Dagdag na bus routes para sa Libreng Sakay, pinag-aaralan ng DOTr

ni Lolet Abania | July 4, 2022

Nire-review ngayon ng Department of Transportation (DOTr) ang posibilidad ng pagkakaroon ng free bus rides sa mas maraming ruta sa ilalim ng kanilang Libreng Sakay program.

Sa isang interview kay DOTr Undersecretary Cesar Chavez ngayong Lunes, ipinunto nito na ang budget ng DOTr ay magiging sapat lang para sa umiiral nang mga ruta ng libreng sakay.

“Nire-review ‘yan ngayon sapagkat ‘yung budget na nakalaan, of course through congressional approval at nu’ng nakaraang administrasyon, ay sasapat lang at hindi kasama ‘yung ibang ruta na hinihiling nila ngayon,” paliwanag ni Chavez.

Ayon kay Chavez, makikipagpulong na si DOTr Secretary Jaime Bautista sa mga head ng mga kaugnay na ahensiya upang talakayin ang naturang usapin.

Noong Biyernes, inaprubahan ni Pangulong Ferdinand “Bongbong” Marcos Jr. ang extension ng free EDSA Carousel bus rides hanggang Disyembre 2022, kung saan magtatapos sana sa Hulyo 30, 2022.

Aprubado rin kay Pangulong Marcos, ang libre sakay para sa mga estudyante na gagamit naman ng MRT3, LRT2, at Philippine National Railways (PNR) kapag nag-resume na ang in-person classes sa Agosto.

Binanggit din ni Chavez sa interview na hindi naman kakayanin ang free rides para sa lahat sa mga tren dahil aniya, ang MRT3 ay nagkaroon lamang ng P82 million revenue collection nitong Enero subalit umabot ang kanilang gastos sa P722 milyon para sa libreng sakay.

Gayundin, ayon kay Chavez, hindi rin sila makapagbigay ng free rides sa LRT1 sa dahilang ito ay nasa ilalim ng isang concession agreement sa Light Rail Manila Corporation at ang gobyerno ay walang control sa kanilang operation at revenue.

Libreng sakay sa EDSA Carousel, extended; free train ride sa estudyante, aprub — P-BBM

ni Lolet Abania | July 1, 2022

Inaprubahan ni Pangulong Ferdinand “Bongbong” Marcos, Jr. ngayong Biyernes, ang extension ng libreng sakay sa EDSA Bus Carousel at libreng sakay naman para sa mga estudyante sa mga train sa Metro Manila at ang Philippine National Railways (PNR), batay sa anunsiyo ng Department of Transportation.

Ayon sa DOTr, ang free rides sa EDSA Bus Carousel ay pinalawig ng hanggang Disyembre 2022, habang free train rides para sa mga estudyanteng sasakay sa Metro Rail Transit Line 3 (MRT3), Light Rail Transit Line 2 (LRT2), at PNR na mula Agosto 22 hanggang Nobyembre 4, 2022.

Base sa isang bahagi ng DOTr memorandum na inaprubahan ni Pangulong Marcos, sinabi ng ahensiya na kinonsidera rito ang availability ng budget para sa Service Contracting sa ilalim ng 2022 General Appropriations Act sa pagpapalawig ng free bus rides.

Ginawa ito, ayon sa DOTr, “[to] ease the burden of rising living expenses on Filipino families and help them save money, especially with the return of face-to-face classes after more than two years.”

Habang tinapos na ng gobyerno nitong Hunyo 30, ang libreng sakay sa mga pasahero maliban sa mga estudyante sa MRT3, sinabi ng DOTr na inirekomenda nila ang free rides para sa mge estudyante sa MRT3, LRT2, at PNR bilang konsiderasyon na rin sa kapakanan ng mga ito na ani ahensiya, “whose learning outcomes have been disproportionately affected by the pandemic.”

Kaugnay nito, ayon sa Department of Education, tinatayang nasa mahigit sa 38,000 paaralan sa bansa ang nakatakda nang mag-resume para sa face-to-face classes sa School Year 2022-2023.

Dating PAL president Bautista, napiling DOTr chief ni P-BBM

ni Lolet Abania | June 23, 2022

Napili ni President-elect Ferdinand “Bongbong” Marcos Jr. si dating Philippine Airlines (PAL) president at chief operating officer Jaime Bautista bilang susunod na Department of Transportation (DOTr) chief sa kanyang administrasyon.

Ito ang kinumpirma ni incoming Executive Secretary Attorney Vic Rodriguez sa mga reporters ngayong Huwebes. Papalitan ni Bautista si Arthur Tugade na kalihim ng DOTr sa Hunyo 30.

Si Bautista na isang certified public accountant ay nagtrabaho sa PAL ng 25 taon at nagsilbi bilang kanilang presidente ng 13 taon bago ang kanyang retirement noong 2019.

Gayundin, in-appoint ni P-BBM si dating Light Rail Transit Authority (LRTA) deputy administrator Cesar Chavez bilang Undersecretary-designate for Rails ng DOTr.

Ayon sa kampo ni Marcos, si Chavez ang naging instrumento sa pagse-secure ng approval ng National Economic and Development Authority (NEDA) para sa Metro

Manila Subway, PNR Manila to Calamba, PNR Manila to Bicol, at ang Tagum-Davao-Digos Mindanao rail projects.

Bago pa magsilbi sa transport sector, si Chavez ay assistant general manager for planning ng Metropolitan Manila Development Authority (MMDA) at chairman ng National Youth Commission (NYC).

“I will not preempt the transport policy initiatives of the incoming president and incoming transport secretary, but my immediate concerns will be how to simplify decision-making processes and hasten the project completion of railway projects, and prioritize Visayas and Mindanao in the planning of future rail projects,” pahayag ni Chavez.

Napili rin ni Marcos ang abogadong si Cheloy Garafil, MNSA, na maging chairperson ng Land Transportation Franchising and Regulatory Board (LTFRB).

Sa kasalukuyan, si Garafil ay service director sa Committee on Rules ng House of Representatives. Nagsilbi rin siya bilang prosecutor ng Department of Justice (DOJ) at State Solicitor sa Office of the Solicitor General (OSG).

Gayundin, si Christopher “Chet” Pastrana ay napili ni Marcos na maging general manager ng Philippine Ports Authority (PPA).

Ayon sa kampo ni P-BBM, si Pastrana ay marami nang karanasan sa iba’t ibang aspeto ng aviation, logistics, at public maritime transport.