Gym, fitness studio, museum atbp., balik-operasyon na

ni Ronalyn Seminiano Reonico | June 11, 2021

Maaari nang magpatuloy ang operasyon ng mga indoor non-contact sports katulad ng gyms, fitness studios, skating rinks, at racket sports courts na mayroong Safety Seal Certification mula sa Department of Trade and Industry (DTI) sa 30% venue capacity sa NCR Plus, ayon kay Presidential Spokesperson Harry Roque ngayong Biyernes.

Pinayagan na rin ng pamahalaan ang pagbubukas ng mga historical sites at museums sa NCR Plus na binubuo ng Metro Manila, Bulacan, Cavite, Laguna at Rizal sa 20% venue capacity at mahigpit pa ring ipinatutupad ang mga health and safety protocols, ayon kay Roque.

Ang pagbubukas din umano ng mga historical sites at museums ay kailangan pa rin ng approval ng local government units na nakasasakop sa mga ito.

Samantala, ayon din kay Roque, bawal pa ang mga guided tours sa mga historical sites at museums.

Safety Seal sa mga malls, tindahan, pasyalan, etc. sa QC, start na

ni Mary Gutierrez Almirañez | June 5, 2021

Inirekomenda ni Quezon City Mayor Joy Belmonte sa mga business establishments na i-comply sa national government ang COVID-19 Safety Seal certification na magsisilbing katibayan na sumusunod sila sa minimum health protocols laban sa virus.

Ayon pa kay Belmonte, "We hope our businesses will take this as an opportunity to prove that they carry out the necessary measures to ensure the safety of their customers. And in turn, we expect that this will increase customer confidence and positively affect everyone's livelihood and our economy."

Dagdag nito, puwedeng mag-apply o kumuha ng Safety Seal certification sa lokal na pamahalaan at kapag nagawaran na ng certificate ang business owner ay puwede niya iyong i-display sa kanyang tindahan o kainan.

Nakasaad din sa Executive Order No. 13 Series of 2021 ang bawat mall, wet markets, retail stores, restaurants, fast food, coffee shops, karinderya, bangko, pawnshops, money changers, remittance centers, car washes at laundry service centers na hinihikayat na mag-apply ng Safety Seal certification. Kasama rin dito ang mga pasyalan katulad ng art galleries, libraries, museums, zoos, sports centers, gyms, spas, tutorial, testing at review centers, pati ang sinehan at gaming arcades.

Sa ngayon ay SM City North EDSA ang kauna-unahang shopping mall sa Quezon City na nag-display ng Safety Seal certification.

Ang pagdidikit nito ay pinangunahan ni Department of Trade and Industry (DTI) Secretary Ramon Lopez.

Kasama rin sa launching ng Safety Seal certification sa SM North sina Department of Interior and Local Government (DILG) Undersecretary Jonathan Malaya at DTI Undersecretary Ireneo Vizmonte.

P1,500 na gamot kontra Covid, for sale ng P27 K, mga ospital iimbestigahan

ni Mary Gutierrez Almirañez | June 2, 2021

Iimbestigahan ng Department of Health (DOH) ang diumano’y overpricing ng gamot kontra COVID-19 na Remdesivir, ayon sa Chief ng DOH Pharmaceutical Division na si Dr. Anna Guerrero.

Aniya, "Meron pong resibo na ganu’n po ang nakasaad, minsan P15,000, P20,000, ang pinakamataas ata, P27,000."

Kaugnay ito sa reklamo ng mga pasyente na nagbayad ng mahigit P27,000, gayung nagkakahalaga lamang ng P1,500 hanggang P8,200 ang presyo ng Remdesivir.

Matatandaan namang ipinagbawal ng India kamakailan ang pag-e-export ng Remdesivir dahil sa lumalaganap na Indian variant sa kanilang bansa.

Paliwanag pa ni Dr. Guerrero, "Mahirap din kasi ang supply ngayon ng Remdesivir. Mayroon ding pandemic sa India. Mataas din ang kaso nila. In fact, mas mataas kaya nagkaroon ng export ban at nahihirapan din silang mag-sort ngayon."

Samantala, itinanggi naman ng DOH na maglalaan sila ng pondong P1 billion para ibili ng Remdesivir.

Sa ngayon ay nakikipag-ugnayan na rin ang DOH sa Department of Trade and Industry (DTI) upang imbestigahan ang overpricing ng gamot sa ilang ospital.

“Kasi imported po ito from India, hindi po ganu’n kataas. So, mukhang ang patong po talaga, mga ospital," dagdag pa ni Dr. Guerrero.