

"Pinag-aaralan natin nang mabuti ‘yan dahil nga marami nga nagsasabi, puwede na tapos na ‘yung lockdown, karamihan na ng eskuwela face-to-face na. Kakaunti na lang ‘yung hindi na," wika ni Marcos sa isang panayam.

"Hindi maikakaila aniya na kapag tinatanong ang mga estudyante kung ano ang nami-miss nila, ang sagot ng mga ito ay ang eskuwelahan at ang mga kaklase," pahayag pa niya.

Gayunman, sinabi ng Pangulo na kailangan pa rin ikonsidera ang mga kaso ng COVID-19 dahil tumataas na naman ang bilang ng mga nagpopositibo at ang matinding climate change sa bansa.

"Pero palagay ko, ‘yang diskusyon na ‘yan madedesisyunan ‘yan very soon on what will be the — ano ‘yung tama. Binabagay kasi natin talaga ‘yan sa ano eh — binabagay natin ‘yan sa seasons eh. ‘Yun ang naging problema, kung ibabalik o hindi dahil hindi nga — hindi na masabi kung kailan mag-uumpisa ang ulan, kung kailan magiging mainit,” saad ni Marcos.

"So, it’s not a simple as you would imagine na akala mo, palitan natin dahil wala na ‘yung lockdown. Nagbago pati ‘yung weather eh. ‘Yun ang isa pang problema na tinitingnan natin na kailan," dagdag pa ng Punong Ehekutibo.

Matinding init, walang F2F classes — DepEd

ni Madel Moratillo | April 24, 2023

Maaari umanong masuspinde ang face-to-face classes at magsagawa ng modular distance learning dahil sa matinding init ng panahon o kawalan ng kuryente.

Ayon kay Department of Education spokesperson Atty. Michael Poa, sa isang memorandum na inisyu sa mga pampubliko at pribadong paaralan na may petsang Abril 20, nakasaad na pinaalalahanan ang pamunuan ng mga eskwelahan na mayroon silang awtoridad at responsibilidad na magsuspinde ng in-person classes at bumalik sa distance learning kung masama ang panahon o sobrang taas ng temperatura na maaaring makaapekto sa pag-aaral ng mga estudyante at kanilang kalusugan.

Paliwanag ni Poa, magkakaiba ang sitwasyon sa bawat paaralan kaya ang school heads ang mas makakadetermina kung ano ang makakabuti.

Ayon sa PAGASA, pwedeng umabot pa ng 50°C ang heat index sa ibang lugar habang may ilan ang pwede pang abutin ng hanggang 56°C.

Ang Occidental Mindoro ay inilagay naman sa state of calamity dahil sa 20-hour daily power outage sa nakalipas na buwan.

Salig sa DepEd Order 37, walang automatic class suspension dahil sa kawalan ng kuryente pero nasa diskresyon ng pamunuan ng eskwelahan na magkansela ng klase kung makakaapekto ito sa pag-aaral ng mga estudyante.

Sa survey ng Alliance of Concerned Teachers, mayorya umano ng mga guro sa bansa ang nagsabi na maraming estudyante ang hirap na makapag-concentrate sa pag-aaral dahil sa matinding init ng panahon.